2 Chronicles 11

Lugbara (E’yo Siza Alatararu Munguniri BIBLIA)

← Chapter 10 Jump to: Chapter 12 →

1Te Rehoboamu ka eca Yerusalemua, eri oku suru Yudaniri azini suru Benyamininiri, adaru ’ba opele ombani ’diyi alifu pale turu alu drini kali aro, a’di ’dizu Israeli be, opi nyaza omvizu dika Rehoboamu dri.

2Te e’yo Yehovani nga eca Semaya ’ba Munguniri vu, ’yozu kini:

3Mi ma ’yo e’yo Rehoboamu Sulemani mvi opi Yudani ma tia, azini ’ba Israelini dria ovupi Yuda pi ma alia Benyamini be ’diyi ma tia indi, kini,

4Yehova ’yo ’dini, Emi ma tu uru a’di ’dizu emi adripi be ku. ’Ba dria alu alu ma mvi jo yinia, jo yinia, a’disiku e’yo ’dori efu ma vu. ’Dini yi eri di e’yo Yehovani ’yole yi tiari ra, yi mvi ani ku muzu a’di ’dizu Yeroboamu be ja.

5Rehoboamu ovu di Yerusalemua, si aku okpo be angu agei tezu ’diyi Yuda ma alia.

6Eri nga aku si ’dini: Betelehemu pi, Etamu pi, Tekoa pi,

7Beti-zuri pi, Soko pi, Adulamu pi,

8Gatu pi, Maresa pi, Zifi pi,

9Adoraimu pi, Lakisi pi, Azeka pi,

10Zora pi, Aiyaloni pi, Hebironi pie dria, yi aku ovupi abi kaliru be Yudaa azini Benyaminia ’diyi.

11Si aku asikari ombani ’diyini ovuzu alenia ’diyi okporu tu, o’ba ’ba omba dri cepi ’diyi pi alenia, nyaka pie, odu pie, patiefi ma su pie dria.

12Aku dria alu alu ma alia o’ba gombere piyi aju be, ’ba aku nde ’diyi okporu tu. Yuda pi ovu erini Benyamini be.

13Atalau edeta edepi ’diyi pi ’ba Levini be ovupi suru Israelini dria ma alia ’diyi adri emu eri vu engazu angu yini ma alesi dria.

14A’disiku ’ba Levini ’diyi ku angu yini ovuzu alenia ’diyi, afa yini ovuzu yi be ’diyi be ra, yi emu Yudaa azini Yerusalemua, a’disiku Yeroboamu pi anzi erini be odro yini, kini yi ma nga azi atalauni Yehova dri ku,

15te ope i dri atalau azini pari: uruleru ’diyini, ndriata piyi kojaanzi erini yi ma wura edele ’diyi ma azi ngazu’i.

16’Ba ’diyi ma vutia, suru Israelini ma eselia dria, ’ba yi ma asi fepi Yehova Mungu Israeliniri ndruzu ’diyi emu Yerusalemua, edeta edezu Yehova Mungu yi ma a’bipini dri.

17’Dini yi nga di okpo fe opi nyaza Yudaniri dri, nga Rehoboamu Sulemani mvini ’ba ovuzu okporu eli na, a’disiku yi ad geri Daudi pini Sulemani be ’diyi ma alia eli na,

18Rehoboamu nga oku je, runi Mahalati’i, eri Yerimoti Daudi mvi ma zi, Abihaili Eliabu Yese mvi ma zi indi;

19oku nde ti agupianzi eri dri, Yeusi pi, Semaria pie, Zahamu be.

20Oku ’diri ma vutia eri nga vini Maaka Abisalomu zini je, oku nde ti eri dri Abiya pi, Atai pie, Ziza pie, Selomiti pie.

21Rehoboamu le oku Maaka Abisalomu ziruri tu aga oku azini erini ’diyi dria, oku ati’baru erini ’diyi be ra (te je ndra i dri oku mudri drini aro, azini oku ati’baru ’diyi vini kali azia, ti agupianzi kali iri drini aro, ezoanzi kali azia);

22te Rehoboamu nga Abiya Maaka mvini pe ovuzu amboru, ada ovuzu opiru adripi erini ma eselia, a’disiku ega i asia eri ’bazu opiru.

23Azini eri ’ye onduasi, nga agupianzi ini ’diyi ma azi ere angu Yuda pini ma eselia Benyamini be dria, yi o’bazu aku abi kaliru be ’diyi ma alia dria; fe di yi dri nyaka fudri ci, nda yi dri oku kakau indi.

← Chapter 10 Jump to: Chapter 12 →