Deuteronomy 32 — Lugbara (E’yo Siza Alatararu Munguniri BIBLIA)

1Emi ’bu, emi co bile, ma nga e’yo ’yo; nyaku ma eri e’yo ma tilea ’diyi.

2Imbata mani nga oti ozoole, e’yo ’yoza mani nga ’ya ekile andralile, ekile lilima oyipi oyi ase ibiru ma driarile, ekile ozoo ’dipi afa idiza ma driarile.

3A’disiku ma nga ru Yehovaniri eku’i. Emi fe ambo Mungu amani dri!

4Kata nderi, azi erini ’yeleri ovu ezata kokoru; geri erini ’diyi dria ovu e’yo liza kililiru. Eri Mungu asi ada be, e’yo onzi kokoruri’i, eri kililiru, onyiru.

5Yi ’ye e’yo ovupi kililiru kuri eri vu, yi ovuni anzi erini ku, ’diri nyebileko yini; yi a’bianzi ambo be, lokiri be yi asia ’diyi.

6Emi Yehovani ofe ’dini ya, emi ’ba azazaru ondua koko ’diyi? Eri mi ati, mi jepi, mi ’bapi, fepi mini pa sozuri’i ku ya?

7Mi ma ega o’du drio ’diyi, ma dro asisile eli mi a’bipi kakau ’diyini ma dria; mi zi mi ati tia, eri nga e’yoni ece mi dri ra; mi zi ’ba ’wara mini ma tia, yi nga e’yoni olu mi tia ani.

8Mungu Uru Agapi Turi ka ndra awuruso fe suru ndu ndu ’diyi dri, eri ka ndra anzi ’bani ma esele co, eri si ndra lokiri suruni anzi Israelini ’diyi ma kalafe vusi.

9A’disiku yila Yehovani ovu ’ba erini ’diyi, Yakobo ovu awuruso pele eri ma afaruri’i.

10Eri isu ndra eri angu roko dria, asoko pirini afa asea ’diyini wuzuria; eri ace eri kuru, eri te eri ma agei,

11Ekile ajini opile ajale jorovu ini ma driarile, azini erini opile oyale anzi erini driarile, ekile erini opile ajale walaru yi ’duzu uru, yi jizu opile ini ma driarile,

12’dinile Yehova a’dule ce ndra eri drini, Mungu nduni ovuni ndra eri be ku.

13Eri otu ndra eri pari uruleru wudrikurua ’diyi ma dria, ri ndra afa nyakuni kale ’diyi nya’i; eri endruzu anyuoso efupi oni ma ruaari pisi, odu efupi oni okporu ma ruaari be.

14Ti lesu butaruri pi, kabilo lesu pie, kabiloanzi osoru ’diyi pie, kabiloago Basania ’diyi pie, ndri pie, nganu ’wara onyiru turi piemi ri ndra vini patiefi ma su edele zabibu ma arisiri mvu’i,

15Te Yesuruni ose ra, nga otu pasi ra; mi ose ra, mi eca a’buzaru, rua be mulimuliru; etu nderisi eri ku di Mungu eri ’bapiri ra, eri ede Kata pata erinirini ede ede.

16Yi fe a’yani engazu eri ma asia Mungu nduni ’diyisi; yi fe vini adrani engazu eri ma asia e’yo ngule onzi ’diyisi.

17Yi ede edeta orindi onzi ’diyi dri, te Mungu dri ku, yi ede edeta adrou yini nile oko ku ’diyi dri, adrou efipi nga o’diru emi a’bipini rule ndra ku ’diyi.

18Mi egani Kata mi tipiri ma e’yo ku, Mungu mi tipiri ma tavi avi mi dri ’bo.

19Yehova ndre e’yo nderi ra, nga yi ngu ani onzi, a’disiku eri ma anzipi ezopi be fe aokoni eri nyazu.

20Eri ’yo ra kini, Ma nga ma mile zi yisi ra, ma nga yi ma asizani nga ovu ngoni yari ndre ra, a’disiku yi ovu a’bianzi ambo be tu ’diyi, anzi ovupi a’ita be yi ma alia aluni ku ’diyi.

21Yi fe a’yani engazu ma asia afa ovupi munguru kurisi ra; yi fe aokoni ma nyazu afa toko toko yini ’diyisi. Ka’dini ma nga fe a’yani engazu yi ma asia ’ba ovupi sururu ku ’diyi ma e’yosi; ma nga fe aokoni yi nyazu suru ondua kokoruri ma e’yosi.

22A’disiku acini ti kole adra manisi ’borisi, eri angu ve kpere ’bile drani ma eti valeruria, eri nyaku pi eve afa erini kaleri be, eri oni amboru ’diyi ma eti du acisi ra.

23Ma nga onzi odro yi ma dria nguru nguru; ma nga ’ye mani ca de dria yi ma ruaa;

24yi nga oyi abirisi, aciolu pi nga yi ove dria ra dri jaza okangalikaruri be; ma nga nguru piyi ma ti pe yi ocizu sisi, afa acipi aci irifura ma alia ’diyi be yi ozazu ’yokosi.

25Amveleru seini nga ’ba ofuni, jo aliza alialeru e’yo uriuriruri’i, karilau pi ma dri jazu aliria be, odekua ba ndrupiri pi mbazau ozoforo be driari be.

26Ma eco ndra ’yo ra kini, Ma nga yi ere ziri, ma nga egata ’bani yi ma e’yo egazuri ini ’ba ma eseliarisi ra,

27te lu ma ’ye urisi ari’ba kazu aoko fezu ku, ’ba omba ’bapi yi be ’diyi kazu e’yo kililiru kuri egazu ku, yi kazu ’yozu ku kini, Enga ama dri uru tu, Yehova ’yeni e’yo ’diri driani ku.

28A’disiku yi suru e’yo amaza kokoru, e’yo vaza yi alia aluni yo.

29Yi ka te ovu onduaru e’yo ’diri vazu, ’yeke fo! yi ma asiza vileri ma e’yo egazu!

30Kata yini ka ndra yi fe ozizu ku, Yehova ka ndra yi fe ari’ba dri ku, ’ba alu eco ’ba alifu alu ma vuti drozaru ngoni ngoni ya, ’ba iri eco fezu ’ba alifu mudri ’diyini apazu ngoni ngoni ya?

31Te kata yini ovuni Kata amanirile ku, ekile ari’ba amani yi ma ngulupini e’yoni lilerile.

32Te zabibu pati yini enga zabibu pati Sodomuari pi ma ruaa, eri amvu Gomoraa ’diyini; zabibu efi yini yi zabibu efi oji drazani ’diyi, zabibu efi yini kapi nguluru ’diyi ovu okangalikaru;

33zabibu su yini ovu enyata uriniri’i, azini ’boroa ma ’yu yiki kokoruri’i.

34Mbani afa ’diri ma ta ma be, ku lomureru tini opizaru ci pari mani lonyi mani ma ta mbazuria ku ya?

35Arioti omvizuri e’yoni mani, panga ofeza be, ewu yi ma pani ngazu onzozurisi; a’disiku o’du ecoko yinirini eca ogogo, e’yo ngapi ecapi yi ma dria ’diyi nga emu mele.

36Te Yehovani nga ’ba ini ’diyi ma e’yo li, nga i oja yiki ’bazu ati’ba ini ma ria, eri ka ne okpo yini de i ’bo, azini ’ba aceni aluni ku, kani aruru kani aruru kuri ti.

37Eri nga di ’yo kini, Adrou yini ’diyi ngoa ya? Kata yini asi ’bazu drinia,

38edeta yini edele ’diyi ma oso nyapi, edeta yini edele afa mvuzasi ’diyi ma patiefi ma su mvupi ’diyi ngoa ya? Emi ku yi ma enga emi aza kozu, yi ma te emi ma agei yi’i fo

39Emi ne, ma’i, ada ma’i, ma eri’i, Mungu azini yo pe lu ma; ma fu ma’i, ma vini idri fe ma’i; ma ’ba ebi ’bo, ma vini ati ra; ’ba ecopi ’ba papi ma driasini aluni yo.

40A’disiku ma dri mani enga ’bualeru, ma ’yo, Ekile mani ovule idri be ’dani ’danirile,

41ma ka sei mani dipi minyiminyiri ma si ji, ma ka e’yo liza bi drisi, ma nga arioti omvi ma ari’ba dri, ma nga panga ofe ’ba ma ngupi onzi ’diyi dri.

42Ma nga fe ’ye mani ma ati arisi, sei manini nga za nya raari ’ba ofule kai ’diyi pini ’ba obile ati’baru ’diyi be, rapi ambo ari’ba ma drilia ’diyi ma driarisi.

43Emi suru ndu ndu ’diyi la! emi ma ovu ayikosi ’ba erini ’diyi be tualu; a’disiku eri nga arioti ofe ati’ba erini ’diyi ma arisi, eri nga arioti omvi ari’ba erini ’diyi ma ruaa, eri nga e’yo onzi ede angu erini pi dri ’ba ini ’diyi be.

44Musa nga di emu ongo ’diri ma e’yo oluzu dria ’ba nde ’diyi ma bilea, yi Yosua Nuni mvi be.

45Musa nga de e’yo ’diyi dria oluzu Israeli ma tia dria,

46eri ’yo yi tia kini, Emi ’ba emi asi e’yo dria mani eti nzele emi tia o’du andru ’dorisi ’diyi ma dria, emi ma azi yi emi anzipi tia, yi ma ne onyiru yi ma ’ye ani azita ’dori ma e’yo dria beni.

47A’disiku e’yo ’diri ovuni emi dri e’yo tokoni ku, te eri idri eminiri’i, azini e’yo ’dirisi emi nga ewu emini ovuzu idriruri fe i esezu izu angu emini Yoridanini zozu eri duzu eminiruri ma alia.

48Yehova ’yo Musa tia o’du nde ’darisi kini,

49Mi tu di oni Abarimu ma dria, kpere Nebo angu Moabua otizaru Yeriko beria; mi ma lu angu Kanani mani fele anzi Israelini dri ovuzu yiniruri;

50mi ma dra oni mini tuzu driniari ma dria, muzu ’ba mini odrapi ’bo ’diyi vu, ekile mi adri Aronini drale oni Hori ma dria muzu ’ba ini odrapi ’bo ’diyi vurile;

51a’disiku emi eza e’yo ma vu anzi Israelini ’diyi ma eselia yi Meribaa Kadesiari roko Ziniaria; a’disiku emi ’bani ndra ma alatararu anzi Israelini ’diyi ma eselia ku.

52Te mi nga angu nderi ndre milesi mi drilia; te mi ngani fi ’dale angu mani fele anzi Israelini driri ma alia ku.