2 Chronicles 10

Lugbara (E’yo Siza Alatararu Munguniri BIBLIA)

← Chapter 9 Jump to: Chapter 11 →

1Te Rehoboamu mu Sekemua, a’disiku Israeli dria ca Sekemua eri ’bazu opiru.

2Eri nga eca ’dini, Yeroboamu Nebati mvi ka e’yo nderi eri ra (a’disiku eri de Misiria, pari erini apazu nzuzu opi Sulemani ma miliarisi), Yeroboamu nga dri atri engazu Misiriasi ra.

3Yi pe ’ba tileri omvezu; Yeroboamu pi emu, ’ba ongulumuru Israelini be dria’i nga ’yo Rehoboamu tia kini,

4Mi ati ’ba ndra kulumbu ewaru ama dria. ’Dini curu’do mi ’du azi ewaru mi atini, azini kulumbu nzizaru erini ’bale ama driari ma nziza fo, te ama nga azi nga mi dri beni.

5Eri nga e’yo omvi yi tia kini, Emi ma nga emu ma vu dika o’du na ma vutia. ’Ba ongulumuru mu di ani ra.

6Opi Rehoboamu nga di e’yo nderi ama tualu ’ba mbazaru pa sopi ndra i ati Sulemani drilia ewu erini ovuzu nga idrirurisi ’diyi be, kini, Emi ama e’yo ngoni eminingale fele ma driri omvizu ’ba ’doyi ma tia ya?

7Yi nga di e’yo omvi eri tia kini, Mi ka ovu asi ndrizasi ’ba ’diyi vu, mi kal ayiko fe yi dri, e’yo onyiru ’yozu yi be, ka’dini yi nga ovu ati’ba mini ’dani’dani.

8Te eri ku e’yo amaza ’ba mbazaru ’diyini amale fele eri driri, te eri ama e’yo karile azi zopi tualu eri be, pa sopi eri ma drilia ’diyi be.

9Eri zi yi tia kini, Emi fe e’yo amaza ngoni ya, ama ma omvi e’yo ’ba ’doyi ma tia ya? Yi ’yo ma tia kini, Mi ’du kulumbu mi atini ’bale ama driari ma nziza ra fo.

10Te karile aziru zopi eri be ’diyi omvi e’yo eri tia kini, Mi ma ’yo ’dini ’ba e’yo ’yopi mi be ’diyi ma tia; ’ba ’diyi ’yo ra, Mi ati ’ba ndra kulumbu nzizaru ama dria, te mi ma ’du nzizani ama dri fo. ’Ba e’yo ’yopi ’dinile ’doyi ma tia mi ma ’yo ’dini, Drimva gana maniri ovu oseru aga ma ati ma o’du ra.

11Ma ati ’ba ndra kulumbu nzizaru emi dria, te ma nga kulumbu emini ma nziza adro drinia dika curu’do. Ma ati co ndra emi enyirikosi, ma di nga emi co otunukuasi.

12’Dinile Yeroboamu piyi eca Rehoboamu vu ’ba ongulumuru be o’du narisi, ekile opini azilerile kini, Emi emu ma vu o’du narisi.

13Te opi omvi e’yo yi tia ti okporusi; opi Rehoboamu ku e’yo amaza ’ba mbazaru ’diyini ja,

14eri ’yo yi tia ekile karileni amalerile, ’yozu kini, Ma ati ’ba ndra kulumbu nzizaru emi dria, te ma nga nzizani adro drinia dika; ma ati co ndra emi enyirikosi, te ma nga emi co otunukuasi.

15’Dini opi erini e’yo ’ba nde ’diyini ku; te e’yo nde ’ye i ’dini Mungusi, Yehova ma ’ba e’yo erini ’yole Ahiya ’ba Siloari ma tisi Yeroboamu Nebati mvi ma tiari ma so pa ani beni.

16Te Israeli dria ka ndre opi erini e’yo yini ku, ’ba nde ’diyi omvi e’yo opi tia kini, E’yo ama eselia Daudi pieri ngoni ya? Ama ovuni awuruso Yese mvini be aluni ku. Israeli la, emi mu dria alu alu hema eminia fo! Daudi, mi te mi ngulupi ma agei curu’do. ’Dini Israeli dria mu di hema yinia.

17Te Rehoboamu ovu opiru anzi Israelini ovupi aku ambo ambo Yudani ma alia ’diyi ma drilia.

18O’du nderisi opi Rehoboamu pe Hadoramu ovupi opiru ’ba yini okule azi ngazu ’diyi ma driliari ma ti, te anzi Israelini o’be eri onisi, dra ra. Te opi Rehoboamu nzu mbele fizu gari erini ma alia, apazu Yerusalemua.

19’Dini Israeli yi mbu suru Daudini ma ruaa amve ecazu kpere andru.

← Chapter 9 Jump to: Chapter 11 →