Luke 16

Mossi Moore (KÃAB-PAALGÃ KOE-NOOGO)

← Chapter 15 Jump to: Chapter 17 →

1A Zezi yeela b karen-biisã me yaa: Arzɛk soab a yembr n da n be n tar a tʋʋm taoor soaba, la b togs-a lame t'a tʋmtʋmdã sãamda yẽ paoongã.

2Yẽ boola tʋʋma taoor soab n yeel-a yaa: "Bõe tɩ b gomd fo yell a woto tɩ mam wʋmdẽ? Wilg maam fo tʋʋma sẽn yɩ to-to. Bala, fo ka na n le yɩ mam tʋʋma taoor soab ye."

3Tʋʋma taoor soab tagsa a sũurẽ n yeele: "Mam zu-soabã sẽn dat n yiis maam tʋʋmdẽ wã, mam na n maana boẽ? Koobo? Mam ka tar pãng n na n ko ye, la bõsg yaa yãnd ne maam.

4Mam mii m sẽn na n maanega, tɩ b sã n wa n yiis maam m tʋʋmdẽ wã, bɩ neb deeg maam b yiyã".

5Dẽ, yẽ kɩtame tɩ b bool a zu-soaba sam-dãmbã yembr yembre, n yeel pipi soabã yaa: "Fo tara mam zu-soaba samd wãna?"

6T'a leok tɩ kaam rʋg-bɛd koabga. La a yeela yẽ t'a reeg a sebrã n zĩnd tao-tao n gʋls tɩ pis-nu.

7Yẽ leb n soka a to yaa: "La fo yẽ samdã yaa wãna?" Tɩ yẽ leok tɩ kood yond kobs-nu. La a yeela yẽ t'a reeg a sebrã n gʋls tɩ kobs-naase.

8La a zu-soaba pẽga a tʋʋma taoor soab sẽn ka tɩrgã a sẽn maan yama yĩnga. Bala, dũni kanga neb maanda yam ne taaba, n yɩɩd vẽenem kambã.

9La mam yeta yãmb tɩ y rɩk dũni paoongã n bao zo-rãmba, tɩ paoongã sã n wa n sɛ n bas yãmba, bɩ Wẽnnaam reeg yãmb yiy sẽn paad wakat sẽn kõn sa wã pʋgẽ.

10Ned ning sẽn maand sɩd bõn-bõoneg pʋse, a maanda sɩd bõn-kãsems pʋse. La ned ninga sẽn ka maand sɩd bõn-bõoneg pʋs ka na n maan sɩd bõn-kãsens pʋs me ye.

11Dẽ, yãmb sã n ka maan sɩd ne dũniyã arzegse, ãnna n na n dɩk paoong sɩd-sɩd n gũnug yãmba?

12La yãmb sã n ka maan sɩd ne ned a to paoongo, ãnna n na n kõ yãmb y meng rẽnda?

13Tʋmtʋmd baa a ye ka be n tõe n sak zu-soben-dãmb a yiib ye. Bala, yẽ na n kisga a yen la a nong a to wã, wall a waoog a yen la a paoog a to wã. Yãmb ka tõe sak Wẽnnaam la ligd me ye.

14Fariisẽ-dãmbã sẽn da nong ligdã ra kelgda bõn-kãensã fãa la b ra yaanda a Zezi.

15A Zezi yeel-b lame yaa: yãmb yaa neb sẽn wilgd nebã tɩ y yaa tɩrse. La Wẽnnaam mii yãmb sũyã. Bala, bũmb ning neba sẽn pẽgd wʋsgã yaa bõn-wẽng Wẽnnaam nifẽ.

16Hal tɩ ta a Zã wakate, dag n yaa tõogã ne no-rɛɛsdbã wakate. La sẽn sɩng ne a Zã wakatã, b moonda Wẽnnaam soolem koe-noogã, la ned kam fãa nangda pãng n dat n kẽ be.

17Yĩngr la tẽng loogr yaa naana n yɩɩd tõogã kargr a yen menengo.

18Ned ning fãa sẽn dig a pag la a rɩk a to, maanda yoobo. La ned ning fãa sẽn dɩk paga a sɩd sẽn dig maanda yoobo.

19Rao a ye n da be n ya arzɛk soaba, n yeelgd fu-sõama sẽn ya neeba. La daar fãa, a tara bũmb fãa tɩ seke, t'a vɩɩma ya noog wʋsgo.

20Naong soab a yen sẽn boond t'a Lazaar dag n gãee arzɛk soabã zak noore. La a yĩnga fãa da pida ne noada.

21A rag n nongẽ lame n paam rɩ-zeremsã sẽn yit arzɛk soaba taabl zug n lʋɩtẽ wã n dɩ. La sẽn paase, baasã wat n lelemda a noadã.

22Naong soabã wa n kiime. La malegsã talla yẽ n kẽng a Abraham nengẽ. La arzɛk soabã me wa n kiime, la b mum-a lame.

23Kɩɩm-kulgã pʋgẽ, yẽ nak n gesame. La a namsgã pʋgẽ, a tool n yãa a Abraham yɩɩga, t'a Lazaar be ne-a.

24Yẽ zẽka a koɛɛg n yeel: "M ba a Abraham! Zoe-y mam nimbãanega, n tʋm a Lazaar t'a tẽk a nug-bil koomẽ n wa n wʋlg m zelemdã. Bala, mam namsda wʋsg bug-kãnga pʋgẽ."

25A Abraham leoka yẽ n yeele: "M biiga, bɩ f tẽeg tɩ fo paama arzegs f vɩɩmã wakate, la t'a Lazaar paama toodo. La moasã, yẽ paamda belsg ka, tɩ fo be toog pʋgẽ.

26La rẽ fãa sẽn yãk a toogo, bok-kãseng n be tõnd ne yãmb suka, sẽn na n yɩl tɩ neb nins sẽn dat n yi ka n wa yãmb nengẽ wã ra tõog ye, la tɩ sẽn be-b yãmb nengẽ wã me ra tõog n wa tõnd nengẽ ye".

27Arzɛk soabã yeelame yaa: "Sã n ya a woto, m ba, mam kota yãmb tɩ y tʋm a Lazaar mam ba wã yiri.

28Bala mam tara ba-bi-raop a nu. Bɩ a kẽng n tɩ kɩs bãmb kaset tɩ b ra wa n wa zĩ-kãnga sẽn ya namsg zĩigã ye".

29A Abraham leokame tɩ b tara a Moyiis ne Wẽnnaam no-rɛɛsdbã, la b kelg bãmba.

30La arzɛk soabã yeelame yaa: "Ayo, m ba a Abraham! La ned sẽn ki sã n vʋʋg n kẽng bãmb nengẽ, b na n teka yam n kos sugri."

31La Abraham leoka yẽ yaa: "Bãmb sã n ka kelg a Moyiis ne Wẽnnaam no-rɛɛsdbã, baa ned sẽn ki sã n vʋʋge, b kõn tẽ-a ye." A Lazaar ne arzɛk soabã (16.19)

← Chapter 15 Jump to: Chapter 17 →