Luke 4

Mossi Moore (KÃAB-PAALGÃ KOE-NOOGO)

← Chapter 3 Jump to: Chapter 5 →

1A Zezi sẽn pid ne Sɩɩg-sõngo, bãmb yii Zʋrdẽ n lebg n wa, la Sɩɩgã talla bãmb n kẽng weoogẽ.

2La rõatã maka bãmb beene dasem pis-naase. La dasem kãens pʋgẽ, bãmb ka tol n dɩ bũmb ye. La rẽ sẽn looge, kom yaool n yõka bãmba.

3Dẽ, rõata yeela bãmb yaa: Yãmb sã n yaa Wẽnnaam Bi-ribla, bɩ y yeel kug-kãensã tɩ b lebg buri.

4La a Zezi leoka yẽnda t'a gʋlsame tɩ: Ninsaal kõn vɩ ne rɩɩb bal ye.

5Rõata talla bãmb n dʋ yĩngr n paase, n wilg bãmb dũniyã soolem dãmbã nif kamsg pʋgẽ,

6n yeel-b yaa: Mam na n kõo yãmb dũni naamã fãa, ne soolem kãensã ziirã, bala, b kõ-a-la maam, la mam kõt-a la m sẽn dat a soaba.

7Dẽ, yãmb sã n wõgemd mam taoore, a fãa na n lebga yãmb n so.

8A Zezi leok-a lame n yeele: B gʋlsame yaa: "Waoog Zu-soaba, fo Wẽnnaam, la f pʋʋs bãmb b yen bala."

9Rõata leb n talla a Zezi yɛs n kẽng Zeruzalɛm, n yals bãmb wẽnd-doogã zug n yeel-ba: Yãmb sã n yaa Wẽnnaam Bi-ribla, bɩ y yɩk ka n tiimd tẽnga.

10Bala, b gʋlsame tɩ: "Bãmb na n yeela b malegsã tɩ b gũ yãmba,

11la malegsã na n zãa yãmb ne b nusi, sẽn na n yɩl tɩ yãmb naoor da wa n lak kugr ye."

12A Zezi leoka yẽnda tɩ b gʋlsame tɩ: Ra mak Zu-soaba, fo Wẽnnaamã ye.

13Rõata sẽn mak a Zezi ne makr buud toor-toor n sɛ, a loogame n bas bãmba, hal tɩ ta a sẽn na n le paam weer a to n mak-ba.

14A Zezi lebg n leba Galile ne Sɩɩg-sõngã pãnga. La bãmb yʋʋrã saaga soolmã fãa.

15A Zezi da zãmsda nebã karen-dot pʋse, la nebã fãa ra pẽgda bãmba.

16A Zezi kẽnga Nazarɛt, tẽng ning b sẽn dag n wub bãmbã. La vʋʋsg daare, bãmb kẽe karen-doogẽ wã wa bãmb sẽn minim n maandẽ wã. Bãmb yikame n na n karem.

17La b kõo bãmb Wẽnnaam no-rɛɛs a Ezayi sebre. Bãmb laka sebrã, n yã zĩig ning b sẽn da gʋls n yeel tɩ:

18Zu-soabã Sɩɩg bee mam zugu, tɩ bõe, b pʋdga b kaam mam zugu, tɩ m tõe n bels sũ-sãoong rãmba, tɩ m togs naong rãmbã koe-noogã. Bãmb tʋma maam tɩ m tʋg n moon yemsã yolsg koɛɛga, la m moon n togs zoensã, tɩ b na n leb n paama b nini, tɩ m kɩt tɩ neb nins b sẽn namsdã loog ne lohorem,

19tɩ m moon bark yʋʋmd Zu-soabã sẽn kõtã.

20A Zezi pila sebrã n kɩs tʋmtʋmdã la b zĩndi. Neba fãa sẽn be karen-doogẽ wã da geta bãmba.

21A Zezi sɩngame n gom ne-b n yeele: Gʋls-sõng kãngã yãmb sẽn wʋm moas-moasã wã paama pidsg rũnna.

22La nebã fãa da kɩta bãmb kaset n pẽgd bãmba, gom-sõamy nins sẽn dag n yit bãmb noorẽ wã yĩnga, la b sokdẽ tɩ bãmb ka a Zozɛf biigã wɛ?

23A Zezi yeel-b lame yaa: Mam miime tɩ yãmb na n wẽe maam yel-bũn kãnga: Tɩpa, tɩp f meng f toor n sãooge, la: bɩ y maan bũmb nins fãa yãmb sẽn maan Kapɛrnawom tɩ tõnd wʋmã, y tẽngẽ ka.

24A Zezi leb n yeel-b lame yaa: Sɩda, mam yeta yãmb tɩ Wẽnnaam no-rɛɛs baa a yen zɩ n paam tɩ b reeg-a sõama a meng tẽngẽ ye.

25Mam yeta yãmb sɩd t'a Eli wakate, yĩngr sẽn pag tɩ saag ka ni yʋʋm a tãab la kiis a yoobe, tɩ kom kãseng kẽ tẽngã fãa wã, pʋgkõap wʋsg n da be Israyɛl.

26Baoosgo, Wẽnnaam ka tʋm a Eli pʋgkõor baa a yen nengẽ, sã n ka Sɩdõ soolem pʋgkõor a yembr sẽn dag n be Sarɛpta nengẽ bala.

27La Wẽnnaam no-rɛɛs a Elize wakate, yĩn-gãong bãas sẽn tar b rãmbã me ra yaa wʋsg Israyɛl. La baoosgo, baa a yen bãmb sʋkã ka paam yɩlgr ye, sã n ka Siiri rao a Naama bala.

28Neba fãa sẽn dag n be karen-doogẽ wã sẽn wʋm gom kãensã, b sũyã puugame.

29Bãmb yikame n veo a Zezi n yiis tẽngã, n tall-b n tɩ ta tãn-puuf ning bãmb tẽngã sẽn tiẽ wã zugu, n na n tus bãmb tɩ b yi tãngã zug n lʋɩ.

30La a Zezi tũu bãmb sʋk bal n looge.

31A Zezi kẽnga Kapɛrnawom, Galile tẽng a ye, la bãmb dag n zãmsda nebã Zuif-rãmbã vʋʋsg raare.

32La bãmb zãmsgã yɛɛsa nebã. Bala, bãmb da zãmsda ne noore.

33Dao a yen n da be karen-doogẽ wã tɩ zĩn-dẽgd tar-a.

34A kelma ne pãng n yeele: Hey! Nazarɛt dao a Zezi, yãmb data tõnd ne bõe? Yãmb waame n na n sãam tõnd laa? Mam mii yãmb sẽn ya ned ninga. Yãmb yaa Wẽnnaam sõmblem soaba.

35A Zezi tãsa yẽnda n yeel-a t'a sĩndi, la a yi n bas rao wã. Zĩnã luba daowã nebã sʋka, la a yi n bas-a n ka maan-a wẽng baa bilfu.

36Nebã fãa yɛɛsame n gomd ne taab n yetẽ tɩ koe-kãngã yaa bõe koɛɛga? Bãmb tara noor la pãnga, tɩ b sã n yeel zĩn-dãmb nins sẽn ya rẽgdã tɩ b yi, b yitame.

37La a Zezi yʋʋrã dag n saagda soolmã fãa.

38A Zezi sẽn yi karen-doogẽ wã, b kẽnga a Sɩmo yiri. A Sɩmo reem-poakã yĩns ra wɩnga hal wʋsgo, la b kosa a Zezi tɩ b maag-a.

39A Zezi sulga a zugẽ n tãs yĩn-wɩngrã, la a yĩn-wɩngrã sigame. La wakat kãng bala, a yikame n maan-b sãando.

40Wĩndg sẽn kẽ, neb nins fãa sẽn dag n tar bãad-dãmba, bãas buud toay-toay sẽn tara, tall-b lame n wa a Zezi nengẽ. A Zezi tika bãmb ned kam fãa ne b nusi, n maag-ba.

41Zĩn-dãmb me dag n yit n basda neb wʋsgo, la b kelemdẽ n yetẽ tɩ: Yãmb yaa Wẽnnaam Bi-ribla. La a Zezi da tãsda bãmba, n gɩdgd-b tɩ b ra gom ye. Bala, zĩn-dãmbã ra miime t'a Zezi yaa Kiristã.

42Beoogã sẽn vẽege, bãmb yiime n kẽng zĩig sẽn ya we-rasempʋɩɩgẽ. Neb kʋʋng sɩngame n gẽesd bãmba, n wa n ta bãmb nengẽ. B dag n datame n gɩdg a Zezi tɩ b da loog n bas-b ye.

43La a Zezi yeel-b lame tɩ yaa tɩlɛ tɩ bãmb moon Wẽnnaam soolem koe-noogã tẽms a taabã me. Bala, yaa bõn-kãng yĩng la b sẽn tʋm bãmbã.

44La a Zezi da moonda koe-noogã Galile karen-dotã pʋse.

← Chapter 3 Jump to: Chapter 5 →