Deuteronomy 21

Lugbara (E’yo Siza Alatararu Munguniri BIBLIA)

← Chapter 20 Jump to: Chapter 22 →

1Angu Yehova Mungu minirini fele mi dri ovuzu miniruri ma alia, yi ka ’ba fule kairi ma avu isu lazu asea, te nini ’ba eri ’dipiri a’di’i yari ku,

2ka’dini ’ba ’wara mini piyi ma efu ’ba e’yo lipi ’diyi be, yi ma ’be aku ovupi avu ma ageia ’diyi pi ma esele avu beri;

3eri nga eca ’dini, aku ovupi ’ba fule kai nderi ma avu vu inyia tu turi, ’ba ’wara aku ndea ’diyi ma ’du tikari anyapa o’biru ma eselia ’bani azi ngale erisi nga ku, afa esepi kulumbusi nga kuri.

4’Ba ’wara aku ndea ’diyi ma ese tikari nderi andraleru a’bu ovupi yi raza beri ma alia, pari ’yale nga ku azini ori rizu nga kuria, yi ma pi tikari nde ma ombe a’bua ’daa.

5’Ba Levini kuhaniru ’diyi ma esi ogogo, a’disiku Yehova Mungu miniri ope yi azi ngazu i dri, azini asi ndriza fezu Yehova ma rusi; ma li agata gaza pi ma e’yo dria, acoa dria be, e’yo yini ’yoleri vusi.

6Te ’ba dria aku ovupi ’ba fule kairi ma avu vu inyia tu turia ’diyi ma oji yi dri tikari yini te ombe pile a’buari ma dria;

7yi ma omvi e’yo kini, Dri amani adani ari ’dirini ku, ama ndreni vini eri ama milesi ku.

8Yehova la, mi wu ’ba mini Israelini mini onzele ’bo ’diyi ma e’yo onzi fo, mi ku ’ba e’yo kokoruri ma ari ma ri ovu Israeli ma eselia ’dani ku. Te ari nderi nga ovu wuzaru ani yi dri.

9Mi ma nze ’ba e’yo kokoruri ma ari mi ma eseliasi ’dini, mi ka e’yo ovupi onyiru Yehova ma miliari ’ye ra.

10Mi ka fu mu a’di ’dizu ari’ba mini be, Yehova Mungu miniri ka nga yi fe mi dria, mi ka nga yi o’i ji ati’baru,

11mi ka oku ndrizaru tu ndre ati’ba ’diyi ma eselia, avani ka mi va eri ’duzu oku miniru ra,

12ka’dini mi ma ji eri emi vile, mi vile joa; eri ma fa i dribi ra, ma oli i onyofi indi.

13Eri ma tru bongo ati’boni eri ruaari ra, ma wu i ati pi ma imvosi andri be mba alu pi; ’di ma vutia mi eco fizaru eri vu, ovuzu agupi erini, eri ma ovu oku miniru.

14Eri nga ovu ’dini, ka mi dri ayiko fe ku, mi ku eri ma mu ini lelerile; te mi ma fe eri je silingisi aluni ku, mi ma ’ye eri vu ekile ati’bole ku, mini drinza fele eri dririsi.

15’Ba azini ka ovu oku be iri, aluri erini leleri’i, aziniri erini nguleri’i, te leleri azini nguleri iri tro oti anzi eri dri ra; te mva osipi oko ka ovu ngule rarini,

16eri nga ovu ’dini, o’du erini afa ini awazu awurusoru anzipi dririsi, eri econi oku erini leleri ma mva ’ba karimvaru oku erini nguleri ma mva osipi okori ma paria ’dini ku,

17te eri ma a’i mva osipi oko, oku erini nguleri ma mvini ra, afa erini ovuzu yi be ’diyi dria ma esele fezu eri dri pale iri, erini ovule ati ma okponi e’dozuri’irisi; kari mva osipi okoriniri erini.

18’Ba azini ma mva ka ovu ambo be edematararu, lepi ata pi ma ti eripi andri be kuri, yini eri coria imbatasi ti, erini yi ku,

19ka’dini ati pi andri be ma bi eri jizu ’ba ’wara aku erinia ’diyi vu, aku erini ma kalitilea,

20yi ma ’yo ’ba ’wara aku erinia ’diyi ma tia, Mva amani ’dori eri ambo be edematararu, erini ama ti ku; eri ali o’ba saaru, eri ati ewasi tu.

21Agupi aku nde ma alia ’diyi dria ma o’be eri onisi kai; mi ma nze e’yo onzi mi eseliasi ’dini; Israeli dria ma eri, ma ovu ani urisi.

22’Ba azini ka e’yo onzi ’bani drazu rari ’ye, ka eri fu ra, mi ka eri ’i pati sia,

23avuni ma ovu pati sia ini rra ku, te mi ma ece eri sazu o’du nderisi coti ku, a’disiku ’ba yini ’ileri ovu trizaru Mungu dri; ’dini mi kazu angu Yehova Mungu minirini fele mi dri ovuzu miniruri ezazu ku.

← Chapter 20 Jump to: Chapter 22 →