Luke 23

Mossi Moore (KÃAB-PAALGÃ KOE-NOOGO)

← Chapter 22 Jump to: Chapter 24 →

1Bãmb fãa yikame n tall a Zezi n kẽng a Pilat taoore.

2B sɩngame n dõd a Zezi n yeel yaa: Tõnd yãa rao-kãnga t'a rãmbd tõnd tẽngã n yetẽ tɩ b ra yao a Sezaar yõor yaood ye. La a yetẽ tɩ yẽ menga yaa Kiristã, la rĩma.

3A Pilat soka a Zezi a woto: Yãmb yaa Zuif-rãmba rĩma? T'a Zezi leok-a: Yaa wa yãmb sẽn yeelã.

4A Pilat yeela maan-kʋʋdba kãsem-dãmb ne neb kʋʋngã tɩ yẽ ka yã bõn-wẽng ne rao-kãngã sẽn na kɩt tɩ b sɩbg-a ye.

5La nebã kẽnga taoor n kell n yeel yaa: Zãmsgã bãmb sẽn sɩng Galile n Zãms nebã Zude fãa hal tɩ ta ka wã wata ne rãmbg nebã sʋka.

6A Pilat sẽn wʋm bõn-kãnga, yẽ sokame n dat n bãng rao wã sã n yaa Galile neda.

7La a Pilat sẽn wʋm t'a Zezi yaa Herood soolma neda, a tʋma bãmb a nengẽ. A Herood me rag n bee Zeruzalɛm wakat kãnga.

8Herood sẽn yãnd a Zezi, a paama sũ-no-kãsenga, bala, yẽ rag n wʋmame tɩ b gomd b yelle, la hal daar zãra, yẽ rag n dat n yãa a Zezi. La a rag n tẽedame t'a Zezi na n maana bõn-bãnd t'a yãnde.

9Herood soka bãmb bũmb wʋsgo, la a Zezi ka leok yẽ tɩ bũmb ye.

10Maan-kʋʋdbã kãsem-dãmbã ne tõog karen-saam-dãmba yalsa be n dõd a Zezi b pãng tɛka.

11Herood ne a sodaasã paooga a Zezi, n yaal-ba, n yeelg-b fu-neere la a lebs-b a Pilat nengẽ.

12Badaar bala, a Pilat ne Herood sẽn dag n ya beemã lebga zoodo.

13A Pilat tigma maan-kʋʋdba kãsem-dãmba la nanamse ne nebã

14n yeel-b yaa: Yãmb talla rao-kãnga n wa mam nengẽ n yeel t'a yaa tẽn-dãmbda. Ade, mam sok-a-la yãmb taoore la mam ka yã t'a maana tʋʋm-wẽns nins yãmb sẽn dõt-a wã ba a yembr ye.

15Herood me ka yã bõn-wẽng ne-a ye, bala, bãmb lebs n tʋm-a-la tõnd nengẽ. Ade, rao-kãnga ka maan bũmb sẽn tog ne kũum ye.

16Dẽ, mam na n kɩtame tɩ b sɩbg-a-la m bas-a.

17Kibs fãa, rag n yaa tɩlɛ t'a Pilat yiis bi-bɛɛg a ye n bas n kõ nebã.

18Bãmb fãa naaga taab n kelem n yeel tɩ b kʋ rao-kãnga la b yiis a Barabas n kõ-ba.

19B ra kẽesa a Barabas bi-bees roogẽ tẽn-dãmbg sẽn dag n zĩnd tẽngã pʋgẽ wã poorẽ, la a sẽn kʋ ned yĩnga.

20A Pilat leb n goma ne nebã, n dat n bas a Zezi.

21La nebã ra kelemdame n yetẽ: Ka-y-b da-pɩk zugu! Ka-y bãmb da-pɩk zugu!

22A Pilat leb n yeela bãmb naoor a tãab soab yaa: La bãmb maana bõe sẽn ya wẽnga? Mam ka yã bũmb b sẽn maane, n tog kʋʋb ye. Dẽ wã mam na n kɩtame tɩ b sɩbg-ba la m bas-ba.

23La neba zẽka b koees wʋsg n kos tɩ b ka a Zezi da-pɩk zugu. La b kelemsã tõogame t'a Pilat tũ b sẽn datã.

24A Pilat kaoo bʋʋdã tɩ yɩ wa nebã sẽn kosã.

25Yẽ basa ned ninga nebã sẽn kosã, a soab b sẽn dag n kẽes bi-bees roog tẽn-dãmbgo, la nin-kʋʋr yĩngã. La a rɩk a Zezi n kɩs-b tɩ b maan b sẽn dat ne-ba.

26La bãmb sẽn tall a Zezi n loogdẽ, bãmb yõka dao a yen sẽn yi weoogẽ n kuiisẽ. A yʋʋr la Sɩmo. B kɩtame t'a tʋk da-pɩkã n pʋg a Zezi.

27Neb kʋʋng wʋsgo, raop la pagb dag n pʋgda a Zezi. La pagbã da yãbdame, n wiisdẽ, n pĩisd b gɛy a Zezi yĩnga.

28A Zezi wẽnegame n yeel pagbã yaa: Zeruzalɛm pagba, da yãb-y mam yĩng ye. Yãb-y y mense, la y kamb yĩnga.

29Bala, bãng-y tɩ ray n wate, tɩ b na n yeel tɩ pʋg-kiyã la sẽn ka tol n dog-bã, la sẽn ka yẽsem-b kambã n tar sũ-noogo.

30La nebã na n sɩng n yeela tãmsa tɩ b sirg n põd-ba, la b yeel kũnkuba tɩ b lill bãmba.

31Bala, b sã n maand ra-maas a woto, b na n maana ra-koeemsã wãn-wãna?

32B rag tara nin-wẽns a yiib n kẽnd n na tɩ lagem ne a Zezi n kʋ.

33La bãmb sẽn ta zĩig ninga b sẽn boond tɩ zu-wangã, b kaa a Zezi da-pɩkã zug be, ne nin-wẽns a yiibã: A yembr b rɩtgo a to wã b goabga.

34A Zezi yeelame yaa: M ba, kõ-y-b sugri, tɩ b ka mi bũmb ninga b sẽn maandã ye. La bãmb maana bãnd n pʋɩ a Zezi futã ne taaba.

35Nebã rag yasa be n getẽ. La tẽnga nanamsa ra yaanda a Zezi n yetẽ: B fãaga neb a taaba, bãmb sã n yaa Kiristã, Wẽnnaam sẽn yãk a soabã, bɩ b fãag b menga.

36Sodaasã me kolgame n yaal a Zezi, la b kõ-b divẽ miisga,

37n yeel a Zezi yaa: Yãmb sã n yaa Zuif-rãmbã rĩma, bɩ y fãag y meng y toore.

38B ra gʋlsa a woto bãmb zugẽ: Nin-kãnga yaa Zuif-rãmbã rĩma.

39Nin-wẽnsã sẽn dag n be da-pɩgsã zutã ned a yen tʋʋsa a Zezi n yeel-b tɩ ka bãmb la Kiristã laa? Tɩ b fãag b meng la b fãag bãmba.

40La a to wã lenga yẽnda n yeel-a yaa: Fo ka zoet Wẽnnaam laa? Fo sɩbgrã sẽn ya yembr ne bãmb sɩbgrã?

41Tõnd yẽ sɩbgrã zemsame. Bala, tõnd deegda sẽn zems d tʋʋma. La nin-kãngã ka maan bũmb sẽn ya wẽng ye.

42La a yeela a Zezi yaa: Yãmb sã n wa n deeg y naamã, bɩ y tẽeg mam yelle.

43A Zezi leok-a lame yaa: "Mam yeta foo sɩd-sɩd tɩ rũnna bala, fo na n zĩnda ne maam Paradi pʋga."

44Rẽ tɩ ra zoe n kolga wĩnto-sʋka, la zĩiga fãa lebga lik bida hal tɩ ta wẽn-kaoore.

45Wĩntoogã sobgame, la fu-lillidgã sẽn be wẽnd-doogẽ wã pãrga pʋɩ-sʋka.

46La a Zezi zẽka b koɛɛg n yeel yaa: M ba, m basda m sɩɩgã yãmb nugẽ. La a Zezi sẽn gom a woto n sɛ, b kiime.

47Sodaas koabg naabã sẽn yã bũmb ninga sẽn maana, a waooga Wẽnnaam n yeel tɩ: Hakɩɩka rao-kãnga ra yaa nin-tɩrga.

48La neb kʋʋngã sẽn da wa n na ges bõn-kãngã sẽn yã bũmb nins sẽn maana, b lebgdame la b pĩisd b yãoodo.

49Neb nins fãa sẽn dag n mi a Zezi wã, ne pagb nins sẽn yi Galile n yãag bãmbã dag n yasa yɩɩg n get bũmb nins sẽn maandã.

50Kaorengã yɛl-bʋ-kaood a ye n da be t'a yʋʋr boond t'a Zozɛf n ya nin-sõngo la nin-tɩrga.

51A rag n ka lagem ne bʋ-kaoodb a taabã n yãk yama la a maan b sẽn maan bũmb ningã ye. A rag n yaa Arimate sẽn ya Zuif-rãmba tẽng neda. La a ra gũuda Wẽnnaam soolmã waoongo.

52A kẽnga a pilat nengẽ n tɩ kos a Zezi kũumã.

53Yẽ sika kũumã, da-pɩkã zugu, n vil-a ne lẽ peend n tɩ gãneg yaoogẽ sẽn tu kugr zugu, kũum sẽn nan ka mumẽ ye.

54Badaar dag n yaa seglg daare, la vʋʋsg daarã da rat n sɩngame.

55La pagbã sẽn da yi Galile n yãag a Zezi wã tũu a Zozɛf n wa yã yaoogã la b sẽn gãneg a Zezi kũuma be to-to.

56La b lebgame n tɩ to tɩdar zom la b maan tɩdar kaam. La bãmb vʋʋsa vʋʋsg daarã wa sẽn zems a Moyiis toogã. Yaoog sẽn tuk pĩigẽ (23.53)

← Chapter 22 Jump to: Chapter 24 →