2 Chronicles 14

Lugbara (E’yo Siza Alatararu Munguniri BIBLIA)

← Chapter 13 Jump to: Chapter 15 →

1’Dini indi Abiya mu la i a’bipi be, yi sa eri aku Daudiniria; mvi erini Asa nya opi eri ma pariani. O’du eri ngarerisi angu ndri omba kokoru eli mudri ’dipi.

2Asa ’ye e’yo onyiru azini kililiru Yehova Mungu eriniri ma milia.

3A’disiku onze pari edeta edezu mungua andini dri ’diyi pi pari uruleru ’diyi be ra, onyo oni inzile inzi ’diyi, ga; wura Aseriru ’diyi va,

4eri azi Yudani Yehova Mungu yi ma a’bipiniri ndazu, azita ’yezu e’yo azile ’diyi be.

5Azini indi onze pari uruleru ’diyi aku ambo ambo dria Yudaa ’diyi ma aliasi, wura etuni ’bani edele inzile inzi ’diyi be. Suru opi nyaza eriniri ndri omba kokoru eri ma drilia.

6Eri si aku ambo ambo acele abi kalisi ’divi angu Yudania anguni ndrile omba kokoru, a’dini ovule ewu ’dasi yorisi, a’disiku Yehovani eri dri ava lizani felenirisi.

7Te eri ’yo Yuda ma tia ’dini, Ama ma si aku ’diyi fo! Ama ma si abi kaliru yi ma ageia ci, jo izu ’diyi pi, kalitile pie, katala pie dria; angu nde ovu nga kiri ama drilia, amani Yehova Mungu amaniri ndalerisi; te ama nda eri ra, eri fe di ani ama dri ava liza kala dria vusi ’bo ’Dini yi si ra, yi ’ye drilebaru indi.

8Asa ovu ndra asikari ongulumuru gombere ’dupi aju be ’diyi be engazu angu Yudania, yi alifu turu na; te engazu Benyaminia asikari gombere supi osu nzopi ’diyi ma kalafe alifu turu iri drini kali aro. ’Ba ’diyi dria yi ovu ’ba okporu asi teza be ’diyi.

9Te Zera ’ba Etiopiaari efu ndra a’di ’dizu yi be, asikari ongulumuru erini ma kalafe alifu pale alifu, gari ombani ’diyi turu na; eri eca Maresaa.

10Te Asa nga fu dri fuzu eri be, yi oti yi omba ’ dizu e’bu Zefatani ma alia Maresaa.

11Asa wu di Yehova Mungu eriniri vu, ’yo kini, Yehova la, ’ba azini ’ba aza kopini ’yo, pe lu mi’i, ’ba okpo beri pi ma eselia ’ba okpo kokoruri be. Mi eto ama fo, Yehova Mungu amaniri la! A’disiku amani ama atile mi ma ruaarisi, azini ru minirisi ama eca omba ’bazu ’ba o’biru ’diyi be ’do. Yehova la, mi Mungu amaniri; mi ku ’ba ma aga mi ku fo!

12’Dini Yehova ofu ’ba Etiopiaa ’diyi Asa pi ma drilia Yuda be ra; ’ba Etiopiaa ’diyi apa ra.

13Te Asa ’ba ovupi eri be ’diyi pie dro yi ma vuti kpere Geraria; ’ba Etiopiaa ’diyi odra karakarau, ’dini yi econi ani pa sozaru okpo isuzu dika ku, a’disiku yini ovule dri jazaru Yehova ma milia asikari erini ongulumuru ’diyi berisi. ’Ba Yudani ’diyi o’du afa opaza karakarau.

14Yi eza aku ambo ambo dria Gerari ma ageia, a’disiku uri Yehovani ruzuri eca yi ma dria ’bo. Opa ani aku ’diyi dria ma afa ra, a’disiku afa opaza ndra aku nde ’diyi ma alia karakarau tu.

15Anzu lico tini ’diyi indi, opa kabilo o’biru, ngamia pie, nga di emvi Yerusalemua ndo.

← Chapter 13 Jump to: Chapter 15 →