2 Chronicles 32

Lugbara (E’yo Siza Alatararu Munguniri BIBLIA)

← Chapter 31 Jump to: Chapter 33 →

1E’yo ’diyi ma vutia, azini yini ovuzu a’ita be ’diniri ma vutia indi, Senakeribu opi Asuriaari emu ra, fi Yuda ma alia, nga hema aso a’di ’dizu aku acele abi kaliru be ’diyi be, ega i nga yi bi iniru.

2Te Hezekiani ndreria kini Senakeribu emu di ’bo, azini ega a’di ’dizu Yerusalemu be,

3eri nga e’yo ama ’ba ’wara erini ’diyi pi be ’ba erini ombaouru ’diyi be, yi a’di egapi ega ovupi aku ma ageia amve ’diyi ma ti otuzu ci; yi ko azani ra.

4’Dini ’ba nga yi oku kakau, nga di yi a’di egapi ega ’diyi ma ti otu dria ci, yi ara nyiri rapi angu ma eselia agaduari be, ’yozu ani kini, Opi Asuriaa ’diyi ma emu yi isu ci a’disi ya?

5Eri imba i ma asi okporu abi ma pari ndra ’bani onyole vari sizu dria dika, eri si jo izu izu ’diyi pi uru aga ra, abi azini amveri be; ’ba Milo Daudi vile akuari okporu indio Eri ede afa ombani ’diyi pi gombere be ekpete,

6O’ba vini ’ba omba dri cepi ’diyi ’ba nde ma drilia, oku yi dria i vu ogogo pari walaru aku ma kalitilearia, ’yo yi tia e’yo onyiru asi omizani, kini,

7Emi ma ovu okporu asi agupisi, emi ma ovu urisi kani asi otiza be opi Asuriaarisi aluni ku; a’disiku ’ba ovupi ama beri eri okporu aga ’ba ovupi eri be ’diyi ra.

8Eri beri ’ba ndi ma drini; te ama beri Yehova Mungu amani, ngapi ama aza kopi, ngapi ama omba ’dipiniri’i. ’Ba nde ma asi mba e’yo Hezekia opi Yudaarini ’yole yi tia ’diyisi.

9Vutinia Senakeribu opi Asuriaari pe ati’ba ini ’diyi ma ti muzu Yerusalemua (isu de eri Lakisi ma drilia, asikari erini be dria), yi ma nga ani mu Hezekia opi Yudaari pi vu, Yuda dria ovupi angu Yerusa-lemua ’diyi be, ’yozu ani kini,

10Senakeribu opi Asuriaari ’yo ’dini, Emi ’ba emi asi a’du dria, emini ani a’di ’dizu kiri ’de Yerusalemu mani acele kururi ma alia ya?

11Hezekia imbani emi bile fezu emini odrazu abiri pisi yi avijo be, ’yozu kini, Yehova Mungu amaniri nga ama opa opi Asuriaari ma driasini, ku ya?

12’Di bani Hezekia pari erini uruleru ’diyi pi wupi ra, pari edeta edezu eri vile ’diyi pie, e’yo azipi Yuda pi ma tia Yerusalemu be, kini, Emi ma inzi pari edeta edezu aluri ma drilia a’dule, azini drinia emi ma eve obiese-ri’i ku ya?

13Emi nini nga afa mani ’yele ma a’bipi be ’ba angu drisi dria ’diyi vuri kiri ku ya? Mungu suru ndu ndu ovupi angu ndu ndu ma alia ’diyini eco ndra angu yini opa ma driasi ra ya?

14Mungu ngoni ngori Mungu dria suru ndu ndu ma a’bipini ezale teketeke ’bo ’diyini ma eselia, eco ndra ’ba erini opazaru ma driasi ya, ’dini Mungu eminiri eco kani bani emi opa ma driasi ranini ya?

15E’yo ’disi emi fe di Hezekiani rizu emi jeizu ku emi bile imbazu ’dinile, emi ma a’i eri ma e’yo ku, a’disiku Mungu suru azinini kani opi nyaza azinini econi ndra nga ’ba yini opa ma driasi aluni ku, opani ndra yi ma atipi ma driasi aluni ku indio Ka’dini Mungua eminiri nga emi opa ma driasi ngoni ngoni ya?

16Ati’ba erini ’diyi nga e’yo azini ’yo Yehova Mungu pi ma ru edezu ati’bo erini Hezekia be.

17Eri si vini waraga indi, Yehova Mungu Israeliniri o’dazu, e’yo erini onzozu ’dini, kini, Ekile Mungu suru angu ndu ndua ’diyini yini ndra nga ’ba yini opale ma driasi kurile, ’dinile alu indi Mungu Hezekianiri ngani vini ’ba ini opa ma driasi aluni ku indi.

18Yi otre o’duko urusi ’ba Yahudini ma tisi ’ba Yerusalemua ovupi abi kaliru ma dria uru ’diyi vu, uri mizu yi asia, yi ecandizu, ’dini yi ma pa aku beni.

19Yi ’yo Mungu Yerusalemuari ma e’yo ekile mungua ’ba nyakua ’diyini, ’ba ndini edele yi ma drisi ’diyile.

20’Dini opi Hezekia pi nabi Isaya Amozi mvi be, zi Mungu tia e’yo nde ’disi, wu ani kpere ’bua.

21Yehova nga ani malaika ma ti pe, malaika nde nga ’ba dria asi teza be okporu ’diyi pi ofu ’ba dri cepi ’diyi pie, ambo asikari ma drilia ’diyi pie dria, pari opi Asuriaarini hema asozuria. ’Dini eri atri di ani dri, mile be drinzaru, i vile angua. Te erini firia mungua ini ma joaria, ’ba ibipi efupi eri ma ngulupi ma ruaa ’diyi fu eri seisi ogogoruni.

22’Dini ani Yehova opa Hezekia pi ’ba ovupi Yerusalemua ’diyi be Senakeribu opi Asuriaari ma driasi ra, ’ba dria ma driasi indi, ri yi dri oce kala vusi dria.

23’Ba kakau eji afa feza Yehova dri Yerusalemua ra, eji vini afa aje ambosi ’diyi Hezekia opi Yudaari dri indi, ’dini ’ba di ru erini ani uru suru dria ma milia engazu ewu ’dasi kpere drile.

24Ewu nde ’dasi Hezekiani de azoru kpere erini draria, te eri zi Yehova tia, te Yehova nga ’yo eri be, nga eceta fe eri dri indi.

25Te Hezekia awini awa’difo omvi ekile aza koza erini a’ilerile ku, te asini enga afuru. E’yo ’disi adra ’de eri ma dria ra, azini Yuda pi ma dria Yerusalemu be.

26’Di ma aliarisi ti, Hezekia do i ma ngulupi e’yere afu eri ma asiarisi, eri’i ’ba ovupi Yerusalemua ’diyi be dria, ’dini adra Yehovani ’deni yi ma dria ewu Hezekia ngarerisi ku ani.

27Hezekia ovu ndra lonyi be amboru tu, ru inziza be drile drile; ede ndra i dri pari lonyi ta mbazu ’diyi, dahabu pi ta mbazu mele pie, oni aje ambosi ’diyi pie, afa aji be arikariru ’diyi pie, gombere pie, afazu onyiru suruti ndu ndu ’diyi pie dria;

28osi vini jo afa kapi ’diyi ta mbazu, anya pi, patiefi ma su pie, odu pie; osi jo anyapa esele ndu ndu dria ’diyini lazu, o’be vini lico kabilo piyi ma ta mbazu indi.

29Drinisi o’ba vini i dri aku piyi, anyapa nyiri ’diyi pie, anyapa ’wara ’diyi pie o’biru; a’disiku Munguni eri dri afa fele karakaraurisi.

30Hezekia nde ’diri ase yi raza Gihoniri ma yi geri uruleruri ma ti ci, yi nderi esezu geri kililirurisi aku Daudini ma kalaa etuni ’derialeruria. Hezekia ma azi dria drilebaru.

31Te ojio ’ba ’wara Babulonia ’diyini ti pele eri vu e’yo osuzaru i ’yepi angu nde ma aliari zizu tinia ’diyi ma e’yosi, Mungu ku eri ra, eri o’bizu ndrezu, ma ni ani e’yo dria ovupi eri ma asia ’diyi beni.

32Te e’yo Hezekiani ’yele ’diyi ma joloko, ’yeta onyiru erini ’yele ’diyi be, mi ndre, yi ovu sizaru e’yo ndreza nabi Isaya Amozi mviniri pi ma alia, buku opi Yudaa ’diyi pi ma e’yo sizu opi Israelini beri ma alia.

33Hezekia la i a’bipi be, sa eri ma avu pari tuzu uru Daudi anzipi ma nyadriaria; Yuda pi dria ’ba Yerusalemua ’diyi be fe eri dri inzita erini dra ngare. Mvi Manase nga di opi nya eri ma pariani.

← Chapter 31 Jump to: Chapter 33 →