2 Chronicles 20

Lugbara (E’yo Siza Alatararu Munguniri BIBLIA)

← Chapter 19 Jump to: Chapter 21 →

1Te eri eca e’yo ’di ma vutia ’dini, anzi Moabuni ’diyi, anzi Amonini pie, yi be ’ba Amonini ma azi ’diyi be, yi emu a’di ’ dizu Yehosafati be.

2Etu ’dasi ’ba azini eca e’yo olu Yehosafatini kini, ’Ba ongulumuru amboru emu omba ’bazu mi be engazu miri tia ’aa’dasi angu Suriaa; te mi ndre, yi ovu Hazazoni-tamaria (angu nde Enigedi’i).

3Yehosafati ovu di urisi, eri ’ba i asi Yehovani ndazu, azini eri azi ’ba ma ’da nyaka angu Yudani ma alia dria ’da ’da.

4Yuda nga di yi oku tualu aza koza ndruzu Yehova dri; ada, engazu aku dria Yudaa ’diyi ma alia dria ’ba yi emu Yehovani ndruzu.

5Yehosafati so di pa ’ba ongulumuru Yuda pini ma eselia ’ba Yerusalemua ’diyi be, jo Yehovaniri ma alia, irii o’diruri ma drilialeru;

6eri ’yo ra, Yehova Mungu ama a’bipiniri la, mi ovuni Mungu ’buari’i ku ya? Mi ovuni opi opi nyaza suru driani ma driliari’i ku ya? Mi ma dria okpo pi ecoza driari be indi, ’dini ’ba aluni ecopi mi ogapini yo.

7Mungu amaniri la, mi ofuni ndra ’ba angu ’diri ma e’ipi ’diyi ’ba mini Israelini ma drilia, eri fezu ori mi agyi Iburahimuni dri ’dani ’dani ra ku ya?

8Yi ri angu nde ’diri alia ra, yi si alenia pari alatararuri mi rusi ’bo, ’yozu kini,

9E’yo onzi ka nga eca ama ruaa ra, kani seini, kani e’yo lizani, kani azo muani, kani likini, ama di nga pa so jo ’di ma drilia, azini mi ma drilia indi, mi runi ovule jo ’dori ma aliarisi, owuzu mi vu ocoko ama ruaa ’diyisi, te mi nga ama eri ra, mi nga ama pa.

10Te curu’do, mi ndre, anzi Amoni piyini Moabu pie, oni Seirini ’diyi be, mini a’ile Israelini fizu angu yinia ku, yini ndra efuria angu Misiriniasi, yini ndra yi ojazu ’ba nde ma kalaasi awizu yi ma dri jazu ku ’diyi-

11mi ndre, of eta yini ama ofezu, yini emuzu ama o’bezu amve awita mini, mini fele ama dri awurusoruri ma aliasi’di.

12Mungu amaniri la, mi ngani yi ma e’yo li ku ya? A’disiku okpo amani funi dri a’di ’dizu ’ba ongulumuru amboru emupi ama vu ’diyi be ku. Te ama nini ama ma ’ye ngoni yari ku, te ama mile amani ’ba mi vu.

13De Yuda oso pa dria Yehova ma drilia, anzi nyiri nyiri yini piyi, oku yini pie, anzi yini pie.

14Etu ndesi Orindi Yehovani esi Yahazieli Zekaria mvi, Benaya mvi, Yeyeli mvi, Matania mvi, ’ba Levini anzi Asafuni ma eseliari ma dria, ’ba ongulumuru ’diyi ma eselia.

15Eri ’yo ra kini, Emi eri, emi ’ba Yudani dria, emi ’ba ovupi Yerusalemua ’diyi be, azini mi opi Yehosafati la: Yehova ’yo emi tia ’dini, Emi ma ru ku, emi asi ma oti ’ba ongulumuru amboru ’diyi ma e’yosi ku; a’disiku a’di ’diza ’diri eri emini yo, te Munguni.

16Drusi emi ma si a’di ’dizu ’ba nde be; emi ndre, de yi tu angu tuza Ziziaria; emi nga yi isu e’butini asiria, angu rokoru Yerueliari ma drilealeru.

17Emi ngani le a’di ’dizu omba ’diri alia aluni ku; emi ma oti emi ma so pa ci, emi ma ndre pata Yehovani emi be, emi Yuda Yerusalemu be ’diyi la! Emi ma ru ku, emi asi ma oti ku indi; drusi emi ma fu a’di ’dizu yi be, Yehova ovule emi be cirisi.

18Yehosafati nga i ma dri su va, nga i ma mile ’ba nyakua, Yuda dria ’ba ovupi Yerusalemua ’diyi be eco yi va Yehova ma drilia, Yehovani ’inzizu.

19Te ’ba Levini Kohati anzipiru azini Kora ma anzipiru ’diyi oso pa uru Yehova Mungu Israeliniri inzizu o’duko uru turisi.

20Yi enga o’bitisi drio drio, fu mu angu rokoru Tekoaniria; te yini furia, Yehosafati so pa ’yo ’dini, Emi eri ma, Yuda la, emi ’ba ovupi Yerusalemua ’diyi be! Emi ma a’i Yehova Mungu eminiri, ’dini emi nga pa so kirikiri ani; emi ma a’i e’yo nabi erini ’diyini, ’dini emi nga ’ye ani drilebaru beni.

21Eri ka nga e’yo ama ’ba nde ’diyi be ’bo, eri ope ’ba ngapi ongo ngopi Yehova dri, ngapi eri inzipi rua ndriza e’yo alatararurinisi, yini muria ’ba ongulumuru ma drilia ’diyi, ’yozu kini, Emi ma fe awa’difo Yehova dri, yiki erinirini ovule ’dani ’danirisi.

22Azini yi ka e’do ongo ngozu, azini inzita inzizu ’bo, Yehova ’ba ’ba ’ba mbapi ’diyi anzi Amonini ’diyi pi tezu, Moabu pie, oni Seiri be tezu indi, yi ’ba emupi a’di ’dizu Yuda be ’diyi; ofu yi ra.

23A’disiku anzi Amoni piyini Moabu be ’diyi oso pa a’di ’dizu ’ba oni Seiria ’diyi be, yi ofuzu dria, yi dri jazu yi ka de ’ba ovupi Seiria ’diyi ofuzu teketeke ’bo, ’ba dria alu alu nga vini agyini dri ja ceni ceni.

24Yuda ka eca jo izuru sile angu rokoni agei tezuria ’bo, yi ndre ’ba ongulumuru; mi ndre, yi ma avu o’de nyakua ’bo; ’ba yi ma eselia i papi rani aluni de yo.

25Yehosafati ’ba erini ’diyi be yini emuria yi ma afa o’duria, yi isu yi ma eselia lonyi pi karakarau, bongo pie, oni aje amborusi ’diyi pie, yini otrule yi ma ngulupiniru aga yini te ecole jile ’diyi ra. Yi ovu ’daa o’du na afa opaza ’diyi okuzu, afa ndeni ovule karakarau turisi.

26O’du surisi yi oku di yi e’bu Berakaniri ma alia, a’disiku ’daa yi inzi Yehovani; e’yo ’disi ’da angu nde ma ru E’bu Berakaniri’ kpere andru.

27Vilerisi yi atri di dri ra, ’ba Yudani dria alu alu ’ba Yerusalemua ’diyi be, Yehosafatini yi ma drilia, mviria dika Yerusalemua ayikosi, a’disiku Yehovani fele yini ovuzu ayikosi yini ari’ba yini ndelerisi.

28Yi emu Yerusalemua kpere jo Yehovaniri ma alia ongo ngozu, o’di zaburi ngozu ’diyisi, o’di pie, guka be.

29Uri Yehovaniri ’de suru nyaza angu ndu nduni ma dria dria, yini eriria ’dini kini Yehova ’di a’di ari’ba Israelini beni.

30’Dini angu Yehosafatini nyaleri ndri e’yere omba kokoru, Mungu erinirini eri dri ava liza fele kalanisi kururisi.

31Yehosafati nya opi Yuda ma drilia. Eri e’do opi nyazu de eli erini ovu ndra kali na drini towi, te eri ovu opiru Yerusalemua eli kali iri drini towi. Andri erini ma ru Azuba, Sili zi’i.

32Eri aci geri i ati Asani ma alia, eri ojani i kalaa ku; eri ’ye e’yo ovupi onyiru Yehova ma miliari ra.

33Te pari uruleru ’diyi, yi nzeni yi ku; azini vini ’ba ’bani nga yi asi Mungu yi a’bipiniri ma dria ku.

34Te ’yeta azini Yehosafatini ’yele, oko azini asizu ’diyi ma joloko, mi ndre, si yi adi nzeza Yehu Hanani mvini, yini ofile buku opi ’ba Israelini ’diyini ma aliari ma alia.

35E’yo ’diyi ma vutia Yehosafati opi Yudaari eci i Ahazia opi Israeliari be, agu nde ’diri ’ye ndra e’yo onzikanyaru tu,

36Eri eci i eri be teketeke; azini oguru sizu, ti pezu acizu Tarisisia, yi ede oguru nde ’diyi Ezioni-geberia.

37Etu ’dasi Eliezeri Dodavahu Maresaari mvi ondri e’yo Yehosafati ma ruaa, kini, Mini mi ecile Ahazia berisi, Yehova ja azi mini ’diyi ma dri ’bo. Oguru nde onyo di yi ra, ’dini yi econi di mu Tarisisia ku.

← Chapter 19 Jump to: Chapter 21 →