2 Chronicles 13

Lugbara (E’yo Siza Alatararu Munguniri BIBLIA)

← Chapter 12 Jump to: Chapter 14 →

1Abiya e’do ini opi nyazu Yuda ’ ma drilia eli mudri drini aro opi Yeroboammuni opi nyazurisi.

2Nya opi Yerusalemuoua eli na. Andri ma ru Mikaya’i, eri Urieli ’ba Gibeaari ma zi.

3Te omba ovu ndra indi

4Abiya pi ma eselia Yeroboamu be. Abiya e’do omba, tualu asikari ongulumuru be ’ba ombaru asi teza be ’diyi alifu turu su, yi ’ba opele ope ’diyi;, Yeroboamu oti vini ’ba ombani indi a’di ’dizu eri be, ’ba alifu turu aro, ’ba opele ope okporu asi teza be ’diyi, Abiya so pa ani oni Zemaraimu ma dria, ovupi angu oni be Efiraimuniri ma aliari, ’yo kini, Emi eri ma o’duko, Yeroboamu la, emi ’ba i Israelini dria be!

5Eri onyiru emi ma ni kini Yehova Mungu ’ba Israeliniri fe ndra opi nyaza Israeli ma driliari Daudi dri ’dani ’dani, ada, feni eri eri dri anzipi be aziza a’inirisi i ku ya?

6Te Yeroboamu Nebati mvi, ati’bo Sulemani Daudi mviniri, enga uru, mbuzu opi ini ma ruaa ma amve;

7re ’ba sarusaru ovupi anzi Belialiniru ’diyi oku yi eri vu, yi ’bazu okporu a’di ’dizu Rehoboamu Sulemani mvi be, de isu Rehoboamuni ovuria nga mvaru azini asi be menemeneru, econi erini yi ogazaru ku.

8Te curu’do emi le opi nyaza Yehovani, erini fele anzi Daudini ma driari ogazu ’di; emi ’ba o’biru, emi eji vini emi be kojaanzi Yeroboamuni edele melesi emi ma munguru ’diyi indi.

9Emi droni ’ba edeta edepi Yehovani Aroni anzipiru ’diyi pi ’ba Levini ’diyi be ku ya? Emi openi di ani emi dri ’ba azini edeta edepi ’diyiru, juruni ’yele angu azini ma aliarile ku ya? Ka’dini curu’do ’ba lepi emupi i ngulupi ’bapi alaruri ka emu monio aluduru pi be kabiloago aziri be, agu nde eco ovu ani ’ba edeta edepi adrou ovupi munguru kuriniriru!

10Te ama’iruni, Yehova ovu Mungu amani, ama kuni eri ku. Ama ovu ’ba atalauru edeta edepi azi ngapi Yehova dri ’diyi be, yi Aroni anzipi, ’ba Levini be, azi yini ma alia ’dani.

11Yi edeta vezaru ’diyi ve Yehova dri obiese arikariruri be o’biti vusi azini ondre vusi, azini alu indi yi oti mikate ecetaruri mesa alaruri ma dria, ede vini talapati edele melesiri pie, tala erini be, dizu ondre vusi ondre vusi; amani azi Yehova Mungu amanirini azileri ma ta mbalerisi, te emi’i, emi ku eri ’bo.

12Azini emi ndre, Mungu ovu ama be indi ama drilia, te kuhani erini yi ovu aliguka be, cere ombani ’bezu emi dria. Emi anzi Israelini la, emi ma ku a’di ’dizu Yehova Mungu emi a’bipiniri be ja fo! A’disiku e’yo emini ngani ovu drilebaru ku.

13Te Yeroboamu fe ’ba ’ba mbapi ’diyini muzu yi ma ngukua; ’dini yi ovu Yuda ma drilialeru, azini ’ba ’ba mbapi nde ’diyi ovu yi ma ngukualeru.

14Te Yuda ka di angu lu, mi ndre, omba ovu yi ma drilialeru ci, yi ma ngukualeru ci indi; yi wu ani Yehova vu, te kuhani nga guka vu ra.

15’Ba Yudani ’diyi ’be cere; te ’ba Yudani ’diyini cere ’beria eri nga eca ’dini, Mungu ofu Yeroboamuni Israeli be dria, Abiya pi ma drilia Yuda be.

16Anzi Israelini ’diyi nga di apa Yuda ma driliarisi ra, Mungu fe di yi ani yi dria.

17Abiya pi ’ba erini ’diyi be ja di yi ma dri dri jaza amborusi; dini ofu ’ba ombani opele ope Israeli ma eselia ’diyi alifu turu towi.

18’Dini anzi Israelini ’diyi ovu di ani ndezaru o’du nde ’dasi, anzi Yudani nga di agani, yini yi atile Yehova Mungu yi ma a’bipini ma ruaarisi.

19Abiya dro Yeroboamu ma vuti ra, opa aku ambo ambo azini ’diyi eri vu, Beteli pi aku erini ’diyi be, Yesana pi aku erini ’diyi be, Efironi pi aku erini ’diyi be.

20Te Yeroboamu isuni okpo dika o’du Abiya ngarerisi aluni ku; te vutinia Yehova co eri ra, dra ra.

21Te Abiya nga eca ovuzu okpo be, oje oku i dri mudri drini su, ti agupianzi kali iri drini iri, ezoanzi mudri drini azia.

22Te e’yo azini Abiyani ’yele ’diyi ma joloko, geri erini pie, e’yo erini ’yole ’diyi be, si yi buku ojioru nabi Idoniri ma alia.

← Chapter 12 Jump to: Chapter 14 →