Deuteronomy 7

Lugbara (E’yo Siza Alatararu Munguniri BIBLIA)

← Chapter 6 Jump to: Chapter 8 →

1Yehova Mungu miniri ka nga mi ofi angu mini muzu vunia eri ’duzu miniruri ma aliaria, ka nga suru kakau onze o’be mi driliasi amve, yi suru aziri ovupi amboru azini okporu mi agapi ra ’diyi, ’ba Hitini ’diyi pi, ’ba Girigasini ’diyi pie, ’ba Amorini ’diyi pie, ’ba Kananini ’diyi pie, ’ba Perizini ’diyi pie, ’ba Hivini ’diyi pie, ’ba Yebusini ’diyi pie dria,

2Yehova Mungu mini ka nga yi fe mi dri mi drilia, mini yi ofuzu; etu nderisi mi ma ja yi dri teketeke; mi ma azi aziza yi be aluni ku, ma ece yi dri yiki aluni ku indi.

3Emi ma je emi yi be emi eselia ku, mi fe mi zini mva erini dri ku, ma je vini eri ma zini mi mvi dri ku indi.

4A’disiku yi nga mi mvini oja kuzu ma vuti bizu ja, yini ani azi ngazu adrou azini ’diyi dri beni; ka’dini aoko Yehovanini nga di emi ruaa, erini ani mi dri jazu mbeleru,

5Te emi ma ’ye yi ’dini: emi ma asu pari yini edeta edezu ’diyi va, ma onyo pati inzile inzi i’dile piriru yini ’diyi nyingiriki, ma oga wura Aseraru yini ’diyi va, ma eve wura opale inzile inzi yini ’diyi acisi,

6A’disiku mi ovu suru alatararu Yehova Mungu miniri driri’i; Yehova Mungu miniri pe mi suru dria ovupi nyakua ’diyi ma eselia, ovuzu suru i ma ngulupiniri.

7Yehova ’bani ndra i ma ale emi vu, peni ndra emi emini ovule kakau suru azi ’diyi agazu dria rarisi ku, a’disiku emi ovu were tu suru dria ma eselia;

8te Yehova ofu ndra emi dri okporu turisi, eri onze ndra emi jo ati’baniasi, Farau opi Misiriari ma driarisi, erini emi lelerisi, azini erini lele oyo erini ndra sole emi a’bipi tiari ma ta mbalerisi.

9E’yo ’disi mi ma ni Yehova Mungu miniri eri Mungu’i, Mungu e’yo ada be aziza ini ta mbapi, ovupi yiki aleruri be ’dani, ’ba eri lepi azita erini ma ta mbapi ’diyi vu, cazu kpere a’bianzi alifu alifu ’diyi vuri’i,

10te eri ’ba eri ngupi onzi’diyi ofe va yi milia ’dia, yi dri jazu; eri ngani ’ba eri ngupi onziri ku inzasi ku, te eri nga eri ofe va eri milia ’dia.

11E’yo ’disi mi ma mba azita pi ma ta, e’yo aziza ’diyi pie, e’yo liza ’diyi pie, mani azile mi tia o’du andru ’dorisi ’diyi.

12Te eri nga eca ’dini, emini bile cole e’yo liza ’diyi erizu, yi ma ta mbazu ’yezu ani rarisi, Yehova Mungu miniri nga aziza erini pi ma ta mba mi be, yiki aleruri be, erini oyoni sole mi a’bipi driri’i;

13eri nga mi le avasi, nga asi ndriza fe mi dri, nga fe mini ezuzu karakarau; eri nga vini asi ndriza fe ori mini ’diyi ma dria, azini afa kaza amvu mi vilerini ma dria, anya mini pi ma dria, patiefi su o’diru miniri pie, odu mini pie, ti mini ezupi ’diyi pie, anyapa mini nyiri ’diyi ma anzi pie, angu erini ndra oyoni sole mi a’bipi dri fezu mi driri ma alia.

14Mi nga asi ndriza isu suru azini ’diyi agazu dria ra agupi kani oku ngapi ovupi emi eselia ondoruni yo, kani anyapa emini ma eselia ti.

15Yehovani nga azo nze mi vusi dria; eri ngani azo onzi Misiria mini ndra nile ’diyi ma azi ’ba mi dria aluni ku, te eri nga yi o’ba ’ba dria mi ngupi onzi i ’diyi ma dria.

16Mi nga suru dria Yehova Mungu minirini ngale fele mi dri ’diyi dri ja ra, mile mini ma ovu yikisi yi vu ku; mi ma nga vini azi adrou yini ’diyi dri ku, a’disiku i ’yezu ’diniri nga ovu mi dri awu mi mbazurile.

17Mi ka ’yo mi asia, Suru ’diyi kakau aga ma ra ma eco yi drozu angu yini nyazu ngoni ngoni ya?

18mi ma ovu urisi yi ma e’yosi ku, te mi ma ega ’dani e’yo Yehova Mungu minirini ’yele Farau pi vu angu dria Misiriari beri,

19azini o’bita amboru mini ndrele mi milesi ’diyi pi ma e’yo, eceta pie, e’yo osutaru ’diyi pie, dri okporuri pie, wu ejuzari pie, Yehova Mungu minirini mi ofuzu ani amve ’diyi; Yehova Mungu miniri nga ’ye ’dinile suru dria mini ’yele urisi yi ma e’yosi ’diyi vu ra.

20Yehova Mungu miniri nga vini dirili ma ti ope yi eselia, cazu ’ba acepi yi ozipi misi, diyini dri jazu mi driliasiria.

21Mi ma ovu urisi yi ma e’yosi ku; a’disiku Yehova Mungu miniri ovu mi eselia, eri Mungu ambo uriuriruri’i.

22Yehova Mungu miniri nga suru ’diyi o’be amve mi drilia e’yere e’yere; mi econi yi dri jazu teketeke mbelekociciru ku, nguru asea ’diyi ka muzu ezuzu mi vuni ku.

23Te Yehova Mungu miniri nga yi fe mi dri mi drilia, nga yi ecandi candi amborusi, cazu yini dri jazuria.

24Eri nga vini opi yini ’diyi fe mi dria, mi nga fe yi ma runi dri jazu ’bu ma etiasi; ’ba aluni ngani eco pa sozaru mi drilia ku, cazu mini yi dri jazu ’boria.

25Emi nga adrou yini ma wura opale inzizaru ’diyi eve acisi; mi ma ’ba li dahabu ovupi yi ma ruaari pisi mele be ku, mi ma ’du yi mi ngulupi dri ku, yi kazu ovuzu mi dri ekile emba mi bizurile ku; yi afa Yehova Mungu minirini ngule onziri’i.

26Mi ma ofi afa ngule onziri mi vile joa ku, mi kazu ofuzu afa trile tririru erini ovulerile ku; mi ma ngu eri onzi mi asi driasi, mi ma ga eri teketekesi; a’disiku eri afa trile triri’i.

← Chapter 6 Jump to: Chapter 8 →