Judges 10

Lao Bible 2012 (ພຣະຄຳພີສັກສິ)

← Chapter 9 Jump to: Chapter 11 →

1ຫລັງຈາກອາບີເມເຫຼັກໄດ້ຕາຍໄປແລ້ວ ໂຕລາ ລູກຊາຍຂອງປູອາ ແລະຫລານຊາຍຂອງໂດໂດກໍໄດ້ປົດປ່ອຍຊາດອິດສະຣາເອນ. ລາວເປັນຄົນເຜົ່າອິດຊາຄາ ແລະອາໄສຢູ່ທີ່ຊາເມຍໃນແຖບເນີນພູຂອງເອຟຣາອິມ.

2ລາວໄດ້ປົກຄອງຊາດອິດສະຣາເອນເປັນເວລາຊາວສາມປີ ແລ້ວກໍຕາຍໄປແລະຊາກສົບຂອງລາວໄດ້ຖືກຝັງໄວ້ທີ່ຊາເມຍ.

3ຫລັງຈາກໂຕລາແມ່ນຢາອີຊາວເມືອງກີເລອາດ. ລາວໄດ້ປົກຄອງຊາດອິດສະຣາເອນເປັນເວລາຊາວສອງປີ.

4ລາວມີລູກຊາຍສາມສິບຄົນ ທີ່ຂີ່ລໍສາມສິບໂຕ. ພວກເຂົາປົກຄອງສາມສິບເມືອງຢູ່ໃນດິນແດນກີເລອາດ ຊຶ່ງຍັງມີຄົນເອີ້ນວ່າໝູ່ບ້ານຂອງຢາອີຈົນເຖິງທຸກວັນນີ້.

5ຢາອີໄດ້ຕາຍໄປແລະຊາກສົບຂອງລາວໄດ້ຖືກຝັງໄວ້ທີ່ກາມົນ.

6ອີກຄັ້ງໜຶ່ງ ຊາວອິດສະຣາເອນໄດ້ເຮັດບາບຕໍ່ສາຍຕາຂອງພຣະເຈົ້າຢາເວ ໂດຍຂາບໄຫວ້ພະບາອານກັບເຈົ້າແມ່ອັດສະຕາກ ແລະບັນດາພະຂອງຊາວຊີເຣຍ, ຊີໂດນ, ໂມອາບ, ອຳໂມນ ແລະຊາວຟີລິດສະຕິນດ້ວຍ. ພວກເຂົາໄດ້ປະຖິ້ມພຣະເຈົ້າຢາເວແລະເຊົານະມັດສະການພຣະອົງ.

7ດັ່ງນັ້ນ ພຣະເຈົ້າຢາເວຈຶ່ງໂກດຮ້າຍຊາວອິດສະຣາເອນ ແລະໄດ້ປ່ອຍໃຫ້ຊາວຟີລິດສະຕິນແລະຊາວອຳໂມນຮົບຊະນະພວກເຂົາ.

8ຕະຫລອດເວລາສິບແປດປີນັ້ນ ພວກນີ້ໄດ້ກົດຂີ່ແລະຂົ່ມເຫັງຊາວອິດສະຣາເອນທຸກຄົນ ທີ່ອາໄສຢູ່ໃນດິນແດນຂອງຊາວອາໂມ ທາງທິດຕາເວັນອອກຂອງແມ່ນໍ້າຈໍແດນໃນກີເລອາດ.

9ພວກອຳໂມນໄດ້ຂ້າມແມ່ນໍ້າຈໍແດນໄປສູ້ຮົບເຜົ່າຢູດາ, ເບັນຢາມິນ ແລະເອຟຣາອິມ. ສະນັ້ນ ຊາວອິດສະຣາເອນຈຶ່ງເປັນທຸກໃຈທີ່ສຸດ.

10ແລ້ວຊາວອິດສະຣາເອນກໍຮ້ອງຫາພຣະເຈົ້າຢາເວວ່າ, “ພວກຂ້ານ້ອຍໄດ້ເຮັດບາບຕໍ່ສູ້ພຣະອົງ ດ້ວຍວ່າພວກຂ້ານ້ອຍໄດ້ໜີໄປຈາກພຣະເຈົ້າຂອງພວກຂ້ານ້ອຍ ແລະໄປຂາບໄຫວ້ພະບາອານ.”

11ພຣະເຈົ້າຢາເວໄດ້ຕອບຊາວອິດສະຣາເອນວ່າ, “ຊາວເອຢິບ, ຊາວອາໂມ, ຊາວອຳໂມນ, ຊາວຟີລິດສະຕິນ,

12ຊາວຊີໂດນ, ຊາວອາມາເຫຼັກ ແລະຊາວມາໂອນ ໄດ້ກົດຂີ່ພວກເຈົ້າໃນຄາວທີ່ຜ່ານມານັ້ນ ເມື່ອພວກເຈົ້າຮ້ອງຫາເຮົາ ເຮົາບໍ່ໄດ້ຊ່ວຍເຫລືອພວກເຈົ້າບໍ?

13ແຕ່ພວກເຈົ້າກໍຍັງໄດ້ໜີໄປຈາກເຮົາແລະໄປຂາບໄຫວ້ບັນດາພະອື່ນ. ສະນັ້ນ ເຮົາຈະບໍ່ຊ່ວຍພວກເຈົ້າອີກຕໍ່ໄປ.

14ໃນເມື່ອພວກເຈົ້າໄດ້ຮັບຄວາມທຸກຍາກລຳບາກ ຈົ່ງໄປຮ້ອງຫາບັນດາພະທີ່ພວກເຈົ້າໄດ້ເລືອກເອົານັ້ນສາ ແລະໃຫ້ພະເຫຼົ່ານັ້ນຊ່ວຍກູ້ເອົາພວກເຈົ້າ.”

15ແຕ່ປະຊາຊົນອິດສະຣາເອນຍັງຮ້ອງຂໍຕໍ່ພຣະເຈົ້າຢາເວວ່າ, “ພວກຂ້ານ້ອຍໄດ້ເຮັດບາບແລ້ວ ຈົ່ງເຮັດກັບພວກຂ້ານ້ອຍຕາມທີ່ພຣະອົງເຫັນສົມຄວນເທີ້ນ, ແຕ່ສຳລັບວັນນີ້ ໂຜດຊ່ວຍພວກຂ້ານ້ອຍດ້ວຍເຖີດ.”

16ດັ່ງນັ້ນ ພວກເຂົາຈຶ່ງເຊົາເຊື່ອຖືບັນດາພະຕ່າງຊາດ ແລະກັບມານະມັດສະການພຣະເຈົ້າຢາເວອີກ. ແລ້ວພຣະອົງກໍທຸກຮ້ອນໃຈ ທີ່ເຫັນຄວາມລຳບາກຂອງຊາດອິດສະຣາເອນ.

17ຕໍ່ມາ ຊາວອຳໂມນໄດ້ຕຽມພົນສູ້ຮົບ ແລະມາຕັ້ງຄ້າຍຢູ່ທີ່ເຂດແດນກີເລອາດ. ຝ່າຍພວກອິດສະຣາເອນກໍໄດ້ມາເຕົ້າໂຮມກັນ ແລະຕັ້ງຄ້າຍທີ່ເມືອງມີຊະປາໃນກີເລອາດເຊັ່ນກັນ.

18ດັ່ງນັ້ນ ປະຊາຊົນແລະພວກຜູ້ນຳຂອງເຜົ່າຕ່າງໆໃນຊາດອິດສະຣາເອນ ຈຶ່ງຖາມກັນວ່າ, “ແມ່ນໃຜຈະອອກໄປສູ້ຮົບພວກອຳໂມນ? ຜູ້ໃດກໍຕາມທີ່ອອກໄປ ຈະໄດ້ເປັນຜູ້ນຳປະຊາຊົນທັງໝົດໃນດິນແດນກີເລອາດ.”

← Chapter 9 Jump to: Chapter 11 →