Luke 10

Mossi Moore (KÃAB-PAALGÃ KOE-NOOGO)

← Chapter 9 Jump to: Chapter 11 →

1Rẽ poore, Zu-soabã leb n yãka neb pis-yopoe la a yiib a taaba, n tʋm bãmb yiib yiib tɩ b reng bãmb taoor n kẽng tẽng fãa la zĩig ning fãa bãmb meng sẽn tog n kẽngã.

2A Zezi yeela bãmb yaa: Tigsgã yaa wʋsgo la tʋmtʋmdbã sõor paoodame. Kos-y tigsgã soab tɩ b tʋm tʋmtʋmdb b tigsgẽ wã.

3Kẽng-y-yã! Ade, mam tʋmda yãmb wa piis digd-n-yĩids sʋka.

4Da zã-y ligd korgo, wall yolgo, wall neooda ye, la y ra yals n pʋʋs ned sor zug ye.

5Yãmb sã n na n kẽ yir fãa, bɩ y pʋʋs-b a woto: Bɩ laafɩ zĩnd yi-kãnga pʋga.

6La laafɩ ned sã n be be, yãmb laafɩ wã na n siga a zugu. La laafɩ ned sã n ka be, bɩ y loog ne y laafɩ pʋʋsem.

7Pa-y yi-yɛnga, n dɩ la y yũ bũmb ning sẽn be be. Bala, tʋmtʋmd toga ne a yaoodo. Da-y tegs-y yiy ye.

8Tẽng ning fãa yãmb sẽn na n kẽ tɩ b reeg yãmba, bɩ y rɩ bũmb nins b sẽn na n kõ yãmbã.

9Maag-y bãad-rãmb nins sẽn be be wã, la y yeel-b tɩ Wẽnnaam soolmã kolga bãmba.

10Tẽng ning fãa yãmb sẽn na n kẽ tɩ b ka reeg yãmba, kẽng-y tẽngã soay zut n yeele:

11Yãmb tẽngã wubsg meng sẽn bol tõnd nao wã, tõnd pĩmsd-a lame n basd ne yãmba. La baoosgo, bãng-y tɩ Wẽnnaam soolmã pẽnegame.

12Mam yeta yãmb tɩ da-kõngo, Sodom sɩbgrã toolem kõn ta tẽng kãng rẽndã ye.

13Korazin, fo na paam toogo! Betsayida, fo na paam toogo! Bala, bõn-bãn nins sẽn maan yãmb sʋkã sã n dag n maanẽ Tɩɩr ne Sɩdõ, yaa hal daar zãr la b da na n yeelg boto, la b yug b zug tompeglem n kos sugri.

14Dẽ n kɩt tɩ bʋʋdã daare, Tɩɩr ne Sɩdõ sɩbgr kõn ta yãmb dẽndã ye.

15La foom, Kapɛrnawom, b na n zẽka foom n taas saasẽ bɩ? Ayo! B na n sigsa foom hal n taas kɩɩm-kulgu.

16Ned ning sẽn kelgd yãmb kelgda maam. La ned ning sẽn zãgsd yãmb zãgsda maam. La sẽn zãgsd-a maam zãgsda sẽn tʋm-a maamã.

17Neb pis-yopoe la a yiibã lebg n waa ne sũ-noog n yeele: Zu-soaba, baa zĩn-dãmba mens sakda tõnd noor yãmb yʋʋrã yĩnga.

18A Zezi yeel-b lame: Mam dag n nee a Sʋtãan sẽn yi yĩngr n lʋɩt wa sa-yãgbo.

19La ade, mam kõo yãmb pãng tɩ y tab wiis la namse, la bɛyã pãngã fãa, la baa fʋɩ kõn tõog n maan yãmb wẽng ye.

20Baoosgo, da maan-y sũ-noogo, zĩn-dãmbã sẽn sakd yãmbã yĩng ye. Maan-y sũ-noogo, yãmb yʋɩyã sẽn gʋls arzãn pʋgẽ wã yĩnga.

21Wakat kãng bala, Sɩɩg-sõng kɩtame t'a Zezi paam sũ-no-kãseng n yeele: M ba sẽn ya arzãn la tẽng Zu-soaba, mam pẽgda yãmba, yãmb sẽn solg bõn-kãens ne yam-dãmba la yẽesem-dãmbã, n yaool n vẽneg-b ne kom-bõonegã yĩnga. N ye, m ba, yãmb sẽn dat tɩ yɩ a woto wã yĩnga.

22M ba kõo maam bũmba fãa, la ned baa a yen ka mi Bi-riblã sẽn yaa a soaba, a sã n ka a ba wã ye. La ned baa a yen ka mi ba wã sẽn yaa a soaba, sã n ka Bi-riblã bala, la ned ning Bi-riblã sẽn dat n vẽneg bãmb ne-a wã ye.

23A Zezi wẽnemdame n gom ne b karen-biisã b yen-yen n yeel-b yaa: Bark bee neb nins nin sẽn yãt bũmb nins yãmb sẽn yãtã zutu.

24Bala, mam yeta yãmb tɩ Wẽnnaam no-rɛɛsdb wʋsgo, la rĩm-dãmb dag n dat n yãa bũmb nins yãmb sẽn yãtã la b ka yã ye. B dag n dat n wʋma bũmb nins yãmb sẽn wʋmdã la b ka wʋm ye.

25La gese, tõog karen-saamb a yembr yikame n na n mak a Zezi n yeele: Karen-saamba, bõe la mam tog n maan n paam vɩɩm sẽn kõn sa wã tɩ yɩ m pʋɩɩre?

26A Zezi sok-a lame tɩ bõe la b gʋls tõodã sebrã pʋgẽ, la bõe la yẽ karemd be?

27A leokame n yeele: Nong Zu-soaba fo Wẽnnaam ne f sũur fãa, la f sɩɩg fãa, la f pãng fãa, la f tagsg fãa, la f nong f to wa f menga.

28A Zezi leok-a lame yaa: Fo leokrã yaa sõama. Maan a woto, la f na vɩɩmde.

29La yẽ sẽn dat n wilg t'a yaa tɩrga, a soka a Zezi tɩ ãnna la yẽ to?

30A Zezi leb n gomame n yeele: Dao n dag n yi Zeruzalɛm n dabd Zeriko. A tɩ lʋɩɩ fãadb sʋka, tɩ b rees a sẽn tarã, n pãb-a hal t'a kolg kũum, tɩ b bas-a n looge.

31Mikame tɩ maan-kʋʋd n dag n dɩk so-kãnga. A yãa rao wã, la a gilg n loog n bas-a lame.

32Woto me, Levit a yen taa zĩ-kãnga. A yãa rao wã, la a gilg n loog n bas-a lame.

33La Samari ned sẽn dag n togd sor taa rao wã sɛɛgẽ n yãnd-a, t'a nimbãaneg yõk-a.

34A kolga rao wã, n tɩbs a noadã ne kaam la divẽ, la a vil-b ne pɛɛla. Rẽ sẽn sa, a rɩk-a lame n zombg a meng bõn-zoambedga, n tall-a n kẽng sik zĩigẽ n tɩ ges a yelle.

35Vẽkembeoogo, a yãka deniye a yiib n kɩs sik zĩigã soab n yeel-a t'a yõdg n ges bãadã yelle, la t'a ligd sã n kẽ, a lebgre a meng na lebs-a.

36Bãmb b tãabã sʋka, bʋg n wẽnda a yaa ned ning sẽn lʋɩ-a fãadbã sʋkã to?

37Tõog karen-saambã leokame tɩ yaa ned ning sẽn zoe-a yẽ nimbãanegã. La a Zezi yeel-a lame t'a me kẽng n tɩ maan a woto. Samari nin-sõngo (10.30)

38A Zezi sẽn kẽnd ne b karen-biisã, b taa tẽng a yembre, la pag sẽn boond t'a Mart sika bãmb a yiri.

39A dag n tara ma-bi-poak sẽn boond t'a Maari. La a Maari zĩnda Zu-soabã sɛɛgẽ n kelgd bãmb goama.

40Rɩɩbã seglg yɛl toay-toayã dag n sooga a Mart tagsgã. A waame n yeel yaa: Zu-soaba, mam ma-bi-poakã sẽn bas maam m yembr tɩ m get seglgã yellã ka namsd yãmba? Dẽ wã yaa, yeel-y-yã-a t'a sõng-ma.

41Zu-soabã yeela a Mart yaa: Mart! Mart! Fo maanda yɩɩre, n sidgd ne bũmb wʋsgo.

42Bũmb a yen tãa n ya tɩlɛ. A Maari yãka pʋɩ-sõng b sẽn kõn deeg n bas-a ye.

← Chapter 9 Jump to: Chapter 11 →