Deuteronomy 20

Lugbara (E’yo Siza Alatararu Munguniri BIBLIA)

← Chapter 19 Jump to: Chapter 21 →

1Mi ka nga fu mu a’di ’di ari’ba mini be, mi ka nga akanya piyi ndre, gari ombani pie, ’ba karakarau mi agapi o’bisi ra ’diyi pie, mi ma ’ye yisi urisi ku; a’disiku Yehova Mungu mini, mi ofupi ejipi angu Misiriariasiri ovu mi be ci.

2Eri nga ovu ’dini, mi ka nga si a’di ria ogogo, kuhanini nga i etru ’ba vu ogogo, nga ’yo ’ba tia,

3’yozu yi tia kini, Israeli la, emi eri fo! O’du andru ’dorisi emi si ogogo a’di ’dizu emi ari’ba be: emi asi ma ca corokolo ku; emi ma ovu urisi ku, emi rua ma ya ya ku, emi ’ye yisi urisi ku indi;

4a’disiku ’ba mupi emi be, a’di ’dizu emini emi ari’ba be emi pazuri Yehova Mungu eminiri’i.

5’Ba ambo ambo ma ’yo vini ’ba ria kini, ’Ba azini jo o’diru sipi ra, te eri fepi nga Mungu dri kuri a’di’i ya? Eri ma ko dri, ma mvi jo inia, eri kazu drazu a’dia, ’ba azinini eri fezu anini ku.

6’Ba zabibu pati isipi amvua ra, te efini nyapi nga kuri a’di’i ya? Eri ma ko dri mvi i ma joa, eri kazu drazu a’dia, ’ba azinini amvu nde ma efini nyazu anini ku.

7’Ba ’bapi oku jepi ra, te eri ejipi nga kuri a’di’i ya? Eri ma ko dri mvi i ma joa, eri kazu drazu a’dia, ’ba azinini oku erini omvizu anini ku.

8’Ba ambo ambo ’diyi ma ’yo e’yo azini dika ’ba ria, ’yozu kini, ’Ba ovupi urisi asinini cazu corokolori a’di’i ya? Eri ma ko dri mvi i ma joa, adripi erini ’diyi ma asi kazu cazu corokolo erinirile ku.

9Eri nga ovu ’dini, ’ba amboru ’diyi ka e’yo ’yo ’ba tia de ’bo, yi ma ope ’ba ambo ambo ’ba ongulumu ma drilia ’diyi, ’ba dri cezu,

10Mini mi etruria aku azini vu ogogo, a’di ’dizu eri be, mi ma oyu di e’yo asi anzuruniri eri tia.

11Eri nga eca ’dini, e’yo omviza erini mi vuri ka ovu anzuru, ka kalitile zi mi dri, ka’dini eri nga ovu ’dini, ’ba dria alenia ’diyi nga musoro ’be mi dri, azi ngazu mi dri ati’baru.

12Te eri ka le ovu asi anzurusi mi be ku, ka omba le mi be’i, ka’dini mi nga eri ace ombasi kuru;

13te Yehova Mungu miniri ka nga eri fe mi dria ’bo, mi ma ofu agupi alenia ’diyi dria sei ma sisi,

14te okuyi, anzi nyiri pie, anyapa pie, afa dria ovupi aku nde ma alia ’diyi pie, ada afa opale ’diyi dria, mi ma opa ovuzu mi ma afaru; mi ma nya ari’ba mini ma afa mini opale, Yehova Mungu minirini fele mi dri ’diyi ra.

15Mi ma ’ye aku dria ovupi mi be ziri tu, ovupi aku suru ’diyi vile ku ’diyi, ’dinile.

16Te suru ’diyi ma aku, Yehova Mungu minirini fele mi dri ovuzu awuruso miniru ’diyi ma alia, mi ma ku afa ava ’yapiri idriru aluni ku,

17te mi ma ja yi dri teketeke, ’ba Hitini ’diyi pi, ’ba Amorini ’diyi pie, ’ba Kananini ’diyi pie, ’ba Perizini ’diyi pie, ’ba Hivini ’diyi pie, ’ba Yebusini ’diyi pie dria, ekile Yehova Mungu minirini azile mi dririle;

18yi kazu emi imbazu e’yo ngule onzi yini, yini adrile ’yele adrou yini dri ’diyisi yi ’yezu ku beni, ’dinilerisi emi nga e’yo onzi ’ye Yehova Mungu miniri dri.

19Mi ka nga aku azini ace kuru o’du kakau, omba ’bazu eri be eri ’duzu, mi ma eza aku nde ma pati, yi ogazu ogarasi ku; a’disiku mi eco efini nyazaru, te mi ma oga yi va ku. Pati amvuari eri ’bani, mini ani eri acezu kuru ombasi ya?

20Mi ma eza kiri pati mini nile yi pati efini nyale ku ’diyi ra, yi ogazu va, mi nga ’ani yisi atufe ede tuzu aku nde omba ’bapi mi beri ma alia, cazu mini eri ndezu ombasiria.

← Chapter 19 Jump to: Chapter 21 →