2 Chronicles 24

Lugbara (E’yo Siza Alatararu Munguniri BIBLIA)

← Chapter 23 Jump to: Chapter 25 →

1Yoasini de eli be aziri erini e’dozu opi nyazurisi, nya opi eli kali su Yerusalemua. Andri erini ma ru Zibia, Beeri-sebaari’i,

2Te Yoasi ’ye e’yo ovupi Yehova ma milia ’yekeri ewu atalau Yehoyadani ovuzu indirisi dria.

3Yehoyada je eri dri oku iri, eri nga ani agupianzi ti ezoanzi be.

4E’yo nga di eca ’di ma vutia ’dini, Yoasi ega i asia jo Yehovani edezu dika.

5Eri nga atalau oku ’ba Levini be, nga ’yo yi tia kini, Emi ma fu mu aku ambo ambo Yudani ’diyi ma alia, emi ma oku silingi ’ba Israelini vusi dria, ngazu jo Mungu eminirini edezu eli vusi eli vusi; emi ma ’ba emi asi e’yo nde ’yezu mbele. Te ’ba Levini ’yeni e’yo nde mbele ku.

6Opi nga di Yehoyada yi ma driliari omve, nga ’yo tinia kini, Mi etuni ’ba Levini musoro Musa ati’bo Yehovanirini azile ’ba ongulumuru Israelini ’diyi be hema e’yo eti nzezanisiri ejizu engazu Yuda pia Yerusalemu be ku a’disi ya?

7A’disiku Atalia oku onziri ma anzipi anzu jo Yehovaniri ’bo, ofe vini afa dria ’bani ’bale alaru Yehova vile joa ’ di yi Baali dri indi.

8’Dini opi nga e’yo azi, yi nga sanduku ede, nga eri ’ba jo Yehovaniri ma kalitilea amve.

9Yi nga e’yo eku Yuda pi ma eselia Yerusalemu be kini ’ba ma eji Yehova dri musoro ndra Musa ati’bo Mungunirini ’bale ’ba Israelini ma dria angu roko driari.

10’Ba ’wara ’diyi dria ovu di ayikosi ’ba nde ’diyi be dria, nga di eji ra, nga o’be sanduku ma alia kpere yini e’yo nde deria ’boria.

11Te eri ovu ’dini, etu ’ba Levini sanduku ejizu ’ba azi ngapi opi vile joa ’diyi vu, yi ka ndre silingi ovu fudri ci tu, ’ba waraga opini sipiri pi ’ba atalau amborurini ayuleri be nga emu ra, nga afa feza oku sanduku ma aliasi dria ra, nga yi o’du, nga di sanduku nde ji eri ma paria dika. Yi ’ye o’du vusi o’du vusi ’dini, yi oku silingi kakau aga ra.

12Te opi pi Yehoyada be nga silingi nde fe ’ba Yehova vile jo ma azi ’yepi ’diyi dri yi nga ani ’ba oni bipi ’diyi pi ofe onduou bau fapi ’diyi be, ngazu jo Yehovani edezu, ofe vini onduou aya pi ’dipi mola be ’diyi indi, jo Yehovani edezu.

13’Dini ’ba azi ngapi ’diyi nga di azi ra, yi de azi nde kililiru teketeke, yi si jo Munguniri eri ma paria bebe okorile okporu.

14Te yini eri deria ’boria, yi eji di silingi ma joloko acepiri opi pi ma drilia Yehoyada be, silingi ndesi yi nga afazu ede jo Yehovani dri ani, ada afazu yini azi pi ’yezu, afa ofezu ’diyi, kabile piyi, afazu edele melesi ’diyi pie, dahabusi ’diyi pie. Yi ede edeta vezaru ’diyi Yehova vile joa etuzu etuzu ewu Yehoyada ngarerisi dria.

15Te Yehoyada eca di mbazauru eli be tre, dra di ra; erini dra ngare de elini ca turu alu drini kali na ’bo.

16’Ba sa avuniri aku Daudiniria, pari yini ’ba opiru ’diyi sazoria, erini e’yo onyiru tu ’yele Israeli ma alia, Mungu pi vu eri vile jori berisi.

17Yehoyadani drazu ’bori ma vutia, ’ba ’wara Yudaa ’diyi emu yi o’bu va opini inzizu; opi nga di e’yo yini eri ra.

18Yi nga jo Yehova Mungu yi ma a’bipinirini ku ra, yi ri wura Aseriru ’diyi piyi inzi’i wura toko ’diyi be. Adra ’de ani Yuda pi ma dria Yerusalemu be pila e’yo onzi ’dirini yi ndelerisi.

19Te kiri ti, eri pe ’ba nabiru ’diyi ma ti yi vu, ngazu yi ejizu dika Yehova vu; yi nze e’yo yi ma dria, te ti, yi coni yi ma bile erizu ku.

20Orindi Munguni esi Zekaria atalau Yehoyada mvi ma dria; eri nga pa so ’ba ma drilia, nga ’yo ani yi tia kini, Mungu ’yo ’dini, Emi azita Yehovani eza, emini ani ecozu drileba isuzu ku a’disi ya? Emini Yehovani kule ’borisi, eri ku vini alu emi ’bo indi.

21Te yi eci yi ti e’yo otuzu eri ma ruaa, nga eri o’be onisi ra, azita opini azilerisi, jo Yehovani ma irii ma alia.

22’Dini opi Yoasi egani di asi ndriza ati Yehoyadani ndra ’yele eri driri aluni ku, te fu eri ma mvini ra. Erini draria ’yo ’dini, Yehova ma lu e’yo ’diri ma dria, ma a’i ariotini fa.

23Te e’yo nga eca ’dini, elini i dezu ’borisi, asikari ongulumuru ’ba Suriaa ’diyini nga etu a’di ’dizu Yoasi be. Yi emu di Yuda pi vu Yerusalemu be, yi ofu ’ba ’wara ’ba dri ja ’diyi ’ba eseliasi dria ra, yi li afa yini opale ’ba nde ma driasi ’diyi, ji dria opi vu Damasikia.

24Te de isu asikari ’ba Suriaa ’diyini emu lamiru toko, te Yehova fe asikari ongulumuru karakarau tu yi ma dria ra, a’disiku yini Yehova Mungu ma a’bipiniri kule ’borisi. ’Dini yi ’ye di e’yo lileri Yoasi ma dria.

25Yini eri kuria ’borisi (isu de yi ku eri azo be ebiru okporu), ati’ba eri ma ngulupiri ’diyi eci yi ti e’yo otuzu eri ma ruaa, erini ari atalau Yehoyada ma anzipi ma ari adalerisi, yi fu eri gbolo erini ma dria, dra ra; yi nga eri ma avu sa aku Daudiniri ma alia, te sani eri pari ’ba opiru ’diyi osazuri ma alia ku.

26’Ba ndra e’yo otupi eri ma ruaa ’diyi yi ’di: Zabadi Simeati Amoni zaruri ma mvi pi, Yehozabadi Simiriti Moabu zaruri ma mvi be.

27Te agupianzi erini piyi ma e’yo, e’yo eceza ambo ambo eri ma dria ’diyi pie, e’yo erini jo Munguni sizu dikari pie, mi ndre, ’diyi dria ovu sizaru buku e’yo ’ba opiru ’diyini sizuri ma alia. Amazia eri ma mvi nga di opi nya eri ma pariani.

← Chapter 23 Jump to: Chapter 25 →