Zechariah 13

Malayalam (BSI) 2016 (സത്യവേദപുസ്തകം C.L. (BSI))

← Chapter 12 Jump to: Chapter 14 →

1അന്ന് ദാവീദുവംശജരുടെയും യെരൂശലേംനിവാസികളുടെയും പാപവും മാലിന്യവും കഴുകി വെടിപ്പാക്കാന്‍ ഒരു നീരുറവ തുറക്കും.

2സര്‍വശക്തനായ സര്‍വേശ്വരന്‍ അരുളിച്ചെയ്യുന്നു: “അന്നു വിഗ്രഹങ്ങളുടെ നാമങ്ങള്‍ ദേശത്തുനിന്നു ഞാന്‍ നീക്കം ചെയ്യും. പിന്നീട് അവയെ ആരും ഓര്‍ക്കുകയില്ല; പ്രവാചകന്മാരെയും അശുദ്ധാത്മാവിനെയും ദേശത്തുനിന്നു നീക്കിക്കളയും.

3“പിന്നീട് ആരെങ്കിലും പ്രവാചകനായി പ്രത്യക്ഷപ്പെട്ടാല്‍ സര്‍വേശ്വരന്‍റെ നാമത്തില്‍ നീ കളവു പറയുന്നതുകൊണ്ട് നീ ജീവനോടിരുന്നുകൂടാ എന്നു പറഞ്ഞുകൊണ്ട് അവന്‍റെ മാതാപിതാക്കള്‍ അവന്‍ പ്രവചിച്ചുകൊണ്ടിരിക്കുമ്പോള്‍ത്തന്നെ അവനെ കുത്തിപ്പിളര്‍ക്കും.

4അന്നു പ്രവാചകന്മാര്‍ പ്രവചിക്കുമ്പോള്‍ തങ്ങളുടെ ദര്‍ശനത്തെക്കുറിച്ചു ലജ്ജിക്കും. കബളിപ്പിക്കാനായി രോമക്കുപ്പായം അവര്‍ ധരിക്കുകയില്ല.

5പിന്നെയോ, ഞാന്‍ പ്രവാചകനല്ല; വെറും ഒരു കൃഷിക്കാരന്‍; ഈ ഭൂമി ബാല്യംമുതല്‍ എന്‍റെ കൈവശമാണ് എന്ന് അയാള്‍ പറയും.

6‘നിന്‍റെ പുറത്തു കാണുന്ന ഈ മുറിവുകള്‍ എന്ത്’ എന്ന് ആരെങ്കിലും ചോദിച്ചാല്‍ ‘എന്‍റെ സ്നേഹിതന്മാരുടെ വീട്ടില്‍വച്ച് എനിക്ക് ഏറ്റ മുറിവുകളാണിവ’ എന്ന് അയാള്‍ പറയും.”

7സര്‍വശക്തനായ സര്‍വേശ്വരന്‍ അരുളിച്ചെയ്യുന്നു: “എന്‍റെ ഇടയനെതിരെ, എന്‍റെ സമീപത്തു നില്‌ക്കുന്നവനെതിരെ; വാളേ, നീ ഉയരുക. ഇടയനെ വെട്ടുക, ആടുകള്‍ ചിതറിപ്പോകട്ടെ; ആ ചെറിയവര്‍ക്കെതിരെ ഞാന്‍ കരം ഉയര്‍ത്തും.

8ദേശത്ത് ആകെയുള്ളവരില്‍ മൂന്നില്‍ രണ്ടു ഭാഗം വിച്ഛേദിക്കപ്പെട്ട് നശിച്ചുപോകും; മൂന്നില്‍ ഒന്നു ജീവനോടെ അവശേഷിക്കും.

9ഈ മൂന്നിലൊരു ഭാഗത്തെ ഞാന്‍ തീയിലിട്ടു വെള്ളി ശുദ്ധീകരിക്കുന്നതുപോലെ ശുദ്ധീകരിക്കും. സ്വര്‍ണം ശോധന ചെയ്യുന്നതുപോലെ അവരെ ശോധന ചെയ്യും. അവര്‍ എന്‍റെ നാമം വിളിച്ചപേക്ഷിക്കും; ഞാന്‍ അവര്‍ക്ക് ഉത്തരം അരുളും. ‘അവര്‍ എന്‍റെ ജനം’ എന്നു ഞാന്‍ പറയും. ‘സര്‍വേശ്വരന്‍ ഞങ്ങളുടെ ദൈവം’ എന്ന് അവരും പറയും.”

← Chapter 12 Jump to: Chapter 14 →