2 Chronicles 31

Lugbara (E’yo Siza Alatararu Munguniri BIBLIA)

← Chapter 30 Jump to: Chapter 32 →

1Te e’yo ’diyi ka di yi de dria ’bo, ’ba Israelini dria ovupi ’daa indi ’diyi fu mu aku Yudaa ’diyia, onyo pati i’diza piriru ’diyi, oga wura Aseriru ’diyi va, onyo pari uruleru ’diyi pi, pari edeta edezu ’diyi be, engazu Yuda piasi dria Benyamini be, azini Efiraimu pi ma alia Manase be indi, kpere yini deria yi ezaria dria ’boria. Vilerisi anzi Israelini dria atri di dri ra, ’ba dria alu alu mvizu yi vile awuruso vu, kpere yi vile akua.

2Hezekia ede amuti ’ba atalauru ’diyi pi dri ’ba Levini ’diyi be, yi otizu amuti yini vusi ’ba dria alu alu azi iniri vusi azi iniri vusi, ’ba edeta edepi ’diyi pi ’ba Levini be indi, edeta vezaru ’diyi pi edezu edeta asi anzuruni ’diyi pie, azi ngazu azini awa’difo fezu, inzita inzizu pari Yehovani ovuzuri ma kalitilia.

3Afa feza opini engapi afa eri vile ’diyi ma eseliari eri edeta vezaru ’diyi, adani yi edeta vezaru o’bitisiri, pi ondreniri be, azini edeta vezaru sabatosi ’diyi pi, mba o’dirusi ’diyi pie, omu azile ’diyisi ’diyi pie, ekile sile Yehova vile azita ma aliarile.

4Azini indi eri azi ’ba ovupi Yerusalemua ’diyi ma fe afa feza ma esele ’ba edeta edepi ’diyi pi vileri ’ba Levini be, ’dini yi ma fe yi ma ngulupi azita Yehovani vu beni,

5Azita ’dini ’baria i ereriaria indikindi, anzi Israelini nga anya kapi okori pi fe fudri ci, afa mvuza pie, odu pie, anyusu pie, afa dria kapi amvua ’diyi pie dria; yi eji afa dria ma esele mudri ma azi aluri fudri ci.

6Anzi Israelini piyi anzi Yudani be, ovupi aku Yudani ma alia ’diyi, yi eji alu indi ti pi ma esele mudri ma azi aluri, kabilo be, eji vini afa feza fele alaru Yehova Mungu yiniri dri ’diyi ma esele mudri ma azi aluri indi, yi oda di yi nguru nguru.

7Yi e’do afa yini okule nguru nguru ’diyi ma eti odazu mba narisi, yi de di mba azirmsi.

8Hezekia pi ’ba ’wara ’diyi be ka di emu afa odale nguru nguru ’diyi ndre dria ’bo, yi inzi ani Yehova, fe asi ndriza ’ba erini Israeliru ’diyi dri.

9Hezekia nga di ’ba atalauru ’diyi pi ozi ’ba Levini be, afa ’bani odale nguru nguru ’diyi ma e’yosi.

10Azaria atalau ambori ovupi ori’ba Zadokiniri, nga e’yo omvi eri tia kini, Engazu ’bani e’dozu afa feza ejizu jo Yehovani ma aliarisi, ama nya ra, ama tra ra, joloni ace ekpete ekpete; a’disiku Yehovani asi ndriza fele ’ba erini dririsi, te afa ta mbale amboru ’diyi joloko kuleri’i.

11Hezekia nga di e’yo azi jo aliza edezu jo Yehovaniri ma alia; yi ede di yi ra.

12Yi eji di afa fele Mungu dri ’diyi pi, o’ba yi alenia asi adasi, afa yini ma esele mudri ma azi aluri pie, afa feza fele alaru ’diyi pie dria. Konania ’ba Leviniri ovu afa feza nde ’diyi ma drilia, vunisiri adri Simei’i;

13Yehieli pi, Azazia pie, Nahati pie, Asaheli pie, Yerimoti pie, Yozabadi pie, Elieli pie, Isimakia pie, Mahati pie, Benaya pie dria, yi ovu ndra ’ba ma drilia Konania pi ma palaa adri Simei be, ekile opi Hezekia pini yi opele Azaria jo Munguniri ma driliari berile.

14Kore Imina mvi ’ba Levini, kalitile etuni efurialeruri ma agei tepiri, ovu ndra afa feza ceni fele Mungu dri ’diyi ma drilia, afa feza Yehovani ’diyi pi awazu afa alatararu tu ’diyi be.

15Eri ma vutisi yi Edeni pi, Miniamini pi, Yesua pi. Semaya pi, Amaria pi, Sekania pie aku ’ba edeta edepi ’diyini ma alia, ekile ’bani yi otile azi yinisirile, afa awazu yi adripi dri amutisi, ’ba ’wara piyi dri ’ba nyiri ’diyi be dria trotro;

16fe vini ’ba yini olale ’ba agupiru a’bianzi olazasi ’diyi dri indi, e’dozu ’ba capi eli be na ’diyisi muzu drile, adani ’ba dria alu alu fipi Yehova vile jo ma alia, ekile azi o’du alu alusirini lelerile, azi ’bani yi ayuzuri ngazu amuti yini vusi ’diyi.

17Azini ’ba atalauru olale ’ba agupiru a’bianzi olazasi ori’ba yi ma a’bipini vusi ’diyi pi dri, ’ba Levini engazu eli kali irisi tuzu drile, ’bani yi ayulerile amuti yini vusi ’diyi be.

18Azini yi be anzi nyiri yini, ’bani olale a’bianzi olazasi ’diyi pi, oku Iyini pie, agupianzi yini pie, ezoanzi yini pie, ’ba ongulumuru ma eselia dria, a’disiku azi ’bani fele yiniruri ma alia yi alaru e’yo alatararuri ma alia.

19Te anzi Aronini ’ba edeta edepi ovupi amvu angu aku yini ma ageiaria ’diyi dri, ’ba azini indi aku dria alu alu ma alia yi ma ru osile ’diyi, ngazu afa yiniri awazu fezu ’ba agupiru ’ba atalauru ma eselia ’diyi pi dri, ’ba dria olale a’bianzi olazasi ’ba ma eselia ’diyi be dria.

20Hezekia ’ye ’dinile Yuda ma alia dria; eri ’ye azi ovupi onyiru, kililiru, azini adaruri Yehova Mungu eriniri ma milia.

21Te azi dria erini e’dole ’yele jo Yehovani ma alia ’diyi, kani azita ma e’yosi ’diyi, kani e’yo azile ’diyi ma alia dria, Mungu ini ndazu, eri ’ye asi driasi, ovu ani drilebaru.

← Chapter 30 Jump to: Chapter 32 →