Deuteronomy 29

Lugbara (E’yo Siza Alatararu Munguniri BIBLIA)

← Chapter 28 Jump to: Chapter 30 →

1’Diyi aziza Yehovani azile Musa tia azizu anzi Israelini be angu Moabuariari ma e’yo, aziza erini azile yi be Horebuari ma aziru.

2Te Musa nga Israeli omve dria, nga ’yo yi tia kini Emi ndre e’yo dria Yehovani ’yele emi milia angu.Misiriari ma alia Farau pi vu, ati’ba erini ’diyi pie, angu erini pie dria ’bo,

3o’bita amboru mini ndrele mi milesi ’diyi pie, eceta pie, tali osutaro nde ’diyi pie;

4te Yehova feni nga emi dri asi e’yo nizuri pi mile angu nezuri pie, bile e’yo erizuri pie ku, kpere andru.

5Ma ce emi dri eli kali su roko dria ’bo; bongo emini deni nga emi ruaa ku, enyiriko emini deni vini nga emi paa ku;

6emi nyani mikate ku, emi mvuni patiefi ma su, kani afa mvuza okporuri ku indi; emi ma ni ani ma Yehova Mungu eminiri’i.

7Emi ka eca ndra pari ’doria, Sihoni opi Hesiboniari pi efu ndra ama vu a’di ’dizu ama be Ogi opi Basaniari be, te ama aga yi ra;

8ama pa ndra angu yini, eri fezu awurusoru ’ba Rubenini ’diyi pi dri, ’ba Gadini ’diyi pie, suru ali Manaseni ’diyi pie.

9E’yo’disi emi ma mba aziza ’dori ma e’yo ma ta, emi ’ye yi, emi ma ovu ani drilebaru e’yo dria emini ’yele ’diyi ma alia beni.

10O’du andru ’dorisi emi dria pa oso Yehova Mungu eminiri ma drilia ’do; ’ba emi drilia ’diyi pi, suruti emini pie, ’ba ’wara emini ’diyi i pie, ambo emini ’diyi pie, agupi Israelini ’diyi pie dria,

11anzi nyiri emini pie, emi okupi pie, ani’bo mini ovupi pari mini hema asozuriari pie, engazu ’ba eja osipi mi dririsi kpere ’ba yi kopi mi driri vu;

12mi ma fi ani aziza Yehova Mungu minirini ma e’yo a’izu, oyo erini soleri pie, Yehova Mungu minirini ’yele mi be o’du andru ’dorisiri’i

13eri ma fe o’du andru ’dorisi mini ovuzu ’dani suru i ma ngulupiniriru, eri ma ovu Mungu mini, ekile ndra erini ’yole mi tiarile, ekile erini vini oyo sole ndra mi a’bipi Iburahimu pi ma tia, Isaka pie, Yakobo pierile.

14Ma azini aziza ’dori oyo soza ’dori be kiri emi be a’dule ku,

15te ma azi eri ’ba pa sopi ’doa ama be Yehova Mungu amani ma drilia o’du andru ’dorisiri be, azini ’ba ovupi ama be ’doa o’du andru ’dorisi kuri be indio

16Emi ni e’yo amani ndra ovuzu Misiriari ra, azini e’yo amani acizu suru emini agazu yi ma eselesi ’diyi ma eseliari indi;

17emi ndre vini afa ngule onzi yini ’diyi, azini wura yini inzile inzi ovupi yi ma eselia edele pati pisi oni pie, dahabu pie, mele pie ’diyi.

18Emi ma ne onyiru, agupi kani oku, kani ori’ba, kani suruti, i ojapi o’du andru ’dorisi Yehova Mungu amaniri kupi ra, mupi suru nde ’diyi ma adrou inzipi’iri kazu ovuzu emi eselia ku; ola aro drapi ojileli i pi ’yapi enyata okaru beri kazu ovuzu emi eselia ku;

19kazu ovuzu ’dini ku, ’ba nderi ka otrita ’dori ma e’yo eri ra, eri kazu asi ndriza fezu i dri ceni i asia ku, kini, Ma’i, ma nga ovu asi anzuru be ra, ma ka tro aci asi mbaza mani be ’dani ti; afa ibiru pi ma dri jazu afa a’wiru be tualu.

20Yehova ngani ’ba ’dinile ’diri ma e’yo onzi wu ku, te adra Yehovani pi a’ya erini be nga nyi acikale agu nderi ma dria, otrita sile buku ’dori ma aliari dria nga ri ovu eri ma dria, Yehovani nga ru erini ini ’bu etiasi ra.

21Yehovani nga vini eri gbu ku ndu onzisi, engazu suruti Israelini ’diyi ma aliasi dria, ekile e’yo aziza ma otrita dria sile buku azitani ’dori ma alia ’diyile.

22A’bianzi ngapi emupi, emi anzipi ngapi ovupi emi ma vutia ’diyi pi ani’bo engapi angu ziriari be nga ’yo, yi ka dra muaru angu nderia ’diyi pi one azo Yehovani eri ’bazu draru ani ’diyi pie-

23yi ka ndre angu ofu dria barutiru, a’iru, afa vezaru, ori riza alenia yo, ’yani efi ku, ase duni ania ku, te oguza erini ekile Sodomu pini Gomora pie, Adima pie Zeboimu pierile, Yehovani ndra ogule aoko erini pisi adra erini be ’diyi-

24ada suru dria yi nga ’yo kini, Yehova ’ye angu ’dori ’dini a’di e’yosi ya? Adra amboru ’dori ma aci ma efi ngoni ya?

25’Ba nga di omvi kini, A’disiku yi ku aziza Yehova Mungu yi a’bipinirini, erini azile ndra yi be erini yi ofuzu angu Misiriasiri ra,

26yi mu adrou ma azi ngazu, yi inzizu, Mungu yini oku nga nile ku, Munguni fele yi dri ku ’diyi;

27e’yo ’disi adra Yehovani di acile angu ’dori ma dria, otrita sile buku ’dori ma aliari ejizu dria drinia;

28azini Yehova onze yi pi pi ola be angu yini ma aliasi, aoko pisi, adra pie, asi veza pie, o’be di yi muzu ani angu andinia, ekile etu andru ’dorisirile.

29E’yo zizaru yi e’dapi ku ’diyi Yehova Mungu amanirini; te e’yo yi e’dapi ’bo ’diyi amani, ama anzipi be ’dani ’dani, ama ma ’ye ani azita ’dori ma e’yo dria.

← Chapter 28 Jump to: Chapter 30 →