Luke 3

Mossi Moore (KÃAB-PAALGÃ KOE-NOOGO)

← Chapter 2 Jump to: Chapter 4 →

1Sezaar a Tɩbɛɛr sẽn deeg naam tɩ yʋʋm piig la nuunẽ, t'a Pilat dag n yaa Zude soolem Gʋvɛrneere, tɩ Herood ya Galile rĩma, t'a biig a Filip ya Yituure ne Tarkonit soolem dĩma, t'a Lizanyaas ya Abilɛn soolem dĩma,

2t'a Ann ne a Kayif ya maan-kʋʋdbã kãsem-dãmba, Wẽnnaam goma ne a Zakari biig a Zã weoogẽ wã.

3La a Zã saaga tẽms nins fãa sẽn pẽ Zʋrdẽ wã, n moondẽ n yet nebã tɩ b tek yam n deeg lisgu, n paam b yel-wẽnã sugri.

4Yɩɩ wa sẽn gʋls Wẽnnaam no-rɛɛs a Ezayi sebrã pʋgẽ wã: Yaa ned ning koɛɛg sẽn kelemd we-rasempʋɩɩgẽ wã, n yetẽ tɩ: Maneg-y Zu-soabã sore! Rems-y bãmb so-bugsã tɩ yɩ tɩrse!

5Londã fãa na n pidsame! Tãensã ne kũnkubã fãa na n sarmame! So-golemsã na n lebga tɩrse, la b na n kõo so-rʋdã!

6La ninsaal buud fãa na n yãa fãagr ning Wẽnnaam sẽn kõtã.

7Dẽ, a Zã ra yeta neb kʋʋngã sẽn wat yẽ nengẽ t'a lis-bã yaa: Wag-toos buudu, ãnna n wilg yãmb tɩ y zoe sũ-puugr sẽn watã?

8Woto yĩnga, bɩ y wom biis sẽn zemsd ne neb sẽn tek yam n kos sugri, la y da tags y sũyã pʋs t'a Abraham sẽn ya yãmb yaabã sekame ye. Bala, mam yeta yãmb tɩ Wẽnnaam tõe n dɩka kug-kãensã n kɩt tɩ b lebg a Abraham yagense.

9Larã zoe n bee tɩɩsã yẽgẽ moasã. Dẽ, b na n keega tɩɩg ning fãa sẽn ka womd bi-sõama, n lob bugmẽ.

10Neb kʋʋngã soka a Zã yaa: Woto wã, bõe la tõnd tog n maane?

11A Zã leok-b lame n yeele: Bɩ ned ning sẽn tar fu-yerdɩ a yiib yãk a ye n kõ sẽn ka tar-a, la ned ning sẽn tar n dɩtẽ me maan a woto.

12Yaood-dɛɛgdbã me waame n dat t'a lis-ba. B soka a Zã yaa: Karen-saamba, tõnd tog n maana bõe?

13Yẽ leok-b lame n yeele: Da reeg-y yaood n yɩɩd b sẽn kõ yãmb noor tɩ y reegã baa bilfu.

14Sodaas me soka a Zã tɩ la bãmb yẽ tog n maana bõe? Yẽ leoka bãmb n yeele: Da maan-y ned pãng ye, la y da rõd neb zaalem ye, la y maan sũ-noog ne y yaoodã.

15Nebã da yas n gũudame, la b fãa da sokda b mens n dat n bãng sãnde ka a Zã la Kiristã.

16A Zã leoka bãmb fãa n yeele: Mam lisda yãmb koomẽ. La ned a ye n wata, n tar pãng n yɩɩd maam. Mam pʋs n pa zems tɩ lood bãmb neooda sẽbds ye. Bãmb na n lisa yãmb Sɩɩg-sõngẽ la bugmẽ.

17Bãmb zãada b kãoorgo. Bãmb na n pɩɩsa b zɛɛga, n wʋk ki wã n sui b baoorẽ. La b na n yõoga wudgã ne bugum sẽn ka kiida.

18A Zã sagla nebã ne sagls a taab wʋsgo, n moon bãmb koe-noogã.

19La a Zã sẽn wilg Herood sẽn ya Gʋvɛrneerã t'a sẽn maan ne a ba-biig a Filip pag Herodyaadã, ne tʋʋm wẽnsã fãa a sẽn maanã ka zemse,

20Herood leb n maana tʋʋm wẽng a to n paase, n yõk a Zã n sui bi-bees roogo.

21Neba fãa sẽn paam koom lisgu, a Zezi me paama lisgu. La bãmb sẽn pʋʋsd wakate, yĩngr pakame,

22la Sɩɩg-sõng rɩka man-wall wẽneg n sig bãmb zugu. Koɛɛg zĩnda saasẽ n yeele: Fo yaa mam bi-ribl-nongr sẽn ta mam yam zãnga.

23A Zezi sẽn wa n na n sɩng b tʋʋmdã, rẽ tɩ b da tara yʋʋm pis-tã sẽne. Bãmb da yaa a Zozɛf biig wa nebã sẽn dag n tagsdã. A Zozɛf dag n yaa a Heli biiga,

24sẽn yaa a Matat biiga, sẽn yaa a Levi biiga, sẽn yaa a Melki biiga, sẽn yaa a Yanayi biiga, sẽn yaa a Zozɛf biiga,

25sẽn yaa a Matatyas biiga, sẽn yaa a Amos biiga, sẽn yaa a Nahum biiga, sẽn yaa a Esli biiga, sẽn yaa a Nagayi biiga,

26sẽn yaa a Maat biiga, sẽn yaa a Matatyas biiga, sẽn yaa a Semeyin biiga, sẽn yaa a Zozɛf biiga, sẽn yaa a Zoda biiga,

27sẽn yaa a Zoaana biiga, sẽn yaa a Resa biiga, sẽn yaa a Zorobabɛll biiga, sẽn yaa a Salatyɛl biiga, sẽn yaa a Neeri biiga,

28sẽn yaa a Melki biiga, sẽn yaa a Adi biiga, sẽn yaa a Kozam biiga, sẽn yaa a Elmadam biiga, sẽn yaa a Ɛɛr biiga,

29sẽn yaa a Zezi biiga, sẽn yaa a Eliyezɛɛr biiga, sẽn yaa a Zorim biiga, sẽn yaa a Matat biiga, sẽn yaa a Levi biiga,

30sẽn yaa a Sɩmyõ biiga, sẽn yaa a Zuda biiga, sẽn yaa a Zozɛf biiga, sẽn yaa a Zonam biiga, sẽn yaa a Eliyakim biiga,

31sẽn yaa a Meleya biiga, sẽn yaa a Mena biiga, sẽn yaa a Matata biiga, sẽn yaa a Natã biiga, sẽn yaa a Daviid biiga,

32sẽn yaa a Ezayi biiga, sẽn yaa a Zobɛɛd biiga, sẽn yaa a Booz biiga, sẽn yaa a Sala biiga, sẽn yaa a Nasõ biiga,

33sẽn yaa a Aminadab biiga, sẽn yaa a Admin biiga, sẽn yaa a Arni biiga, sẽn yaa a Ɛsrom biiga, sẽn yaa a Farɛs biiga, sẽn yaa a Zuda biiga,

34sẽn yaa a Zakob biiga, sẽn yaa a Izak biiga, sẽn yaa a Abraham biiga, sẽn yaa a Taara biiga, sẽn yaa a Nakoor biiga,

35sẽn yaa a Seruk biiga, sẽn yaa a Reyu biiga, sẽn yaa a Falɛk biiga, sẽn yaa a Ebɛɛr biiga, sẽn yaa a Sala biiga,

36sẽn yaa a Kayinam biiga, sẽn yaa a Arfaksaad biiga, sẽn yaa a Sɛm biiga, sẽn yaa a Nowe biiga, sẽn yaa a Lemek biiga,

37sẽn yaa a Matusala biiga, sẽn yaa a Henok biiga, sẽn yaa a Zarɛd biiga, sẽn yaa a Maleleyɛl biiga, sẽn yaa a Kayinam biiga,

38sẽn yaa a Enos biiga, sẽn yaa a Sɛt biiga, sẽn yaa a Adam biiga, sẽn ya Wẽnnaam biiga.

← Chapter 2 Jump to: Chapter 4 →