Deuteronomy 4 — Lugbara (E’yo Siza Alatararu Munguniri BIBLIA)

1Te curu’do, Israeli la! emi co bile azita mani imbale emi dri ’diyi piyi erizu, e’yo liza ’diyi be, emi ma ’ye yi ani; emi ma ovu ani idriru, ma fi angu Yehova Mungu emi a’bipinirini fele emi driria eri nyazu eminiru.

2Emi ma ere e’yo azini e’yo mani di azile emi tiari ma dria ku, emi ma ku vini e’yo nderi ma azi ja ku indi; emi ma mba ani azita Yehova Mungu eminirini mani azile emi tia ’diyi ma ta beni.

3Emi ndre emi milesi e’yo Yehovani ’yele Baali-peori ma e’yosiri ’bo; te Yehova ja ’ba dria Baali-peori ma vuti bipi ’diyi ma dri emi eseliasi ra.

4Te emi emi ebipi ndra Yehova Mungu eminiri be ’diyi, emi dria alu alu idriru andru ’do.

5Mi ne, ma imba emi azita piyisi e’yo liza be, ekile Yehova Mungu manirini azile ma tiarile, emi ma ’ye ani ’dini angu emini file alenia eri nyazu eminiruri ma alia.

6E’yo ’disi emi mba yi ma ta, yi ’yezu; a’disiku ’diri ondua emini pi e’yo vaza eminiri be, suru ngapi azita ’diyi dria eripi ’diyi ma milia, ngapi ’yopi kini, Adada suru amboru ’dori onduaru e’yo vaza be, ’diyi.

7Te suru amboru ovupi adrou yi vileri be ogogo yi vu ekile Yehova Mungu amanirini ovule ogogo ama vu amani eri omveriarileri ngori ya?

8Azini suru amboru ovupi azita piyi be, e’yo liza pie, kililiru trotro ekile azita ’do dria mani ’bale emi drilia o’du andru ’dorisirileri ngori ya?

9Te kiri mi ma mba mi ngulupi ma ta, mi ma mba orindi mini ma ta asi alusi, mi kazu e’yo mini ndrele mi milesi ’diyi avizu ku, yi kazu fuzu mi asisi o’du mini ovuzu idrirurisi dria ku; mi ece yi mi anzipi ma tia, yi ma anzi be-

10o’du ndra mini pa sozu Yehova Mungu miniri ma drilia Horebuarisi, Yehova ’yo ndra ma tia kini, Mi oku ’ba nde ’diyi ma vu, ma nga fe yi ma eri e’yo mani ’yole ’diyi, ’dini yi ma oni ani ma ruzu ewu yini ovuzu idriru nyakuarisi dria, yi ma imba vini anzi yini indio

11Emi esi ndra ogogo pa sozu oni nderi ma etia, oni nderini veria acisi kpere ’bu ma alia agadua, angu biza pi be, iriti pie, angu asepi iniciciruri pie.

12Te Yehova ’yo ndra emi tia aci nderi ma aliasi agadua; emi eri ndra e’yo ’yoza nde ma o’duko ra, te emi ndreni wurani ngoni yari ku; kiri o’duko’i.

13Eri olu emi tia aziza erini, erini azile emi dri ’yezuri, adani azita mudri nde ’diyi; si yi vini oni ’bararu iri ’diyi ma dria.

14Te Yehova azi ma tia etu nderisi emi imbazu azita piyisi e’yo liza be, emi ma ’ye yi ani angu emini ngazu agazu vunia eri nyazu eminiruri ma alia beni.

15E’yo ’disi emi ma te emi ma ngulupi ma agei onyiru. Emi ndreni ndra wura azini rua be ngoni yari aluni ku, o’du Yehovani e’yo ’yozu emi tia Horebua aci ma aliasiria;

16emi te emi agei onyiru emi kazu muzu emi ezazu ku, emi kazu siri’ba inzile inziri opazu emi dri afa azini ma wurasi ’dini ku, kani i sipi agupile, kani okule,

17kani anyapa nyaku dria ’diyi ma azile, kani aria sapi uru ’bua opilesi ’diyi ma azile,

18kani afa agapi agatisi nyakua ’diyi ma azile, kani e’bi ovupi yia nyaku etia ’diyi ma azile ’diyi.

19Mi ka mi mile enga luzu uru ’bua, mini etu pi ndreria, mba pie, ’bi’bio pie, ada ’bi’bio dria ongulumuru ’bua ’diyi pie, kazu mi sezu yi inzizu, mi kazu vini azi ngazu afa nde Yehova Mungu minirini awale ’ba dria ’bu dria ma etia ’diyi dri ’diyi dri ku.

20Te Yehova o’du ndra emi, onze emi okalemvu aya akazuriasi, ada Misiriasi, emi ma ovu eri ma yilaru ’ani, ekile o’du andru ’dorisirile.

21Vini indi Yehova ovu ndra aokosi ma be emi ma e’yosi, eri so ndra oyo kini ma ma zo Yoridanini ku, ma ma fi vini angu onyiru Yehova Mungu minirini fele mi dri awurusoruri ma alia ku.

22Te ma’i, ma mani dra angu ’dori ma alia, ma ma zo Yori’danini ku; te emi’i, emi nga zo ra, nga angu onyiru nderi ’du eminiru.

23Emi ma ovu mile be, emi kazu aziza Yehova Mungu eminirini, ndra erini azile emi beri avizu ku, emi kazu wura inzile inziri opazu afa Yehova Mungu minirini ogale mi dri ’diyi ma azi ma wurasi ku indio

24A’disiku Yehova Mungu emini ovu aci vepi veri, Mungu a’yaruri’i.

25Emi ka anzi oti, azini anzi ma anzi, emi ka nga ovu angu nderi ma alia ewu izuru ’boria, emi ka nga emi eza, ka nga afa inzile inziri opa afa azini ma wurasi, emi ka nga e’yo ovupi onzi Yehova Mungu mini ma miliari ’ye, fezu eri ma aokoni engazu ani,

26ma ’bu pi omve nyaku be o’du andru ’dorisi, e’yo onzi emini ma eti opezu kini ace were emi nga dri la teketeke angu emini Yoridanini zozu fizu ’duzu eminiruri ma aliasi; emi ngani asi ovu angu nderi ma alia ewu izuru ku, te emi nga dri ja teketeke ra,

27Te Yehovani nga emi ere suru eselia, emi nga ace kiri lamiru suru ndu ndu Yehovani ngazu emi ojizu yi vu ’diyi ma eselia.

28’Dale emi nga azi nga adrou ’bani edele patisi azini onisi ’diyi dri, afa edele drisi, ecopi afa ndrepi ku, e’yo eripi ku, nyaka nyapi ku, ecopi vini ajini ngupi ku ’diyi.

29Te ’darisi emi alu alu ka nga Yehova Mungu eminiri ndru, eri nga eri isu ra, eri ka nga eri nda i asi driasi, azini i orindi driasi.

30Mi ka nga ovu inzata amboru ma alia e’yo ’diyi dria ka nga emu mi dria, ewu asizurisi mi nga emvi Yehova Mungu miniri vu, mi nga bile co o’duko erini erizu,

31a’disiku Yehova Mungu mini eri Mungu yiki beri’i; eri ngani ece mi aza kozu ku, ngani mi dri ja ku, ngani vini avi aziza ndra erini azile mi a’bipi berisi ku.

32Mi zi nga curu’do zita o’du agapi ’bo, ovupi andra mi drilia oko ’diyi ma e’yosi, engazu o’du Munguni ’ba ’bazu nyakuaria, mi zi nga vini engazu ’bu ma kalati aluria cazu kpere kalati aziniria, kini e’yo amboru tu awa’dirileri ’ye i ndra ra ya ’ba eri e’yo ’dinileri oku drio ra ya?

33’Ba yi eri ndra o’duko Munguni e’yo ’yozu aci ma aliasi, ekile mini erile ’borile, vutinia ovu di idriru ’dani ra ya?

34Kani Mungu o’bi ndra muzu suru azini ’duzu iniru suru azini ’diyi ma eselia o’bita piyisi, eceta pie, e’yo osuzaru ’diyi pie, omba pie, dri okporuri pie, wu ejuzaruri pie, e’yo uriuriru ambo ambo ’diyi pie, ekile Yehova Mungu eminirini ’yele emi dri Misiria emi ma miliarile ra ya?

35Ece ndra e’yo nderi mi dri mi ma ni ani Yehovani Mungu’i beni; aziniri yo, pe lu eri’i.

36Engazu ’bua eri fe ndra mini o’duko ini erizu, eri ma imba mi ani; va nyakua eri fe ndra mini aci ini amboruri ndrezu, mi eri vini e’yo erini ’yole aci ma eseliasi ’diyi ra.

37Erini ndra mi a’bipiyi lele avasirisi, e’yo ’disi eri ope a’bianzi yi ma vutia ’diyi, eri ofu mi Misiriasi erini ovuria mi be ci, okpo erini amboru turisi,

38suru mi agapi ambosi azini okposi ra ’diyi odrozu mi driliasi, mi ofizu, angu yini fezu mi dri ovuzu afa mruru, ekile erini ovule o’du andru ’dosirile.

39Ka’dini mi ma ni di andru, mi ma mba e’yo nde ma ta mi asia ci, kini Yehovani Mungu ’bua uru azini va nyakuari’i; azini yo, pe lu eri’i.

40Mi ma mba e’yo aziza erini ’diyi pi ma ta, azita erini ’diyi be, mani azile mi tia o’du andru ’dorisi ’diyi, mi ma ovu ani drilebaru, anzi mini mi ma vutia ’diyi pie, mi ma fe ani o’du mini ovuzu angu Yehova Mungu minirini fele mi driri ma alia ’diyi ma idri yi drile ’dani ’dani beni.

41Musa nga di aku ambo ambo na Yoridania ’aa’dasi etuni efurialeru ’diyi ope ndu,

42’ba ’ba ’dipiri ma apa ’daa, eri ka i agyini fu aka ku, ka vini eri ngu onzi drio ku indi; ’dini eri ka apa aku ’diyi ma azi aluria eri ma ovu ani idriru beni:

43yi Bezeri angu roko senderuriari ’ba Rubenini ’diyi dri, Ramoti Gileadiari ’ba Gadini ’diyi dri, azini Golani Basaniari ’ba Manaseni ’diyi dri. Musani azita Israeli driri amvizu

44’Di azita Musani ’bale anzi Israelini ma driliari;

45’diyi e’yo eti nzeza, e’yo aziza, azini e’yo liza Musani ’yole anzi Israelini ma tia yini efuria Misiriasi ’diyi;

46’yo ndra e’yo ’diyi Yoridani ma tia ’aa’dasi, e’bu i otipi Beti-peori beria, angu Sihoni opi ’ba Amorini ’diyini ovupi ndra Hesibonia, Musa pini agale anzi Israelini be yini efuria Misiriasiri vile angua.

47Yi o’du ndra angu erini yiniru, angu Ogi opi Basaniariniri be, yi opi ’ba Amorini ’diyini ndra ovupi Yoridani tia ’aa’dasi etuni efurialeru iri ’diyi;

48engazu Aroeri ovupi e’bu Arinoni ma kalatiaria cazu kpere oni Sionia (eri Herimoni’i),

49tualu Araba Yoridani ma tia ’aa’dasi etuni efurialeruri dria be kpere Miri Arabaa Pisiga ma angu eluza ma ombetiaria.