Deuteronomy 8

Lugbara (E’yo Siza Alatararu Munguniri BIBLIA)

← Chapter 7 Jump to: Chapter 9 →

1Emi ma ne onyiru emi ma ’ye azita te mani azile mi dri o’du andru ’dorisiri dria, emi ma ovu ani idriru, ma ezu tre, fizu angu Yehovani ndra oyoni sole emi a’bipi driria eri ’duzu eminiru beni.

2Mi ma ega ’dani geri dria Yehova Mungu minirini mi dri cezu eli kali su roko driari ma e’yo, mi omvizu ele, mi o’bizu ani, e’yo mi asia kani mi le azita ini ’diyi ma ta mbazu ra kani yo yaniri nizu beni.

3Eri omvi mi ele, eri fe mini ovuzu abirisi, eri fe mi dri mana emini nile emi a’bipi be kuri nya; eri ma fe ani mini nizu kini ’ba ovuni idriru kiri enyasi a’dule ku, te ’ba ovu idriru e’yo dria efupi Yehova ma tilia ’diyisi.

4Bongo mi ruaari ecani dezaru eli kali su ’diyisi ku, mi pa pini ku indi.

5Mi ma ni mi asia kini Yehovani mi imba ekile aguni i mvini imbale acoasirile.

6Mi ma mba Yehova Mungu miniri ma azita ma ta, acizu geri erini ’diyi ma alia, eri ruzu.

7A’disiku Yehova Mungu miniri eri mi eji angu onyiruri ma alia, angu yi nyiri ’diyi pi be, yi adipi adi ’diyi pie, yi aliru ’diyi pie, egapi e’bua azini oni ma ruaa indi ’diyi;

8angu nganu pi be tre, anya pie, zabibu pati pie, elio pati pie, pomegranate pie, angu mizeitu pati oduru ’diyi pini ovuzu alenia anyuoso beri;

9angu mini ngazu enya nyazu ndakokoru, alenia afani mi ecezuni aluni yo; angu eri ma onini ovuzu ayaru, mini ecozu mola gazu oni erini ambo ambo ’diyi ma ruaari’i.

10Mi nga nya ra, mi nga tra ani, mi nga Yehova Mungu miniri inzi angu onyiru erini fele mi dri ’bori ma e’yosi.

11Mi ma ndre onyiru mi dri kazu avizu Yehova Mungu minirisi ku, mini ani azita erini ’diyi pi ma ta mbazu ku, e’yo liza erini ’diyi pie, e’yo aziza erini ’diyi pie, mani azile mi dri andru ’diyi.

12Mi ma ovu mile be, mi ka nya ra, e ka tra ’bo, mi ka jo onyiru si ovuzu yi ma alia ’bo,

13ti mini piyi ka ezu anyapa nyiri mini ’diyi be ’bo, dahabu mini pi ka vini i ere tu mele mini be ’bo, afa dria mini ovuzu yi be ’diyi ka ezu ’bo,

14mi asi kazu engazu afusi ku, mi dri kazu avizu Yehova Mungu mini, mi ofupi ejipi angu Misiriasi, jo ati’baniasirisi ku;

15eri ce ndra mi dri roko amboru uriuriruri ma eselesi, pari uri aciru ’diyi pini ovuzu alenia otunukua be, angu a’wiru yi kokoruria; eri fe ndra yini egbizu mi dri oni kongolokorori ma ruaa;

16eri fe ndra mi dri mana mi a’bipini nile kuri nyazu, eri ma omvi mi ele ani mi o’bizu, mi ’yezu onyiru asiza miniria beni.

17Mi ma ne onyiru mi kazu ’yozu mi asia ku kini, Ma isu mani lonyi ’doyi ma ngulupisi, okpo manisi driokpo maniri be.

18Mi ma ega ’dani Yehova Mungu mini ma e’yo, a’disiku eri ’ba okpo fepi mi dri lonyi isuzuri’i; eri ma fe ani aziza erini ndra oyoni sole mi a’bipi beri ma so pa kirikiri, ekile o’du andru ’dorisirile.

19Eri nga ovu ’dini, mi dri ka nga vi Yehova Mungu minisiri ra, mi a nga adrou azini ’diyi ma vuti bi; zi ngazu yi dri yi inzizu indi, a’dini emi nga dri ja ecekokoru, ma i di ani emi bilendu andru ’di.

20Emi nga dri ja ra ekile Yehovani uru ’dayi ma dri ale emi driliarile, ’disiku emini lele o’duko Yehova Mungu eminirini erile kurisi.

← Chapter 7 Jump to: Chapter 9 →