Hosea 14

Luganda (BIBU1) (BIBULIYA ENTUKUVU)

← Chapter 13 Jump to:

1“Samariya wa kubonerezebwa olw'omusango gwe, kubanga baajeemera Katonda waabwe. Balifa ekitala, amabujje gaabwe galiseseggulibwa ku ttaka, ne bakazi baabwe abali embuto balibaagibwa.”

2Ayi Yisirayeli, dda eri Omukama Katonda wo; ebibi byo byakuleetera okugwa.

3Mugende n'eby'okwogera eri Omukama; mumugambe nti: “Ggyawo ebibi byaffe byonna; kkiriza ekirungi; tunaakuweereza ebibala by'emimwa gyaffe.

4Assuri tajja kutulokola, tetujja kwebagala mbalaasi. Tetujja kugamba gwa kubiri nti: ‘balubaale baffe’ ku ebyo emikono gyaffe bye gikoze; kubanga enfuuzi mu ggwe mw'esanga okusaasirwa.”

5“Nzija kuwonya obujeemu bwabwe; nzija kubaagala nga bwe njagala, kubanga obukambwe bwange bubavuddeko.

6Yisirayeli nzija kumubeerera nga ssuulwe; alyanya ng'ekimuli ky'eddanga, alisimba emirandira ng'entolookyo z'oku Lebanoni,

7obutabi bwe obuto bulitojjera. Ekitiibwa kye kiriba ng'eky'omuti gw'oliva, n'akawoowo ng'ak'entolookyo z'oku Lebanoni.

8Abantu balidda ne batuula mu kittuluze kye; balibala ng'eŋŋano, balyanya ng'emizabbibu, ettutumu lye liriba ng'ery'evviini ya Lebanoni.

9Efurayimu, ebifaananyi bya balubaale okyabyagaza ki? Nze nkwanukula era nze nkulabirira. Nninga sipulaasi bulijjo aba addugazza, okubala kwo kuva ku nze.”

10Oyo omugezi, ategeere bino, oyo omulabalaba, abikwate. Kubanga amakubo g'Omukama maluŋŋamu; abatuukirivu be bagatambuliramu, naye abasobya bageesittaliramu.

← Chapter 13 Jump to: