Luke 7

Mossi Moore (KÃAB-PAALGÃ KOE-NOOGO)

← Chapter 6 Jump to: Chapter 8 →

1A Zezi sẽn gom gom-kãense ne neb nins sẽn da kelgd bãmba n sɛ, b kẽnga Kapɛrnawom.

2Sodaas koabg naab a ye n da tar a tʋmtʋmd nongr sẽn gãe ne bãag n kolg kũum.

3Yẽ sẽn wʋm tɩ b gomd a Zezi yelle, a tʋma Zuif-rãmbã kãsem-dãmb bãmb nengẽ tɩ b tɩ kos-b tɩ b wa n fãag a tʋmtʋmdã.

4Bãmb sẽn ta a Zezi nengẽ, b bõosa bãmb ne pẽdgr n yeele: Rao-kãngã zemsame tɩ y maan a sẽn kotã n kõ-a.

5Tɩ bõe, yẽ nonga tõnd buudã, la yaa yẽnda n me tõnd karen-doogã.

6Dẽ, a Zezi da tũuda bãmb n dabda, la b sẽn kolg yirã, sodaas koabg naabã tʋma a zo-rãmb tɩ b tɩ yeel a Zezi yaa: Zu-soaba, da nams-y y meng a woto ye. Bala, mam ka zems tɩ yãmb kẽ mam zakẽ ye.

7Yaa woto yĩng me n kɩt tɩ mam ka tags tɩ mam zemsame tɩ wa yãmb nengẽ m toorã. Yãmb ye n gom bala, la mam tʋmtʋmdã na n paama laafɩ.

8Bala, neb sẽn yɩɩd maam n so maam, tɩ mam me so sodaase. Mam sã n yeel a yen t'a kẽnge, a kẽngdame, la m yeel a to t'a wa, a watame. Mam sã n yeel m tʋmtʋmd t'a maan woto, a maanda rẽ.

9Dẽ, a Zezi sẽn wʋm gom-kãensã wã, a yɛɛsa bãmba. La b wẽnemdame n yeel neb kʋʋngã sẽn da pʋgd bãmbã yaa: Mam yeta yãmb tɩ hal baa Israyɛl pʋgẽ, mam nan ka yã tẽ-kãseng a woto ye.

10La b sẽn tʋm-b rãmbã sẽn lebg n ta yiri, b mikame tɩ tʋmtʋmda paama laafɩ.

11Vẽkembeoogo, a Zezi kẽnga tẽng a yen sẽn boond tɩ Nayin. Bãmb karen-biisã ne neb wʋsg da tũuda bãmba.

12A Zezi sẽn wa n kolg tẽngã noore, mikame tɩ neb n da tʋk kũum n dabd mumbu. Yẽ da yaa pag a yen sẽn ya pʋgkõor bi-ribl yende. La tẽngã neb wʋsg ra yãagda pagãm

13Zu-soabã yãnda pagã, t'a nimbãaneg yõk-b tɩ b yeel-a t'a ra yãb ye.

14A Zezi kolgame n tik pãndarã, la neb nins sẽn da tʋk-a wã yalsame. A Zezi yeelame yaa: Bi-bɩɩga, mam yeta foom tɩ f yiki.

15La sẽn ki-a wã yikame n zĩnd n sɩng n gomda, t'a Zezi lebs-a a ma.

16Neba fãa yɛɛsame n pẽgd Wẽnnaam n yetẽ yaa: Wẽnnaam no-rɛɛs kãseng puka tõnd sʋka, la Wẽnnaam waa n gesa b nebã.

17Nebã sẽn gom a Zezi yell woto wã, koe-kãng saaga Zude soolmã fãa ne a tẽn-kɩremsã.

18A Zã karen-biisã togsa yẽ bõn-kãens fãa.

19A Zã boola a karen-biis a yiib n tʋm-b tɩ b tɩ sok Zu-soabã n gese, yaa bãmb la sẽn tog n wa-a wã bii, bɩ bãmb tog n gũu ned a to.

20Raopã sẽn ta a Zezi nengẽ, b yeelame yaa: A Zãmbatiis tʋma tõnd yãmb nengẽ tɩ d wa sok n gese, yaa yãmb la sẽn tog n wa-a wã bii, bɩ tõnd tog n gũu ned a to?

21Wakat kãng bala, a Zezi maaga bãad-dãmb wʋsgo, koms-rãmba, la sɩ-wẽns sẽn tar-b rãmba, la b pugs zoens wʋsg nini.

22La a Zezi leok-b lame n yeele: kẽng-y n tɩ togs-y-yã a Zã bũmb nins yãmb sẽn yã la y wʋmã: Zoens nin pugsdame, wobs kẽndame, yĩn-gãong bãas sẽn tar b rãmbã yĩns lebgda sõama, wʋms wʋmdame, koe-noogã moonda naong rãmb sʋka.

23La bark bee ned ning mam sẽn kõn yɩ kug-lakdg a yĩngã zugu.

24A Zã sẽn tʋm-b rãmbã sẽn looge, a Zezi sɩngame n gom ne neb kʋʋngã a Zã yell n yeele: Yãmb kẽng n tɩ gesa bõe we-rasempʋɩɩgẽ wã? Tãnwĩig sobg sẽn miimda?

25La bõe la yãmb sẽn kẽng n tɩ gesã? Rao sẽn yer waoogr futu? Ad neb nins sẽn yer fu-bʋgsã, la b vɩ bõn neeb sʋkã bee rĩm-dãmb zagsẽ.

26La boẽ la yãmb sẽn kẽng n tɩ gesã? Wẽnnaam no-rɛɛsa? Mam yeta yãmb tɩ n-ye, la a pʋs n yɩɩda Wẽnnaam no-rɛɛsa.

27Yaa yẽ yell la b sẽn gʋls n yeel tɩ: "Gese, mam tʋmda m koe-toagsd t'a reng fo taoor n segl f waoongã."

28Mam yeta yãmb tɩ pagb sẽn dog b rãmbã sʋka, baa a yen ka be sẽn ya-a kãseng n yɩɩd a Zã ye. La baoosgo, sẽn ya-a yao-zʋʋg Wẽnnaam soolmẽ wã yaa kãseng n yɩɩd a Zã.

29Neba fãa ne yaood-dɛɛgdbã sẽn wʋm a Zã goama, b reega a Zã lisgã, n wilg tɩ Wẽnnaam yaa tɩrga.

30La Fariisẽ-dãmbã ne tõog karen-saam-dãmbã sẽn zãgs t'a Zã kõn lis bãmbã, b tõdga bũmb ning Wẽnnaam sẽn da seglg bãmb yĩngã.

31Dẽ, a Zezi kẽnga taoor n yeele: Mam na n mamsa zamaan kãngã neb ne bõe? La b wẽnda ãnna?

32Bãmb wẽnda kamb sẽn zĩ raagẽ n boond taab n yetẽ yaa: Tõnd peeba wɩɩg yãmb yĩnga, la yãmb ka sao ye. Tõnd yɩɩla kʋʋr yɩɩla, la yãmb ka yãb ye.

33Bala, a Zãmbatiis waame n ka wãbd buri, la a ka yũud divẽ ye, tɩ yãmb yetẽ tɩ zĩn n tar-a.

34Ninsaal bi-riblã sẽn wa, b rɩtame la b yũuda, tɩ yãmb yetẽ tɩ rao-kãnga yaa yão-be-neda, la rã-yũuda, la yaood-dɛɛgdbã ne yel-wẽn maandbã zoa.

35La neb nins sẽn deegd Wẽnnaam yamã miime t'a yaa yam.

36Fariisẽ a yen bõosa a Zezi tɩ b wa n dɩ ne yẽnda. A Zezi kẽe Fariisẽ wã yir n zĩnd n na dɩ.

37La gese, pag a ye n da be tẽngã pʋgẽ n ya yel-wẽn maanda. Yẽ bãngame t'a Zezi zĩi Fariisẽ wã zakẽ n dɩtẽ. Yẽ talla albatr tʋk sẽn pid ne tɩdare, n wa n yals a Zezi poorẽ, b nao wã sɛɛgẽ.

38A dag n yãbdame, n sɩng n madgd a Zezi nao wã ne a nintãma, la a da yẽesd-b ne a zoobdo, n mogsd bãmb naowã la a zãgsd-b ne tɩdarã.

39Fariisẽ ning sẽn bool a Zezi wã sẽn yã woto, a tagsa a sũurẽ n yeele: rao-kãngã sã n da yaẽ Wẽnnaam no-rɛɛsa, b rag n na bãngẽ pag ning sẽn sɩɩsd bãmbã sẽn ya ned ninga, la a sẽn ya bũmb ninga: yel-wẽn maanda.

40A Zezi goma ne a Sɩmo n yeel-a yaa: Sɩmo, mam dat n yeela foom bũmbu. T'a leok tɩ: "Karen-saamba, yeel-y-yã".

41A Zezi yeela yẽnda yaa: ned a ye n da be tɩ neb a yiib tar yẽ samde. A yembrã dag n tara deniye kobs-nu samde, t'a to wã tar pis-nu.

42La bãmb sẽn da ka tar n na yao wã, yẽ basa b yiibã fãa samã taale. Bãmb b yiibã sʋka, bʋg n na n nong yẽnda n yɩɩda?

43A Sɩmo leokame tɩ yẽ tagsdame tɩ yaa ned ning sẽn dag n tar sam-kẽeng tɩ b bas-a taalã. A Zezi yeela yẽ t'a togsa sɩda.

44Dẽ, a Zezi wẽnemda paga sẽne n yeel a Sɩmo yaa: Fo nee pʋg-kãngã? Mam kẽe fo zakẽ, la fo ka kõ maam koom tɩ m waas m nao ye. La yẽnda, a madga mam nao ne a nintãm, n yẽes-b ne a zoobdo.

45Fo ka mok maam ye, la hal mam sẽn kẽ wã tɛka, yẽ mogsda mam nao n ka basdẽ ye.

46Fo ka sõog mam zug kaam ye, la yẽnda, a waala mam nao ne tɩdare.

47Yaa woto yĩnga, mam yeta foom tɩ yẽ paama a yel-wẽna sẽn yaa wʋsgã sugri. Bala, yẽ wilga a nonglem kãsenga. La ned ning b sẽn kõt sugr bũmb bilf yĩng nonglem yaa bilfu.

48La a Zezi yeela pagã yaa: fo paama f yel-wẽna sugri.

49Neb nins sẽn n da zĩ ne bãmb n dɩtẽ wã sɩngame n tags b sũyẽ wã a woto: dao-kãngã yaa ãnna n kõt baa yel-wẽna sugri?

50La a Zezi yeela pagã yaa: fo tẽeb n fãag foom. Kẽng ne bãane.

← Chapter 6 Jump to: Chapter 8 →