Deuteronomy 17

Lugbara (E’yo Siza Alatararu Munguniri BIBLIA)

← Chapter 16 Jump to: Chapter 18 →

1Mi ma ede edetaru Yehova Mungu miniri dri ti kani kabinyebileko be, kani afa onzi azini be yi ruaari aluni ku; a’disiku eri ovu afa Yehova Mungu minirini ngule onziri’i.

2Mi ma eselia aku Yehova Mungu minirini fele mi dri ’diyi ma azi alu ma alia, yi ka agupi kani oku e’yo ovupi onzi Yehova Mungu miniri ma miliari ’yepiri isu, erini aziza erini ezalerisi,

3eri ka mu azi ngazu adrou dri yi inzizu, ka etu inzi, kani mbani, kani ’bi’bio ongulumu ’bua ’diyi, mani e’yoni azile ma’i kuri,

4’ba azini ka ’yo mi tia, mi ka eri ra; ka’dini mi ma nda e’yo nderi asi driasi, te mi ne, e’yo ngule onzi ’dini ’diri ka i ’ye Israeli eselia adada,

5ka’dini mi ma ofu agupi nde kani oku nde e’yo onzi ’diri ’yepi rari kalitile mini ria, mi ma o’be agupi nde kani oku nderi onisi kai.

6Ma fu ’ba yini ngale fuleri ’ba iri kani ’ba na ’diyini e’yo eti nzelerisi; te ma fu eri e’yo eti ’ba aluni nzelerisi ku.

7’Ba e’yo eti nzepi ’diyi ma ’ba yi dri oko eri fuzuni, vutinia ’ba dria ma dri. ’Dini mi ma nze e’yo onzi emi eseliasi.

8E’yo azini okporu ka efu, ka mi nde lizaru ra, kani ari pini ari be, e’yo eti nzeza pini e’yo eti nzeza be, acoa pini acoa be, e’yo efupi awataru mi vile akua ’diyi, ka’dini mi ma enga di, ma mu uru pari Yehova Mungu minirini ngale peleria;

9mi ma mu ’ba Levini kuhaniru ’diyi pi vu, ’ba e’yo lipi ewu nderisiri pie, mi ma zi yi tia, yi nga ani e’yo lizaniri ece mi dri.

10Mi ma ’ye ekile e’yo liza yini ngale ecele mi dri pari Yehovani ngale peleriarile; te mi ma ’ba mi asi e’yo dria ’yezu ekile yini mi imbalerile;

11mi ma ’ye ekile azita yini imbale mi dririle, azini ekile e’yo liza yini olule mi tiarile; mi ma oja mi dri ndia kani dri ejia e’yo liza yini ecele mi driri kuzu ku.

12’Ba ’yepi ambosi, kuhani pa sopi azi ngapi ’daa Yehova Mungu miniri ma driliari pi ma ti eripi ’ba e’yo lipiri be kuri, agu nderi ma dra ra; mi ma nze ani e’yo onzi Israeli ma eseliasi ra.

13’Ba dria ma eri, ma ru ani, ma ’ye ambosi dika ku.

14Mi ka nga fi angu Yehova Mungu minirini fele mi driri ma alia eri ’duzu miniru, mi ka nga ovu alenia ’bo, mi ka nga ’yo kini, Ma nga opi ’ba ma drilia ekile suru dria ma ageia ’diyini ’balerile;

15mi ma ’ba opiru mi drilia ’ba Yehova Mungu minirini ngale peleri’i. Mi ma ’ba ’ba alu adripi mini ’diyi ma eseliari mi drilia opiru’i; mi econi ’ba jururu ovupi mi adripiru kuri ’bazaru mi drilia ku.

16Te bani eri ma fe akanyani ezuzu iniru karakarau ku, ma fe vini ’ba ma mvi Misiria, erini ngazu fezu ani akanyani ezuzu kakau ’dini ku; a’disiku Yehova ’yo emi tia ’bo kini, Emi ngani asi mvi geri ’daasi dika ku.

17Eri ma wu i dri oku tre ku indi, asini kazu ojazu kalaa ku; eri ma fe vini dahabu pini ezuzu i dri mele be ’dini ku.

18Eri nga eca ’dini, eri ka nga ri oguna ini opiniri ma dria, eri nga azita ’dori ma siza aziniri si i dri buku ma alia, engazu azita ovupi ’ba Levini kuhaniru ’diyi ma driliari ma alia;

19eri ma ovu eri be ’dani, eri ma la buku ’diri o’du erini ovuzu idrirurisi dria, eri ma oni ani Yehova Mungu ini ruzu, azita ’diyi pi ma e’yo ta mbazu e’yo aziza ’diyi be dria, yi ’yezu;

20asi erini kazu engazu uru afusi adripi erini ’diyi ma drilia ku, eri kazu vini i ojazu dri ndia kani dri ejia azita nderi kuzu ku indi; ’dini eri ma fe ewu erini opi nyazuri ma ovu izu, eri’i anzipi be, Israeli ma eselia.

← Chapter 16 Jump to: Chapter 18 →