Luke 17

Mossi Moore (KÃAB-PAALGÃ KOE-NOOGO)

← Chapter 16 Jump to: Chapter 18 →

1A Zezi yeel a b karen-biisã yaa: Bũmb nins sẽn wat ne lʋɩɩsã ka tõe n ka wa ye. La ned ning sẽn na n wa-a ne-bã na paam toogo.

2B sẽn na loe ned kokor ne neer kugr n lob-a ko-kãsenga pʋg n são a yĩnga, n yɩɩd a sẽn na n kɩt tɩ kom-bõoneg kãens ned a yembr lʋɩ.

3Gũus-y y mense. Fo ba-biig sã n maan yel-wende, bɩ f leng-a, la a sã n kos sugri, bɩ f kõ-a.

4La a sã n beeg foom naoor a yopoe daar a yembre, n lebg n wa fo nengẽ naoor a yopoe n yet t'a kota sugri, bɩ f kõ-a sugri.

5Tẽn-tʋmdba yeela Zu-soabã yaa: Paas-y d tẽebã.

6La Zu-soabã yeelame yaa: Yãmb sã n da tarẽ tẽeb sẽn zem siin-bila, yãmb dag n na yeel wom-sɛ-kãngã t'a vik n tɩ sel ko-kãsengã pʋga, la a dag n na sak yãmba.

7Ãnna n be yãmb sʋkã n tar tʋmtʋmd sẽn kood wall sẽn gũud rũmsi, t'a sã n yi weoog n lebg n wa bɩ a yeel tʋmtʋmdã: wa kell n zĩnd n dɩ?

8Yẽ ka na n yeel tʋmtʋmdã tɩ: Segl dɩɩb n kõ-ma n tek fuug n tall rɩɩbã n wa n kõ-m tɩ m dɩ la m yũ. Rẽ poore fo na yaool n dɩ la f yũ?

9Yẽ na n pʋʋsa tʋmtʋmd-kãng barka, a sẽn maan bũmb ninga b sẽn yeel-a t'a maana yĩnga?

10Woto me, yãmb sã n maan bũmb nins fãa b sẽn yeel yãmb tɩ y maana, bɩ y yeele: Tõnd yaa tʋmtʋmdb sẽn ka yõod ye, d maana tʋʋmd ninga tõnd sẽn da tog n maanã bala.

11A Zezi sẽn wa n dabd Zeruzalɛm, bãmb da tũuda Samari soolem ne Galile sʋka.

12Bãmb sẽn kẽed tẽn-bil a yen pʋga, neb piiga yĩn-gãong bãas sẽn tar waa n sega bãmba. Bãmb yaasa yɩɩg n zẽk b koees n yeele:

13Zezi, Zu-soaba, zoe-y tõnd nimbãanega.

14A Zezi sẽn yãnd-bã, b yeel-b lame tɩ b kẽng n tɩ wilg b mens maan-kʋʋdbã. La bãmb sẽn dabd be wakate, bãmb kell n lebga yɩlma.

15Bãmb sʋka ned a yen sẽn yã t'a paama maagre, yẽ lebg n pʋga a nao, n zẽk a koɛɛg n pẽgd Wẽnnaam.

16Yẽ wõgemda a Zezi taoore, n fõgn a neng tẽnga, n pʋʋs bãmb barka. A dag n yaa Samari neda.

17A Zezi gomame n yeel yaa: Bãmb piiga fãa ka lebg yɩlma sɩda? La neb a wɛ wã bee yɛ?

18Yaa sãan-kãnga bal n lebg n wa n na kõ Wẽnnaam waoogre?

19Dẽ a Zezi yeel-a lame yaa: yik n looge. Fo tẽeb n fãag foom.

20Fariisẽ-dambã soka a Zezi n dat n bãng Wẽnnaam soolmã sẽn na n wa wakat ninga. A Zezi leok-b lame yaa: Wẽnnaam soolmã ka wate, n ya wa bũmb ned sẽn tõe n gẽnes ye.

21B ka na n yeel tɩ ges-y-yã! Wẽnnaam soolem bee ka wall a bee ka sẽne ye. Bala, ad-y Wẽnnaam soolmã bee yãmb sʋka.

22La a Zezi yeela b karen-biisã yaa: Wakat n wat tɩ yãmb na n dat n yã Ninsaal Bi-riblã rayã daar a yen la yãmb kõn yã ye.

23B na n yeela yãmb tɩ b bee ka, wala b bee ka sẽne. Da kẽng-y be ye, la y ra babs-b ye.

24A wa sa-yãgb sẽn yit kɩreng a yen n yãg n tɩ ta kɩreng a to wã, Ninsaal Bi-riblã me na n yɩɩ a woto b waoongã dãare.

25La yaa tɩlɛ tɩ bãmb deng n nams wʋsgo, la tɩ zamaan kãnga nebã zãgs bãmba.

26Bũmb ninga sẽn zĩnd a Nowe wakatã na n zĩnda Ninsaal Bi-riblã waoongã wakat me.

27Nebã rag n dɩtame la b yũuda, la b kẽed kãadem, la b kõt b kamb sɩdba, hal tɩ ta daar ninga a Nowe sẽn kẽ koom koglgẽ wã. Sa-kãsenga waame n sãam bãmb fãa.

28A na n yɩɩ wa a Lot wakatã. Nebã rag n dɩtame la b yũuda, n daadẽ la b koosdẽ, n bʋtẽ la b metẽ.

29La daar ning a Lot sẽn yi Sodom tẽngã, bugum yii yĩngr n ni wa saaga, ne kidbri n sãam bãmb fãa.

30Na n yɩɩ a woto me daar ning Ninsaal Bi-riblã sẽn na n puk b mengã.

31Badaare, bɩ ned ninga sẽn be roog zug t'a teed be roogã pʋg ra sig n dɩgs-b ye. La bɩ ned ninga sẽn be pʋtẽ da lebg n leb poorẽ me ye.

32Tẽeg-y-yã a Lot pagã yelle.

33Ned ninga sẽn na n bao tɩ gũ a vɩɩm, a na n menes-a lame, la ned ning sẽn na bas a vɩɩm na n paam-a lame.

34Mam yeta yãmb tɩ baraar yʋngo, neb a yiib sẽn na n goẽ gãag a yembr zugu, b na n dɩka a ye, n bas a ye.

35Pagb a yiib sẽn na n werd neerẽ ne taaba, b na n dɩka a yembr n bas a ye.

36Raop a yiib sẽn na n be pʋʋgẽ, b na n dɩka a yembr la b bas a ye.

37Karen-biisã soka a Zezi yaa: Zu-soaba, na n yɩɩ zĩ-bʋgo? La a Zezi leokame tɩ dɩgr sẽn be zĩig ninga, yɩbrend tigimda beene. Pagb a yiib sẽn werd neerẽ (17.35)

← Chapter 16 Jump to: Chapter 18 →