Luke 13

Mossi Moore (KÃAB-PAALGÃ KOE-NOOGO)

← Chapter 12 Jump to: Chapter 14 →

1Wakat kãnga, neb kẽer waa n togsa a Zezi bũmb ning sẽn maan Galile neba, a Pilat sẽn daag b zɩɩm n kalem ne b maandã zɩɩmã.

2A Zezi leoka bãmb n yeele: Yãmb tẽedame tɩ Galile nin-kãens sẽn nams a woto wã, b yaa yel-wẽn maandb n yɩɩd Galile neb a taabã laa?

3Ayo! Mam yeta yãmb tɩ ayo. Yãmb sã n ka tek yam n kos sugri, yãmb fãa na n sãama a woto me.

4Wall neb piig la a nii Siloe gãosgã sẽn lʋɩ n bʋʋg-b n kʋ-bã, yãmb tagsdame tɩ bãmb yaa bɛɛgdb n yɩɩd Zeruzalɛm neb a taabã laa?

5Ayo! Mam yeta yãmb tɩ ayo. Yãmb sã n ka tek yam n kos sugri, yãmb fãa me na n sãama a woto.

6A Zezi wẽe yel-bũn kãngã me: Ned n dag n tar kankang sẽn sel a nasaar sib pʋʋgẽ. A waame n na n yãgs biisi, la a ka yã ye.

7Dẽ, a yeela pʋʋgã koaad yaa: "Yʋʋm a tãab moasã la mam wat n dat kankangã biisi, la m ka yãt ye. Keeg-a! Bõe yĩng t'a yãmb zĩigã zaalem?"

8Nasaar sib pʋʋgã koaad leokame n yeele: "M soaala, leb n bas-y-yã-a roandã yɛsa. Ka ne rẽ, mam na n tuume n gilg-a la m ning-a birga.

9Daar ninga a na wom biisi. La a sã n ka wome, bɩ y keeg-a".

10Zuif-rãmbã vʋʋsg daar a yembre, a Zezi dag n zãmsda neb karen-doog a yen pʋgẽ.

11La pag a yen n da be be, tɩ zĩn kɩt t'a lebg koams hal yʋʋm piig la a nii. A dag n zõrame n ka tõe n doog baa bilf ye.

12A Zezi yãa-a lame n gom ne-a n yeele: Paga, fo paama yolsg ne f komsmã.

13Bãmb tika yẽ ne b nusi. Wakat kãng bala, a roogame n kõ Wẽnnaam waoogre.

14La karen-doogã naab sũur sãama ne a Zezi sẽn maan bõn-bãnd vʋʋsg daarã, la a yeela nebã yaa: Dasem a yoob n be tʋʋm yĩnga. Wa-y da-kãens tɩ b maag-yã, tɩ da yɩt tõnd vʋʋsg daarã ye. Zu-soabã leok-a lame n yeele:

15Zãmb rãmba, yãmb ned kam fãa ka lokd a naaf a rɩɩb koglgẽ n tall n tɩ yũnug vʋʋsg daarã sɩda?

16La pʋg kãngã sẽn ya a Abraham bi-pugla, t'a Sʋtãan loe-a hal yʋʋm piig la a nii wã, d ka tog n lok-a vʋʋsg daare?

17A Zezi sẽn gom a woto, yãnd yõka b bɛɛba fãa, la neb kʋʋngã maanda sũ-noog bũmb nins fãa a Zezi sẽn maan tɩ be ziirã yĩnga.

18A Zezi leb n yeelame yaa: Wẽnnaam soolma wẽnda bõe, la m na n mams-a-la ne bõe?

19A wẽnda wa siin-bil ned sẽn dɩk n lob a zẽed zĩigẽ. A yitame n lebg tɩɩga, la yĩngr liuuli vɩɩ a wilẽ wã.

20B leb n yeelame: Mam na n mamsa Wẽnnaam soolmã ne bõe?

21A wẽnda rã-bɩll pag sẽn dɩk n ning zom wam a tãabo, hal tɩ zom-nagdgã fãa wuki.

22A Zezi da pɩʋʋgda tẽn-bɛd la tẽn-bõonego, n zãmsd nebã la b dabd Zeruzalɛm.

23Ned n sok bãmb yaa: Zu-soaba, yaa neb bilf bal n na n paam fãagre? A Zezi leoka bãmb n yeele:

24Nang-y pãng n tũ digno-sẽkã n kẽ. Bala, mam yeta yãmb tɩ neb wʋsg na n baoome tɩ kẽ la b ka na n tõog ye.

25Yirã soab sã n yik n pag rignoorã, tɩ yãmb pa yɩng n sɩng n kabsdẽ la y yet Zu-soabã tɩ b pak tɩ y kẽ, b na n leoka yãmb tɩ b ka mi yãmb sẽn yitẽ ye.

26Dẽ, yãmb na n sɩngame n yeele: "Tõnd dɩɩ ne yãmba la d yũ ne yãmba, la yãmb zãmsa neb tõnd soaya zutu."

27La b na n leoka yãmb n yeele: "Mam ka mi yãmb sẽn yitẽ ye. Zãag-y ne maam, yãmb fãa sẽn tʋmd ka-tɩrlem tʋʋma."

28Yãmb sã n yã a Abraham, la a Izak, la a Zakob ne Wẽnnaam no-rɛɛsdbã fãa Wẽnnaam soolmã pʋgẽ, tɩ b yaool n lob yãmb yɩnga, nintãm ne yẽn wãbr na zĩnd be.

29Neb na n yii yaang la taoore, dɩtg la goabga, n zĩnd n dɩ Wẽnnaam soolmã pʋgẽ.

30La gese, poorẽ dãmb n be n na n yɩ dẽenem dãmba, tɩ dẽenem dãmb me yɩ poorẽ dãmba.

31Wakat kãnga, Fariisẽ-dãmbã kẽer waa n yeela a Zezi yaa: Kẽng n looge! Yi ka, bala, Herood dat n kʋʋ foom.

32A Zezi yeela bãmb yaa: Kẽng n tɩ yeel-y bõn-bɛɛgã tɩ mam digda zĩn-dãmba, la m maagd bãad-dãmb rũnna la beooge. La ra-yɩt na n yɩɩ baoosg daar ne maam.

33La yaa tɩlɛ tɩ mam kẽn dũnna, la beoogo, la dayɩta. Bala, a ka zems tɩ Wẽnnaam no-rɛɛs ki zĩig a to tɩ ka Zeruzalɛm ye.

34Zeruzalɛm! Zeruzalɛm! Fo sẽn kʋʋd Wẽnnaam no-rɛɛsdba, la f lobd neb nins Wẽnnaam sẽn tʋm fo nengẽ wã kugã, naoor a wãn la mam dag n tʋlg n tigs fo kambã wa no-yãang sẽn põgended a kamb a pɩgsẽ? La yãmb ka ralg ye.

35Gese, b na n basa yãmb ne y roogã. La mam yeta yãmb tɩ yãmb ka na n leb n yã maam yɛsa, hal tɩ ta daar ning yãmb sẽn na n yeel tɩ: "Bark bee ned ning sẽn wat ne Zu-soabã yʋʋrã zugu."

← Chapter 12 Jump to: Chapter 14 →