Judges 12

Lao Bible 2012 (ພຣະຄຳພີສັກສິ)

← Chapter 11 Jump to: Chapter 13 →

1ແລ້ວຊາວເອຟຣາອິມໄດ້ຕຽມຕົວອອກສູ້ຮົບ ແລະຂ້າມແມ່ນໍ້າຈໍແດນໄປສູ່ຊາໂຟນ. ພວກເຂົາເວົ້າຕໍ່ເຢັບທາວ່າ, “ເປັນຫຍັງເຈົ້າຈຶ່ງຂ້າມຊາຍແດນໄປສູ້ຮົບພວກອຳໂມນ ໂດຍບໍ່ເອີ້ນພວກເຮົາໄປນຳ? ພວກເຮົາຈະຈູດເຮືອນເຜົາເຈົ້າຖິ້ມເສຍ.”

2ແຕ່ເຢັບທາຕອບພວກເຂົາວ່າ, “ຂ້ອຍແລະປະຊາຊົນຂອງຂ້ອຍໄດ້ເກີດວິວາດຜິດຖຽງກັນຢ່າງໜັກກັບພວກອຳໂມນ. ຂ້ອຍໄດ້ເອີ້ນຫາພວກເຈົ້າໃຫ້ມາຊ່ວຍ ແຕ່ພວກເຈົ້າບໍ່ຍອມມາຊ່ວຍກູ້ເອົາຂ້ອຍ.

3ເມື່ອຂ້ອຍເຫັນວ່າພວກເຈົ້າບໍ່ມາແລ້ວ ຂ້ອຍຈຶ່ງສ່ຽງຊີວິດຂ້າມແມ່ນໍ້າໄປສູ້ຮົບພວກເຂົາ ແລະພຣະເຈົ້າຢາເວໄດ້ໃຫ້ຂ້ອຍຕີຊະນະພວກເຂົາ. ບັດນີ້ ເປັນຫຍັງພວກເຈົ້າຈຶ່ງມາຕໍ່ສູ້ຂ້ອຍ?”

4ແລ້ວເຢັບທາກໍໄດ້ລະດົມເອົາຜູ້ຊາຍຊາວກີເລອາດທັງໝົດໄປຕໍ່ສູ້ພວກເອຟຣາອິມ ແລະໄດ້ຊະນະພວກເຂົາ. (ຊາວເອຟຣາອິມໄດ້ເວົ້າວ່າ, “ພວກເຈົ້າ ຊາວກີເລອາດ ເປັນພວກທີ່ແຕກໜີມາແຕ່ເອຟຣາອິມແລະມານາເຊ”)

5ເພື່ອປ້ອງກັນບໍ່ໃຫ້ພວກເອຟຣາອິມແລະມານາເຊລອດໜີໄປໄດ້ ຊາວກີເລອາດຈຶ່ງໄດ້ຢຶດທ່າບ່ອນຂ້າມແມ່ນໍ້າຈໍແດນໄວ້. ເມື່ອຊາວເອຟຣາອິມຄົນໃດຄົນໜຶ່ງມາຂໍອະນຸຍາດຂ້າມຝັ່ງ ຄົນກີເລອາດຈະຖາມວ່າ, “ເຈົ້າເປັນຄົນເອຟຣາອິມບໍ?” ຖ້າລາວຕອບວ່າ, “ບໍ່”

6ພວກເຂົາຈະບອກໃຫ້ລາວເວົ້າຄຳວ່າ, “ຊິບໂບເຫລັດ.” ເມື່ອລາວເວົ້າຄຳ “ຊິບໂບເຫລັດ” ແລະຜັນສຽງບໍ່ຖືກຕ້ອງ ຄົນກີເລອາດກໍຈະຈັບລາວແລະຂ້າເສຍທີ່ທ່າຂ້າມແມ່ນໍ້າຈໍແດນ. ຊາວເອຟຣາອິມທີ່ໄດ້ຖືກຂ້າໃນເວລານັ້ນມີສີ່ສິບສອງພັນຄົນ.

7ເຢັບທາໄດ້ປົກຄອງຊາດອິດສະຣາເອນເປັນເວລາຫົກປີ. ລາວໄດ້ຕາຍໄປແລະຖືກຝັງໄວ້ທີ່ບ້ານເກີດເມືອງນອນຂອງຕົນເອງ ໃນກີເລອາດ.

8ຕໍ່ຈາກເຢັບທາແມ່ນອິບຊັນຊາວເບັດເລເຮັມ ທີ່ໄດ້ປົກຄອງຊາດອິດສະຣາເອນ.

9ເພິ່ນມີລູກຊາຍສາມສິບຄົນ ແລະມີລູກສາວສາມສິບຄົນ. ເພິ່ນໃຫ້ລູກສາວຂອງເພິ່ນແຕ່ງງານກັບຄົນນອກເຜົ່າ ແລະນຳເອົາຍິງສາວສາມສິບຄົນ ຈາກເຜົ່າອື່ນມາແຕ່ງງານກັບພວກລູກຊາຍຂອງຕົນ. ອິບຊັນໄດ້ປົກຄອງຊາດອິດສະຣາເອນ ເປັນເວລາເຈັດປີ.

10ແລ້ວເພິ່ນກໍຕາຍໄປແລະໄດ້ຖືກຝັງໄວ້ທີ່ເບັດເລເຮັມ.

11ຫລັງຈາກອິບຊັນແມ່ນເອໂລນຄົນຢູ່ໃນເຜົ່າເຊບູໂລນ; ເພິ່ນໄດ້ປົກຄອງຊາດອິດສະຣາເອນເປັນເວລາສິບປີ.

12ແລ້ວເພິ່ນໄດ້ຕາຍໄປແລະໄດ້ຖືກຝັງໄວ້ທີ່ໄອຢາໂລນໃນເຂດແດນເຊບູໂລນ.

13ຫລັງຈາກເອໂລນກໍແມ່ນອັບໂດນ ລູກຊາຍຂອງຮິນເລນຊາວເມືອງປີຣາໂທນ ທີ່ໄດ້ປົກຄອງຊາດອິດສະຣາເອນ.

14ເພິ່ນມີລູກຊາຍສີ່ສິບຄົນ ແລະຫລານຊາຍສາມສິບຄົນທີ່ຂີ່ລໍເຈັດສິບໂຕ. ອັບໂດນໄດ້ປົກຄອງຊາດອິດສະຣາເອນເປັນເວລາແປດປີ.

15ແລ້ວເພິ່ນໄດ້ຕາຍໄປແລະໄດ້ຖືກຝັງໄວ້ທີ່ປີຣາໂທນ ຢູ່ໃນເຂດແດນຂອງເອຟຣາອິມທີ່ເນີນພູຂອງຊາວອາມາເຫຼັກ.

← Chapter 11 Jump to: Chapter 13 →