Deuteronomy 30

Lugbara (E’yo Siza Alatararu Munguniri BIBLIA)

← Chapter 29 Jump to: Chapter 31 →

1Eri nga eca ’dini, e’yo ’diyi dria ka nga eca mi dria, asi ndriza pi otrita be mani ’bale mi milia ’diyi, mi ka nga yi ma e’yo ega dika mini ovuria suru dria Yehova Mungu minirini mi drole yi vu ’diyi ma eselia,

2mi ka nga mvi Yehova Mungu miniri vu, o’duko erini erizu mi asi driasi azini mi orindi driasi, ekile e’yo dria mani azile mi tia o’du andru ’dorisi ’diyile, mi’i mi anzipi be;

3ka’dini Yehova Munguminiri nga mi omvi ofuzu ati’boarisi, nga yiki ’ba mi vu, nga emvi mi okuzu suru dria Yehova Mungu minirini mi erezu yi vu ’diyi ma aliasi.

4’Ba mini, ’bani o’bele amve ’diyi ma azi ka ovu ’bu ma kalati asizuria ti, Yehova Mungu miniri nga mi oku engazu kpere ’daa, engazu ’daarisi eri nga vini mi eji ra;

5Yehova Mungu miniri nga mi cii angu ovupi ndra mi a’bipiniri ma alia, mi ma ’du ani eri miniru; eri nga vini mi ’ye onyiru, nga fe mini ezuzu kakau aga mi a’bipi ra.

6Te Yehova Mungu miniri nga mi ma asi li agele lilerile, mi anzipi ma asi be, mi ma le ani Yehova Mungu miniri mi asi driasi, azini mi orindi driasi, mi ma ovu ani idriru.

7Yehovani nga otrita ’diyi o’ba ari’ba mini piyi ma dria, ’ba mi ngupi onzi ndra mi inzapi ’diyi be.

8Mi nga mvi Yehova Mungu miniri ma ti erizu ra, nga azita erini mani azile mi dri o’du andru ’dorisi ’diyi ’ye dria.

9Yehova Mungu miniri nga mi ’ba drilebaru e’yo onyiru isuzu azi mini ’yele drisiri pi ma alia dria, ori efupi mi ruaari pie, anyapa mini ma ori pie, afa nyaku minirini kaleri pie; Yehovani nga ovu ayikosi dika mi ’yezu onyiru, ekile erini ovule ndra ayikosi mi a’bipi ma e’yosirile,

10mi ka nga Yehova Mungu miniri ma ti eri ra, azita erini yini sile buku azitani ’dori ma alia ’diyi pi ma ta mbazu e’yo aziza ’diyi be, mi ka mi oja Yehova Mungu miniri vu mi asi driasi, azini mi orindi driasi raria.

11A’disiku azita mani azile mi tia o’du andru ’dorisi ’diri ovuni ewaru tu mi ndezu ’dini ku, eri ovuni vini mi be ziri ku.

12Eri ’bua yo, mini ani ’yozu kini, A’dini nga tu ama dri ’bua eri ejizu ama vu, fezu amani eri erizuni ya, ama ’ye eri beni?

13Eri ovuni vini miri ma tia ’aa’daaleruria ku, mini ani ’yozu kini, A’dini nga ama dri mirini zo eri ejizu ama vu, fezu amani eri erizuni ya, ama ’ye eri beni?

14Te e’yo nde ovu mi vu inyia tu, mi tilia, azini mi asia, mini ani eri ’yezu beni.

15Mi ne, ma ’ba idri pi mi milia andru onyi be, azini drata pi onzi be,

16mani mi azizu o’du andru ’dorisi kini mi ma le Yehova Mungu miniri, ma aci geri erini ma alia, ma mba azita erini piyi ma ta, e’yo aziza erini ’diyi pie, e’yo liza erini ’diyi pie, mi ma ovu ani idriru, ezuzu tre.Yehova Mungu miniri ma ’ba ani asi ndriza mi vu angu mini muzu vunia eri ’duzu miniruri ma alia beni.

17Te asi mini ka i oja kalaa, mi ka le e’yo eri ku, te ka mi se kalaa adrou ma azi ngazu yi inzizu,

18ma li emi bilendu andru ’di, kini emi nga dri ja ecekokoru; emi ngani ovu idriru o’du kakau angu emini Yoridanini zozu, fizu eri ’duzu eminiruri ma alia ku.

19Ma omve ’bu pi nyaku be, e’yo eti nzezu emi ruaa andru ’do, kini ma ’ba mi milia idri pi dra be, asi ndriza tekari pi otrita be; e’yo ’disi mi ma pe idri’i, mi ma ovu ani idriru, emi’i ori mini pie,

20Yehova Mungu miniri lezu avasi, 0’duko erini erizu ’yezu, mi ebizu eri ruaa; a’disiku eri idri miniri’i, azini ewu mini ovuzu idriru izuri’i, mi ma adri ani angu Yehovani oyoni sole mi a’bipi Iburahimu pi ma tia, Isaka pie, Yakobo pie, fezu yi driri ma alia beni.

← Chapter 29 Jump to: Chapter 31 →