Luke 24

Mossi Moore (KÃAB-PAALGÃ KOE-NOOGO)

← Chapter 23 Jump to:

1Dimaas daar yibeoog pĩnda, pagbã talla ka-rambã b sẽn da seglã n kẽng yaoogẽ wã.

2B mikame tɩ b bilga kugrã n bas yaoogã noore.

3Bãmb kẽeme la b ka yã Zu-soab a Zezi kũumã ye

4Bãmb sẽn da ka mi b sẽn tagsd tɩ bũmb ningã, ade, raop a yiib sẽn yer fut sẽn pɩnd puka b meng ne bãmba.

5Rabeem yõka bãmb tɩ b yĩgimd n sulg b nens tẽnga. La raopã yeel-b lame yaa: Yaa bõe tɩ yãmb baood nin-vɩɩg kũum sʋka?

6Bãmb ka be ka ye, b vʋʋgame. Tẽeg-y bũmb ning bãmb sẽn da gom ne yãmb b sẽn da ket n be Galile wã.

7B yeelame tɩ yaa tɩlɛ tɩ b zãmb Ninsaal Bi-riblã n yõk n kõ yel-wẽn maandbã tɩ b ka-b da-pɩk zugu, la tɩ rasem a tãab daare bãmb na n vʋʋgame.

8La pagbã tẽega a Zezi goama.

9La bãmb yii yaoogẽ wã n kẽng n tɩ togs karen-biis piig la a yembrã ne neb a taabã fãa bõn-kãens fãa.

10Da yaa a Maari sẽn yit Magdala, ne a Zan la a Zak ma a Maari, n paas pagb a taab sẽn da be ne bãmbã n tɩ togs tʋmtʋmdbã bõn-kãnga.

11La tʋmtʋmdbã tagsame tɩ pagbã sẽn da gomdã yaa zʋbsgo la b ka tẽ-b ye.

12La a Pɩyɛɛr yikame n wudg n kẽng yaoogẽ wã. Yẽ sẽn zõonde, a ka yã bũmb tɩ sã n ka pɛɛlã sẽn dʋr tẽngã. La bũmb ninga sẽn maana yɛɛsa yẽ, la a lebg n leba a yiri.

13La mikame tɩ badaare, karen-biis a yiib n da rabd tẽn-bil a yen sẽn boond tɩ Emayus, n zems kɩlometr piig la a yembr ne Zeruzalɛm.

14Bãmb da gomda bũmb nins fãa sẽn maanã yell ne taaba.

15La bãmb sẽn gomd n kɩɩsd taaba, a Zezi meng waame n kẽn ne bãmba.

16La bãmb yam ludame tɩ b ka bãng a Zezi ye.

17A Zezi soka bãmb tɩ yaa bõe yell la b gomd ne taab la b kẽnda. La b yalsame tɩ b nensã gãnem.

18La bãmb ned a yen sẽn boond t'a Keleopaas soka a Zezi yaa: Yãmb y yen bal n be Zeruzalɛm n ka bãng bũmb ninga sẽn maan be rasmã noorã?

19A Zezi soka bãmb tɩ yaa bõe yelle. La b leoka bãmb yaa: Yell ning sẽn paam Nazarɛt dao a Zezi wã. Sẽn da yaa Wẽnnaam no-rɛɛs sẽn tar pãng ne b tʋʋma la b goama, Wẽnnaam la nebã fãa taoorã.

20Tɩ tõnd maan-kʋʋdbã kãsem-dãmb ne tõnd nanamsã sẽn yɩ to-to n yõk bãmb n kɩs tɩ b kao b bʋʋd n yeel tɩ b zemsa kũuma, n ka-b da-pɩk zugã.

21Tõnd da tẽedame tɩ yaa bãmb n na n fãag Israyɛl, la sẽn paas rẽ fãa, ad yaa rasem a tãab rũnna la bõn-kãens maan-yã.

22Yaa sɩd tɩ pagb kẽer sẽn be tõnd sʋk yɛɛsa tõnd wʋsgo. B kẽnga yaoogẽ wã yibeoogẽ pĩnda,

23n tɩ ka yã a Zezi kũuma ye. B waa n yeelame tɩ malegs n puk b mens ne bãmba, n yeel bãmb t'a Zezi vɩɩme.

24La neb kẽer sẽn da be ne tõndã kẽnga yaoogẽ wã n tɩ mik tɩ bũmba fãa yaa wa pagbã sẽn dag togsã bala. La bãmb ka yãnd a Zezi ye.

25Dẽ, a Zezi yeel-b lame yaa: Neb yam sẽn ka weke, yãmb ka tẽed bũmb nins fãa Wẽnnaam no-rɛɛsdbã sẽn togsã tao-tao ye!

26Dẽ yĩnga, Kirist dag n ka tog n nams a woto n yaool n deeg b naamã sɩda?

27A Zezi bilga bãmb bũmb nins sẽn be gʋls-sõamyã fãa pʋgẽ n gomd bãmb yellã, sẽn sɩng ne a Moyiis tɩ ta Wẽnnaam no-rɛɛsdbã fãa.

28La b sẽn kolg tẽn-bil ninga bãmb sẽn da rabdã, a Zezi maana wa bãmb dat n taa taoore.

29La karen-biis a yiibã pẽdga bãmb n yeel tɩ b pa ne bãmba, bala, yʋng kolgame la wĩndgã dat n kẽeme. A Zezi kẽe n siga ne bãmba.

30A Zezi sẽn zĩ ne bãmb n na n dɩ, b rɩka burã n pʋʋs Wẽnnaam bark n kao-a n kõ bãmba.

31Dẽ, karen-biisã yama vẽnegame tɩ b bãng tɩ yaa a Zezi, la a Zezi menema bãmb taoor bala.

32La bãmb goma ne taab n yeel yaa: Bãmb sẽn da gomd ne tõnd sorã zug la b bilgid tõnd gʋls-sõamyã, tõnd ka paam sũ-no-kãseng sɩda?

33La bãmb yika wakat kãng bal n leb Zeruzalɛm n tɩ yã karen-biis piig la a yembrã ne b tũud-n-taas sẽn tigim taaba,

34la b yeela bãmb tɩ hakɩɩka! Zu-soaba vʋʋgame la b vẽnega b meng ne a Sɩmo.

35Bãmb me togsa bũmb ning sẽn maan bãmb sorã zugã, la bãmb sẽn bãng a Zezi to-to b sẽn wa n kaood burã.

36Bãmb sẽn da ket n gomd a woto, a Zezi meng puka bãmb sʋk n yeel-b yaa: Bɩ laafɩ zĩnd ne yãmba.

37Dabeem yõka bãmb la b yɛɛsame n tẽed tɩ b yãa kɩɩma.

38La a Zezi yeel-b lame yaa: Bõe yĩng tɩ yãmb yɛɛsdẽ, la yaa bõe tɩ y sãmbd y sũyã pʋsẽ a woto?

39Ges-y mam nusã la m nao wã. Yaa maam bala, Sɩɩs-y maam n gese. Kɩɩm ka tar nemd wall kõab wa mam sẽn tarã ye.

40A Zezi sẽn gom a woto, b wilga karen-biisã b nusã la b nao wã.

41Karen-biisã sẽn ket n ka tẽeda, b sũ-nooga yĩnga, la sẽn ya lingr ne bãmbã, a Zezi sok-b lame b sã n tara rɩɩb be sẽn na rɩ.

42Bãmb kõo a Zezi zĩm-sẽedgo ne sɩɩd bilfu.

43A Zezi reeg-a lame n dɩ bãmb nifẽ.

44Dẽ poore, a Zezi yeel-b lame yaa: Bũmb ninga mam sẽn da togs yãmb mam sẽn dag n ket n be ne yãmba la woto: Ra yaa tɩlɛ tɩ bũmb nins fãa sẽn gʋls a Moyiis tõoga pʋgẽ la Wẽnnaam no-rɛɛsdbã sɛb pʋsã la yɩɩn-sõamyã pʋgẽ n gomd mam yellã paam pidsgu.

45Dẽ, a Zezi vẽnega b yamã tɩ b tõog wʋm Wẽnnaam gʋls sõamyã võore.

46La a Zezi yeel-b lame yaa: Woto b gʋlsame n yeel tɩ Kiristã tog n namsame la tɩ b na n vʋʋg n basa kũum rasem a tãab daare.

47La tɩ sẽn sɩng ne Zeruzalɛm, b na n moona yam tekr koɛɛg buuda fãa sʋk ne bãmb yʋʋr tɩ b tõe n paam yel-wẽna sʋgri.

48Yãmb yaa bõn-kãng kaset-dãmba.

49La ade, mam na n tʋma yãmb bũmb ninga m ba sẽn dag n kãabã, t'a wa yãmb zutu. Pa-y Zeruzalɛm hal tɩ y deeg pãng sẽn yit yĩngri.

50La a Zezi peega bãmb n kẽng Betani sẽne, la b zẽka b nus n ning karen-biisã zut barka.

51La barkã ningr wakate, a Zezi basa karen-biisã n zẽk n kẽng arzãna.

52La karen-biisã waooga a Zezi, la b leb Zeruzalɛm ne sũ-no-kãsenga.

53La bãmb bee wẽnd-doogã pʋg wakat fãa n pẽgd Wẽnnaam.

← Chapter 23 Jump to: