Hosea 5

Luganda (BIBU1) (BIBULIYA ENTUKUVU)

← Chapter 4 Jump to: Chapter 6 →

1“Bakabona, muwulire kino! Mmwe ennyumba ya Yisirayeli, mutegereze! Nammwe ennyumba ya Kabaka, muwulirize! Kino nkivunaana mmwe: E Mizupa mwafuuka kitimba, n'olutuula olwanjuluziddwa ku Tabori.

2Basimye obunnya obuwanvu e Sittimu, bonna nzija kubabonereza.

3Nze Efurayimu mmumanyi, ne Yisirayeli tankwekeddwa; Efurayimu, okoze obwamalaaya; Yisirayeli yeegwagwawazza.

4Ebikolwa byabwe tebibaganya kudda eri Katonda waabwe; omwoyo omwenzi guli mu mitima gyabwe, n'Omukama tebamumanyi.

5Okwekuza kwa Yisirayeli kumulumiriza; Yisirayeli ne Efurayimu balisirittuka mu bibi byabwe, ne Yuda alisirittuka wamu nabo.

6Bwe baligenda okunoonya Omukama n'amagana gaabwe, tebalimuzuula, aliba abeetegudde.

7Tebaali beesigwa eri Omukama, kubanga baazaala abaana ab'ensonga; kale nno embaga zaabwe ez'Okuboneka kw'Omwezi zijja kubakavvula ko n'ennimiro zaabwe.

8“Mufuuwe eŋŋombe mu Gibewa n'ekkondeere mu Rama, Mukube enduulu mu Beti-Aveni, mutiisetiise Benyamiini.

9Ku lunaku olw'ekibonerezo Efurayimu alisigala matongo, mu bika bya Yisirayeli nnangirira ekikakafu.

10Abakungu ba Yuda bali ng'abo abajjulula ensalo z'ettaka; nzija kubamalirako obusungu bwange ng'omujjuzo gw'amazzi.

11Efurayimu anyigiriziddwa, abetenteddwa n'ekibonerezo, kubanga yasiima okugoberera obulimba.

12Efurayimu mmufaananira ng'ennyenje, ennyumba ya Yuda ngifaananira ng'ekintu ekivundu.

13“Efurayimu bwe yalaba obulwadde bwe, ne Yuda ebbwa lye, Efurayimu n'addukira e Assuri, n'atumira kabaka omukulu; naye nno n'oyo talisobola kubawonya, talisobola kubaggyako bbwa.

14Kubanga Efurayimu ndimubeerera ng'empologoma, Yuda, ng'omwana gw'empologoma. Nzija kutaagulataagula neetambulire; nzija kukwakkula ntwale, ate tewaliba awonya.

15“Nzija kweddirayo mu kifo kyange okutuusa lwe balikkiriza omusango gwabwe, ne banoonya amaaso gange; mu buyinike bwabwe balinnoonya buteddiza.”

← Chapter 4 Jump to: Chapter 6 →