Luke 19

Mossi Moore (KÃAB-PAALGÃ KOE-NOOGO)

← Chapter 18 Jump to: Chapter 20 →

1A Zezi kẽe Zeriko, n pɩʋʋgd tẽngã,

2la dao a ye n da be be t'a yʋʋr boond t'a Zaase, a yaa arzɛk soaba n ya yaood-dɛɛgdbã naaba.

3Yẽ ra baood n yãnda a Zezi n bãng b sẽn ya a soaba, la neb kʋʋngã yĩnga, a rag n ka tõe n yã-b ye, bala yẽ yaa rao-kʋɛɛga.

4Dẽ, yẽ wudgame n kẽng taoor n tɩ rʋ wom-sɛɛg n na n ges a Zezi, bala b ra tog n tũu beene n looge.

5La a Zezi sẽn ta zĩ-kãnga, bãmb nak n gesame n yeel a Zaase yaa: Zaase, sig tao-tao, bala mam tog n siga fo yirã rũnna.

6A Zaase siga tao-tao n deeg a Zezi ne sũ-noogo.

7Nebã sẽn yã rẽ, bãmb fãa yẽgmame n yetẽ t'a Zezi tɩ siga yel-wẽn-maand yiri.

8La a Zaase yalsa Zu-soabã taoor n yeel-b yaa: Ade, Zu-soaba, mam na n yãka m paoongã pʋɩ-sʋk n kõ naong rãmba. La mam sã n dag n zãmba ned n deeg a bũmbu, m na n lebsa yẽnda naoor a naase.

9A Zezi yeela yẽnda yaa: Fãagr waa yi-kãnga pʋg rũndã, tɩ bõe, nin-kãnga me ya a Abraham yagenga.

10Bala Ninsaal Bi-ribla waame n na n bao bũmb nins sẽn da menema n fãag-ba.

11La neba sẽn kelg gom-kãense, a Zezi leb n wẽe bãmb yel-bũndi, tɩ bõe, bãmb da kolga Zeruzalɛm. La nebã ra tagsdame tɩ Wẽnnaam soolmã na n puka wakat kãng bala.

12Dẽ, a Zezi yeelame yaa: Na-biig a yembr n da yi n kẽng tẽng sẽn zãr n na n tɩ reeg naam la n wa.

13Yẽ boola a tʋmtʋmdb piig n kõ-b min piig n yeel-b tɩ b yõdg n leeb n paam yõod hal tɩ yẽ lebg n wa.

14La a soolmã neba ra kisa yẽnda, la b tʋma neb tɩ b pʋgl-a n tɩ yeel yaa: "Tõnd ka rat tɩ rao-kãnga soog tõnd ye."

15La yẽ sẽn deeg naama n lebg n wa, a kɩtame tɩ b bool tʋmtʋmdb nins yẽ sẽn da kõ ligdã tɩ b wa, tɩ yẽ bãng ned kam fãa sẽn leeb n paam yõod to-to.

16Pipi soabã waa n yeelame yaa: "Zu-soaba yãmb minna paama yõod min piiga."

17A yeela yẽ yaa: "Be neere, tʋmtʋmd-sõngo, fo sẽn maan sɩd ne bũmb bilfã yĩnga, bɩ f soog tẽms piiga."

18La yiib soabã waame n yeele: "Zu-soaba, yãmb minna doga min a nu."

19A yeela yẽ yaa: "Fo me soog tẽms a nu."

20A to n waa n yeele: "Zu-soaba, ad yãmb minna! Mam dag n vil-a-la ne peend n bĩngi,

21bala, mam da zoeta yãmba, yãmb sẽn ya nin-toaagã yĩnga. Yãmb dɩkda bũmb ninga y sẽn ka rɩgle, la y tigsd bũmb ninga yãmb sẽn ka bʋd ye."

22Naabã yeela tʋmtʋmd kãng yaa: "Tʋmtʋmd-wẽnga, mam na n dɩka fo menga goam n kao fo bʋʋdo. Fo ra miime tɩ mam yaa nin-toaaga, tɩ mam dɩkda bũmb ning mam sẽn ka rɩgle, la m tigsd bũmb ning mam sẽn ka bʋd ye,

23dẽ, bõe yĩng tɩ fo ka bĩng mam ligdã bãnkẽ tɩ mam sã n lebg n wa bɩ m deeg-a ne yõodo?"

24La a yeela neb nins sẽn da be be wã tɩ b reeg min a yembrã a sẽn tarã n kõ ned ning sẽn tar-a min piigã.

25Bãmb yeela yẽ yaa: "Zu-soaba, yẽ tara min piiga."

26Mam yeta yãmb tɩ b na kõo ned ning sẽn tara, la ned ning sẽn ka tarã, b na n deega baa bũmb bilf ninga yẽ sẽn tarã.

27La sẽn keta, tall-y mam bɛɛbã sẽn da ka rat tɩ mam soog-bã n wa ne ka. Kood-y-b mam nifẽ.

28A Zezi sẽn gom a woto n sɛ, bãmb lʋɩɩ nebã taoor tɩ b rabd Zeruzalɛm.

29La bãmb sẽn kolg Bɛtfaaze ne Betani sẽn be tãng ninga sẽn boond tɩ oliiv tɩɩs tãngã sẽne, a Zezi tʋma b karen-biis a yiibu.

30N yeel-b yaa: Kẽng-y tẽng ninga sẽn be taoorã, y sã n ta be, y na n yãnda bõn-bil b sẽn loe, tɩ ned nan ka zomb-a. Lok-y-yã-a, n wa ne ka.

31Ned sã n sok yãmb tɩ bõe yĩng tɩ y lokd-a, bɩ y yeel-a tɩ yaa Zu-soabã n dat-a.

32Neb nins b sẽn da tʋma kẽngame n tɩ mik tɩ yaa wa a Zezi sẽn da yeel bãmbã bala.

33La bãmb sẽn lokd bõn-bilã, a soaalbã soka bãmb tɩ yaa bõe tɩ b lokd bõn-bilã.

34B leokame tɩ Zu-soabã dat-a lame.

35La b talla bõn-bilã n wa a Zezi nengẽ, n paal b fut a poorã n kɩt t'a Zezi zombe.

36La bãmb sã n kẽngdẽ, nebã yɛɛta b futã sorã zugu.

37Bãmb sẽn kolgd Zeruzalɛm, oliiv tɩɩs tãngã sigdg sẽne, bãmb karen-bi-kʋʋngã fãa sɩngame n zẽk b koees n pẽg Wẽnnaam ne sũ-noogo, bõn-bãna fãa bãmb sẽn yã wã yĩnga.

38Nebã da yetame tɩ yaa: Wẽnd na bark rĩm ninga sẽn wat ne Zu-soabã yʋʋrã! Laafɩ bee arzãna, la ziir bee hal yĩngri.

39Fariisẽ-dãmba kẽer sẽn dag n be neb kʋʋngã sʋk yeela a Zezi tɩ b leng b karen-biisã tɩ b sĩndi.

40A Zezi leokame yaa: Mam yeta yãmb tɩ b sã n sĩndi, kugã na n kelmame!

41Bãmb sẽn kolg Zeruzalɛm, a Zezi sẽn yã tẽngã, b yãba a yĩng n yeele:

42Fo me sã n da bãngẽ bũmb ninga sẽn wat ne fo laafɩ wã rũnna! La moasã b solga ne foom.

43Wakat n wat tɩ fo bɛɛba na n me bõn-yood n gilg foom. B na n gũbga foom n dɩdg-f zĩiga fãa.

44B na n sarma foom ne f kambã sẽn be fo pʋgẽ wã, la b kõn bas kugr baa yembr kugr a to zug fo pʋgẽ ye, fo sẽn ka bãng wakat ninga fo fãagrã sẽn wa wã yĩnga.

45A Zezi kẽe wẽnd-doogẽ wã n sɩng n dig koaasdbã,

46n yeel-b yaa: A gʋlsame tɩ: "Mam doogã na n yɩɩ pʋʋsg roogo, la yãmba, y maan-a lame t'a lebg wagda geongo."

47A Zezi da zãmsda nebã daar fãa wẽnd-doogã pʋgẽ. La maan-kʋʋdbã kãsem-dãmba ne gʋlsdbã la tẽngã kãsem-dãmb dag n baood n na n kʋʋ bãmba.

48La bãmb da ka mi b sẽn na n maan to-to ye, tɩ bõe nebã fãa ra yong n kelgda a Zezi.

← Chapter 18 Jump to: Chapter 20 →