Deuteronomy 28 — Lugbara (E’yo Siza Alatararu Munguniri BIBLIA)

1Eri nga eca ’dini, mi ka nga bile co asi alusi Yehova Mungu miniri ma o’duko erizu, asi ’bazu azita erini mani azile mi tia o’du andru ’dorisi ’diyi ’yezu dria, ka’dini Yehova Mungu miniri nga mi ’ba uru aga suru wudrikurua ’diyi dria ra

7Yehovani nga fe ari’ba mini engapi mi ruaa ’diyi ma ovu ndezaru mi drilia; yi nga efu mi vu geri alusi, te yi nga yi ere apazu nzuzu mi drilia geri azirisi.

8Yehovani nga asi ndriza azi mi dria afa ero mini ma alia ’diyisi, azini e’yo mini mi dri ’bazu yi vu ’diyisi dria indi; eri nga asi ndriza fe mi dri angu Yehova Mungu minirini fele mi driri ma alia.

9Yehovani nga fe mini ovuzu ’dani suru alatararu ma ngulupiniriru, ekile erini oyoni sole mi berile, mi ka nga azita Yehova Mungu minirini ’diyi ma ta mba, acizu geri erini ma aliaria.

10Suru dria wudrikurua ’diyi nga ne ’ba omve mi Yehova ma rusi; yi nga ani ’ye misi urisi.

11Te Yehovani nga fe mini gazu tre afa onyi besi, ori efupi mi ruaari pisi, mi anyapa ma ori pie, afa nyaku minirini kaleri pie, angu Yehovani oyo sole mi a’bipi tia fezu mi driri ma alia.

12Yehovani nga pari ini onyiru lonyi ta mbazu ’buari ma ti zi mi dri, ozoo fezu ’dizu ewu vusi ewu vusi angu mini ma dria, asi ndriza ’bazu azi mini ’yele drisiri ma dria dria; mi nga afa fe mariru suru kakau dri, te miruni ngani mari ’du ku.

13Yehovani nga vini mi ’ba ovuzu driru, te sobiru ku; mi nga ovu kiri drileru, mi ngani ovu ele ku; mi ka nga azita Yehova Mungu minirini mani azile mi dri o’du andru ’dorisi ’diyi eri ra, asi ’bazu yi ta mbazu ’yezu raria,

14mi ka nga mi oja e’yo mani azile mi dri andru ’diyi ma azi aluni kuzu, mini muzu kalaa dri ndia, kani dri ejia, Mungu azini ’diyi ma vuti bizu, yi ma azi ngazu kuria.

15Te eri nga eca ’dini, mi ka le o’duko Yehova Mungu minirini eri ku, ka asi ’ba azita erini azini e’yo aziza erini mani azile mi tia o’du andru ’dorisi ’diyi ’yezu ku, ka’dini otrita ’diyi dria nga eca mi dria, nga mi isu ra.

16Mi nga ovu trizaru akua, mi nga ovu vini trizaru amvua.

17Afazu mini nga ovu trizaru, wari mini mikate itizuri be.

18Ori efupi mi ruaari nga ovu trizaru, afa nyaku minirini kaleri pie, mi ti ma ezuza pie, kabilo mini ma anzi pie.

19Mi nga ovu trizaru mini efiria, mi nga ovu vini trizaru mini furia indi.

20Yehovani nga otrita pi ma ti pe mi ma dria, asi otiza pie, egaza ’bani egazu mi ma driari pie, e’yo dria mini mi dri ’bazu vunia ’yezuri ma alia, cazu kpere yini mi ezazu teketeke, mini dri jazu mbeleria, ’yeta mini ma e’yo onzi, mini ani ma kuzurisi.

21Yehovani nga fe azo muani i ebizu mi ma ruaa, cazu kpere erini mi dri jazu angu mini fizu alenia eri ’duzu miniruri ma aliasi.

22Yehovani nga mi co noi pisi, rua driza pie, azo ’ba rua opipi opiri pie, driza aciruri pie, sei pie, oli aciru afani ’wizuri pie, ozoo afa emapiri pie; yi nga mi vuti dro cazu kpere mini dri jaria,

23’Bu mi drilia ururi nga ovu molani, azini nyaku mi pa ageleari nga ovu ayani.

24Yehovani nga ozoo mi vile anguari oja furaru irifurale; eri nga esi ’buarisi va mi dria gu gu gu, cazu mini dri jaria ra.

25Yehovani nga vini fe ari’ba minini mi ndezu ombasi yi ma drilia; mi nga fu a’di ’dizu yi be geri alusi, te mi nga mi ere apazu nzuzu yi drilia geri azirisi; yi nga ri mi o’be ’dole ’dale suru dria wudrikurua ’diyi ma eselia.

26Te mi avuni nga ovu zaru aria ’bua ’diyi dri dria, azini vini anyapa nyakua ’diyi dri indi; te ’ba ngapi yi dropini yo.

27Yeho-vani nga mi co apipi Misiria ’diyi pisi, apipi ofupi acereru ’diyi pie, isisiri ’ba rua fupi furi pie, ayiribe pie, mini econi ani atizaru ku.

28Yehovani nga vini mi co aza pisi, azo mileni drazuri pie, asi otiza pie;

29mi nga ad parapara etu agaa biririsi, ’ba mile koko ’diyini adrile acile parapara angu biza ma aliarile, azini mi ngani ovu drilebaru geri minia ku; ’ba nga kiri mi inza, nga afa mini opa ’dani, te ’ba ngapi mi aza kopini yo.

30Mi nga e’do oku je ra, te ’ba azini nga la erisini; mi nga jo si, te mi ngani ovu aleniani ku; mi nga zabibu isi amvua, te mi ngani efini nya ku.

31Yi nga ti mini so mi milia ’de, te mi ngani zani nya ku; yi nga akanya mini pa ambosi mi driarisi, te yi ngani eri omvi mi dri ku; yi nga kabilo mini ’diyi ofe mi ari’ba dri, te ’ba mi papini yo.

32Yi nga mi anzipi pi fe mi ezopi be juru dri, de mini yi neria milesi, mi mileni nga oro mini yi ma mile gale ti o’du driarisi; mi ngani eco e’yo aluni ’yezaru mi dri ma okposi ku.

33Suru ambo mini nile kuri nga afa nyaku minini kale ’diyi, azini afa dria mini isule mini azi ngalerisi ’diyi nya ra; te yi nga kiri mi dri otu mi inzazu ’dani;

34’dini mi nga ofu ’ba azazaru e’yo mini nele mi milesi ’diyisi.

35Yehovani nga mi co kumuti pia, pa be, apipi onzikanyaru mini ecozu ani atizu ku ’diyisi, engazu mi pa agelea cazu mi dri olu’bua kurubu.

36Yehovani nga mi ji, opi mini ngale ’bale mi driliari be, suru mini; nile mi a’bipi be oku nga kuri vu; ’dale mi nga azi nga adrou edele patisi azini onisi ’diyi dri.

37Te mi nga ofu ’ba dri osutaru, o’dukoru, azini ajidimararu, suru dria Yehovani ngale mi dri cele yi vu ’diyi ma eselia.

38Ririani mi nga ori i amvua afazu ambosi, te loriani mi nga tini oku afazu weresi; a’disiku ombini nga eri nyani,

39Mi nga zabibu isi amvua, mi nga ruani ede ra, te mi ngani suni mvu aluni ku, mi ngani vini kapi ’diyi oti ku; a’disiku iriakani nga eri nyani,

40Mi nga ovu mizeitu pati be angu mini ma alia dria, te mi ngani oduni efi mi ruaa ku; a’disiku mizeitu mini ’yapi ’diyi lu va.

41Mi nga ezoanzi azini agupianzi oti, te yi ngani ovu mini ku; a’disiku yi nga mu ati’baru,

42Pati mini dria, afa nyaku minirini kale ’diyi be, nga ovu ombi ma afaru.

43Ani’bo ovupi mi eseliari nga ri tu uru uru aga mi ra; te miruni nga si ele ele.

44Eri nga afa fe mi dri mariru, te mi ngani afa fe eri dri mariru ku; eri nga ovu drini, te mi nga ovu sobini,

45Otrita ’diyi dria nga emu mi dria, nga mi vuti dro, nga mi isu ra, cazu mini dri aria, a’disiku mini Yehova Mungu miniri ma ti erile kurisi, mini azita erini pi ma ta mbale e’yo aziza erini, erini azile mi dri ’diyi be kurisi.

46E’yo ’diyi nga ovu ecetaru azini e’yo osutaru mi ma ruaa ori mini be ’dani ’dani.

47Mini ndra azi ngale Yehova Mungu miniri dri nyonasi azini ayiko asiansi, afa driani ovule trerisi, kurisi,

48e’yo ’disi mi di nga azi nga mi ari’ba Yehovani ngale ti pele a’di ’dizu mi be ’diyi dri ra, abirisi, yi avijosi, rua be pililiru, wuzu afa dria ma akosi; eri nga kulumbu ayaru eci mi ombelekoa, cazu erini mi dri jazuria.

49Yehovani nga suru mini yi ma ti nile kuri eji mi dria engazu wudrikuru ma, kalatini asiria, ekile ajini salerile,

50suru mile be ombaru, ngapi asipi ’ba deza ma e’yosi ku, ngapi vini yiki ’bapi ’ba o’di ’diyi vu kuri’i;

51yi nga anyapa mini ma ori nya ra, afa nyaku minirini kaleri be, cazu mini dri jaria; yi ngani vini anya pi ku mi ’dri ku, patiefi ma su pie, odu pie, ti mini ma ezuza pie, kabiloanzi mini pie, cazu yini fezu mini dri jazuria ra.

52Yi nga mi ti tu ku kali mini ’diyi ma alia, cazu abi kaliru mini izu okporu, mini asi ’bazu yi ma dria ’diyini yi asuzu va angu mini ma alia dria; yi nga mi ti tu ku kali mini ma alia dria, angu Yehova Mungu minirini fele mi dri ’bori ma alia dria.

53Mi nga ori efupi mi ngulupi ma ruaa ’diyi nya, mi anzipi Yehova Mungu minirini fele mi dri ’diyi pi ma za mi ezopi be, omba mi ari’bani mi acezu kuru, yini mi omizu ci ciri ma alia.

54Agupi emi eselia ovupi rua be menemene okpo kokoru turi ma mileni nga ovu onzi i adri pi vu, oku i agatiari pie, anzi ma joloko acepi eri dri ’diyi pie;

55’dini eri ngani i ma anzi ini nyale ’diyi ma za fe yi ma azi dri aluni ku, a’disiku afa azini aceni eri dri ku, omba mi ari’bani mi acezu kuru, yini mi omizu ci ciri aku mini dria ma aliari ma alia.

56Oku emi eselia ovupi rua be menemene okpo kokoru, lepi i pa agele ’bapi nyakua ku eri ma ruani ovule menemene azini okpo kokorurisiri ma mileni nga ovu onzi agupi i agatiari pi vu, mvi pie, zi pie,

57odekua erini efupi i ma pa cseliari pie, anzi erini ngale otile ’diyi pie, a’disiku eri nga yi nya ndindiru afa driani ovule yorisi, omba mi ari’bani mi acezu kuru, yini mi omizu ci ci aku mini dria ma aliari ma alia.

58Mi ka mi asi ’ba ku azita ’dori ma e’yo, sile buku ’dori ma alia ’diyi dria ’yezu, mini ani ru dizaru uriuriru ruzu, runiri ’di, YEHOVA Mungu MINIRI,

59ka’dini Yehovani nga eji mi dria azini ori mini ma dria dra muaru osutaru, mua amboru fupi mbele ku ’diyi, azini azo okporu fupi mbele ku ’diyi.

60Eri nga vini azo Misiria mini ’yele yisi urisi ’diyi dria eji mi ma dria; yi nga yi iri ku mi ruaa.

61Vini indi Yehovani nga azo dria azini dra dria ’bani sile buku azita ’dorini ma alia ku ’diyi eji mi ma dria, cazu mini dri jaria.

62Ka tro emi ovu ndra kakau ekile ’bi’bio ’bua ’diyi ma kalafele ti, emi nga ace lamiru; mini Yehova Mungu miniri ma ti erile kurisi.

63Eri nga eca ’dini, ekile Yehovani ovule ndra ayikosi emi ’yezu onyiru azini fezu emini ezuzurile, ’dini Yehovani nga ovu ayikosi fezu emi orini avizu azini emi dri lazu; vi nga emi onze pi pi angu mini fizu alenia eri ’duzu miniruri ma aliarisi ra.

64Yehovani nga mi ere suru dria ma eselia, engazu wudrikuru ma kalati aluria cazu kpere wudrikuru ma kalati aziniria; ’dale mi nga azi nga adrou edele patisi azini onisi, mini nile mi a’bipi be oku nga ku ’diyi dri,

65Suru nde ’diyi ma eselia mi ngani ava liza isu ku, mi ngani vini pari ande lizu mi pa agele ’bazuri isu ku; te ’dale Yehovani nga mi dri asi oyaza pi fe, mile o’deza pie, candi asi dezuri pie;

66idri miniri nga ri ale co idri pi ma eselia dra be mi milia; mi nga ovu urisi inisi etusi ’dani, mi ngani idri mini ma e’yo ni adadaru ku.

67O’bitisi mi nga ’yo, Ka te ondreni ’yeke fo! azini ondresi mi nga ’yo, Ka te o’bitini ’yeke fo! uri amboru mi asiari ma e’yosi, azini vini e’yo mini nele mi milesirisi.

68Yehovani nga mi ji Misiria dika ogurusi, muzu geri mani ndra ’yole kini mi ngani eri ne dika kuria; ’dale emi nga emi fe ozi ari’ba emini dri ceni ati’ba agupiru azini ati’ba okuru, te ’ba ngapi emi jepini aluni yo.