Deuteronomy 18

Lugbara (E’yo Siza Alatararu Munguniri BIBLIA)

← Chapter 17 Jump to: Chapter 19 →

1’Ba Levini kuhaniru, ada suruti Levini dria ’diyi, ma ovu afa yini be, kani awuruso be, Israelile ku; yi ma nya yini edeta ’bani evele Yehova dri ’diyi, awuruso eriniri be.

2Yi ma ovu vini awuruso be yi adripi ma eselia ku; Yehovani awuruso yini, ekile emi ’yole yi tia ’borile.

3Afa fele kuhanini engazu ’ba vu, engazu ’ba edeta fepi ’diyi vuri ’di, ka ovu tini kani kabiloni: yi ma fe kuhani dri wu, siso iri tro, iribijo pie.

4Mi ma fe vini eri dri anyadri okori, patiefi ma su okori pie, odu okori pie, kabilo ’biko lile okori pie dria.

5A’disiku Yehova Mungu miniri pe eri ’bo, suruti mini ma eselia dria, eri ma so pa ani azi ngazu Yehova ma rusi, eri’i anzipi be ’dani ’dani.

6’Ba Levini ka nga efu aku mini Israeli dria ma eselia ’diyi ma azi alu, erini adrizu ovuzuri ma aliasi, eri ka nga emu avasi i ma asi driasi ecazu pari Yehovani ngale peleria,

7eri nga di azi nga Yehova Mungu eriniri ma rusi, ekile adripi erini ’ba Levini pa osopi ’daa Yehova ma drilia ’diyi driani ’yelerile.

8Yi ma ovu afa be nyazaru tro tro, tro tro, te drinia afa erini isule erini afa i atini kule awitaruri ozilerisiri ma ovu erini ’dani.

9Mi ka nga fi angu Yehova ’Mungu minirini fele mi driri ma alia ’bo, e’yo ngule onzi suru ’dayini adrile ’yele ’diyi, mi ma oni yi ’yezu ku.

10’Ba ma isu emi eselia ’ba i mvini kani i zini fepi agazu aci alesiri pi aluni ku, ’ba acife ndripiri pie, ’ba andri ndripiri pie, ’ba ’ba enapi enatasiri pie, oleou pie,

11’ba ori owipiri pie, ojoou adrou ma o’duko zipiri pie, ojoou pie, ojoou e’yo zipi ’ba draza ma tiari pie dria.

12A’disiku ’ba dria alu alu e’yo ’diyi ’yepi ’diyi ovu afa ngule onziriru Yehova dri; azini e’yo ngule onzi ’diyi ma e’yosi Yehovani yi odro emi driliasi ’di.

13Mi ma ovu ezata kokoru Mungu miniri ma milia.

14Te suru mini ngale yi ma angu nyale ’diyi adri yi bile co ’ba andri ndripi ’diyi pi vu ’ba acife ndripi ’diyi be; te mi’i, Yehova Mungu miniri a’ini mini ’yezu ’dinini ku.

15Yehova Mungu miniri nga mi adripi ma azi alu fe engazu nabiru mi dri mi eselia ekile male--emi ma co bile eri vu-

16ekile e’yo dria mini a’ile ndra Yehova Mungu miniri dri Horebua, o’du okuzanisi, kini, Mi fe ma ma eri o’duko Yehova Mungu manirini dika ku, ma ma ndre vini aci amboru ’dori dika ku, ma kazu drazu ku, ’dinirile.

17Yehova nga di ’yo ma tia kini, Yi ’yo e’yo yini ’yole ’diri ’yeke.

18Ma nga nabi ekile mileri fe engazu yi dri adripi yini ma eselia; ma nga e’yo ’yoza mani ’diyi o’ba eri ma tilia, eri nga e’yo dria mani azile eri dri ’diyi olu yi tia ra.

19Te eri nga eca ’dini, ’ba azini ka le e’yo mani erini ngale olule ma rusiri eri ku, ma ma ngulupini nga ariotini ofe eri ruaa ma’i.

20Te nabi ripi e’yo olupi i drisi ambosi ma rusiri, nabi nderi nga dra ra.

21Mi ka ’yo mi asia kini, Ama nga e’yo Yehovani ’yole kuri ni ngoni ngoni ya?-

22nabi azini ka e’yo olu Yehova ma rusi, te e’yo erini oluleri ka i ’ye ku, ka eca ’dini ku, ka’dini e’yo nderi ovu e’yo Yehovani ’yole kuri’i; nabi nde olu e’yo nderi i drisi ambosi, mi ’ye erisi urisi ku.

← Chapter 17 Jump to: Chapter 19 →