2 Chronicles 25

Lugbara (E’yo Siza Alatararu Munguniri BIBLIA)

← Chapter 24 Jump to: Chapter 26 →

1Amazia ma eli de kali iri drini towi erini e’dozu opi nyazuria, eri nya opi Yerusalemua eli kali iri drini oromi. Andri ma ru Yehoadani, Yerusalemuari’i.

2Eri ’ye e’yo onyiru Yehova ma milia, te asi kililirusi ku.

3Te e’yo nga di eca ’dini, opi erini ka okpo isu ’bo, eri nga ati’ba erini ndra ati opiruri fupi ’diyi ofu ra.

4Te ofuni anzi yini ku, te ’ye trotro ekile e’yo ovupi sizaru azita ma alia, buku Musani ma ajiarile, ekile Yehovani azilerile kini Atapi ma odra anzi ma e’yosi ku, kani vini alu indi anzi ma odra yi atipi ma e’yosi ’dini ku, te ’ba alu alu ma dra ezata i ma ngulupinisi.

5Azini alu indi Amazia nga Yuda oku dria tualu, nga yi oti ori’ba yi ma a’bipini ’diyi vusi, nga yi ’ba ambo asikari alifu alu ma drilia ’diyi pi ma palaa, ambo asikari turu alu drilia ’diyi be, ada Yuda pi Benyamini be dria. Eri nga yi ma kalafe Ja e’dozu ’ba capi eli be kali iri ’diyisi kpere tuzu drile, eri isu ’ba nde ma kalafe ovu alifu turu na ’ba opele ope ecopi mupi a’di ’dizu ra, ’ba nipi aju pi ’dupi gombere be ra ’diyi.

6Eri nga vini ’ba ombani asi teza be ’diyi omve engazu Israeli ma eselia ’ba alifu turu alu, ofe yi onzi dahaburu turu alurisi.

7Te ’ba Munguni azini nga emu vunia, ’yo tinia kini, Opi la, mi ma fe asikari ongulumuru Israelini ’diyi ma mu mi be indi ku, a’disiku Yehova ovuni ’ba Israelini, ada anzi Efiraimuni ’diyi be dria ku.

8Te mi ka le mu ra, mi asi ma te te, mi ma ovu di okporu a’di nde ma alia; Munguni nga mi ’be va mi juru ma drilia, a’disiku Mungu ovu okpo be ’ba aza kozu azini ’ba o’bezu va indi.

9Te Amazia nga ’yo ’ba Munguniri ma tia kini, Te ama nga curu’do a’di ’ye onzi teka turu alu mani fele ’ba ongulumuru Israelini ’diyi dri ’bori ma e’yosi ya? ’Ba Munguni nga e’yo omvi ’yo tinia kini, Yehova eco mi dri afa azini fe, ’diyi agazu tu.

10Amazia nga di esele co asikari ongulumuru ecapi eri vu engapi Efiraimua ’diyi be, nga yi dri geri fe mvizu yi vile angua. E’yo ’disi aoko nya yi tu ’ba Yudani’diyi ma ruaa, yi nga dri atri akua asi okasi tu.

11Te Amazia nga i asi imba ra, nga ’ba eri vile ’diyi ma dri ce muzu a’bu A’iniria, nga anzi Seirini ’diyi ofu alifu mudri.

12Anzi Yudani nga ’ba alifu mudri azini ’diyi ji idriru, nga yi ji oni ma dria uru, nga yi o’be oni nde driarisi va, nga yi onyo kulukulu dria.

13Te asikari ongulumuru Amaziani ti pele vile, ma mu i be ombaa ku ’dayi, nga ’de aku Yudani ’diyi ma dria engazu Samariaa kpere cazu Beti-horonia, nga ’ba nde ofu alifu na, nga afa opa fudri ci tu.

14Te eri nga di eca ’dini, Amaziani emviria erini ibizu engazu ’ba Edomuni ’diyi ofuzurisi, eri nga anzi Seirini ma wura inzile inzi ’diyi cii, nga yi o’ba ovuzu Mungu i ngulupiniru, nga i ma ngulupi o’bu yi ma drilia, nga obiese eve yi dri.

15E’yo ’disi Yehova ovu adrasi Amazia vu, eri nga nabi ma ti pe ani vunia, ’yozu tinia kini, Mi nda mungua ’ba ndeni, mungua ’ba yini opapi mi driasi ku ’diyi vu a’disi ya?

16Eri nga eca ’dini, erini e’yo ’yoria eri be opi nga ’yo eri tia kini, Ama ’ba mi ovuzu ’ba e’yo amapi opi dri ’diyi ma aziro ya? Mi adri ciri! Mi ole ’ba ma fu mi la’disi ya? Te nabi nga di ovu ciri ani, nga ’yo tinia, Ma ni ra Mungu li e’yo mi dri jazu ’bo, a’disiku mini e’yo ’dinileri ’yelerisi, mini e’yo amaza mani erile kurisi.

17Vilerisi Amazia opi Yudaari nga e’yo amaza ama ra, nga ojiou ti pe ani Yehoahazi Yehu mvi ma mvi Yoasi opi Israelini vu, ’yozu tinia kini, Mi emu, ama one ama milia milia andretisi.

18Te Yoasi opi Israelini nga ’ba ma ti pe Amazia opi Yudaari vu, ’yozu kini, Ocakai Lebanoniari pe ojio ma ti mario pati Lebanoniari vu, ’yozu kini, Mi fe mi zini ma mvi dri okuru; te nguru Lebanoniari aga ’dale, otu ocakai nderi pasi.

19Mi ’yo, Mi ne, ma ofu Edomu yi ’bo; mi ani mi enya asi afusi mi ipizu ’di. Mi ma te angu minia ’daa; mi le fi e’yo ’diri ma alia aka apadriru, candi isuzu mini ngazu e’dezu Yuda be tualua’disi ya?

20Te Amazia leni e’yo eri ku; a’disiku e’yo nderini engale vurisi, ’dini eri ma fe yi ari’ba Yini ma dria beni, yini mungua Edomuni ndalerisi.

21’Dini Yoasi opi Israelini tu mu uru; yi one yi milia milia Amazia opi Yudaari be Beti-semesi aku Yudaaria.

22Te Israeli aga Yuda ra, yi dria alu alu nzu hema yinia ani.

23Te Yoasi opi Israeliniri bi di Yoasi Yehoahazi mvi ma mvi Amazia opi Yudaari Betisemesia ra, nga eri eji Yerusalemua asu abi kaliru Yerusalemuari va engazu kalitile Efiraimuniria cazu kalitile kalaaria, wuale turu su ’dipi.

24Eri wu mele pi, dahabu pie, afazu dria jo Munguni ma alia Obedi-edomu be ’diyi pie, lonyi opi vile joari pie, ’ba obile aruru ’diyi pie, mvi Yi be Samariaa.

25Amazia Yoasi mvi opi Yudaari ovu idriru eli mudri drini towi Yoasi Yehoahazi mvi opi ’ba Israelinirini drazuri ma vutia.

26Te ’yeta azini dria Amaziani ’yele, oko azini vile ’diyi, yi sini yi buku opi Yudaa ’diyi pi ma e’yo sizu Israelini beri ma alia ku ya?

27Engazu etu ndra Amaziani i ojazu vile Yehova ma vuti bizu kurisi, yi eci yi ti e’yo otuzu eri ma, ruaa Yerusalemua, eri apa Lakisia ani. Te yi pe ’ba ti eri vutisi Lakisia, fu di eri ’daa.

28Yi eji avuni akanya ma dria, sa eri a’bipi be tualu aku Yudaari ma alia.

← Chapter 24 Jump to: Chapter 26 →