Luke 14

Mossi Moore (KÃAB-PAALGÃ KOE-NOOGO)

← Chapter 13 Jump to: Chapter 15 →

1Daar a yembre, a Zezi kẽe Fariisẽ-dãmbã naab a yembr zakẽ n na n dɩ, la Fariisẽ-dãmbã dag n gũusda bãmba.

2La ade, rao a ye n dag n be bãmb taoore, bã-motg sẽn tara.

3A Zezi goma ne tõog karen-saam-dãmbã la Fariisẽ-dãmba n yeele: Dẽ yĩnga, noor beeme tɩ maag ned vʋʋsg daare?

4Bãmb kell n sĩndame. Dẽ, a Zezi peega bãadã, n maag-a, la b kuils-a.

5La a Zezi yeel-b lame yaa: Ãnna yãmb sʋkã bi-ribl bɩ a naaf n na n lʋɩ bulgẽ vʋʋsg daar t'a ka yiis-a tao-tao?

6La b ka tõog n leok gom kãng ye.

7Rẽ poore, a Zezi goma ne neb nins b sẽn bool rɩɩbã yĩngã n wẽ-b yel-bũndi. Tɩ bõe, bãmb yãame tɩ nin-kãens baooda naam zĩndg zĩisi. B yeel-b lame yaa:

8Ned sã n bool foom yi-kãadem kibsa, da tʋg n zĩnd naam zĩndg zĩigẽ ye, tɩ tõe t'a boola ned sẽn yɩɩd foom.

9Sã n yɩ a woto, sẽn bool-a foom ne yẽnda wã na n waa n yeela foom tɩ f yik n bas zĩig n kõ-a, fo na n yaool n tɩ zĩnda poorẽ zaoogã zugu, la f na n yãa yãnde.

10B sã n bool foom, kẽng n tɩ zĩnd poorẽ zaoogã zugu, tɩ ned ning sẽn bool-a foomã sã n wa bɩ a yeel foom yaa: "M zoa, wa taoor ka!" Woto na n yɩɩ fo waoogr neb nins fãa sẽn zĩ ne foom n dɩtẽ wã taoore.

11Sɩd me, b na n sika ned ning fãa sẽn zẽkd a menga, la b na n zẽka ned ning fãa sẽn sikd a menga.

12La a Zezi yeela ned ning sẽn bool-a bãmb tɩ b wa n dɩ wã yaa: Fo sã n na n bool neb tɩ b wa n dɩ ne foom, tɩ ya wĩntoog bɩ yʋngo, da bool f zo-rãmba, wall f ba-biisi, wall f buudu, wall f yags nins sẽn ya arzegs rãmbã, tɩ bãmb me da wa n bool foom ye. Rẽ na n yɩɩ lebsgo.

13Fo sã n na n bool neb tɩ b wa n dɩ ne foom, bool naong rãmba, la koms-rãmba, la wobse, la zoense,

14la fo na n paama sũ-noogo, b sẽn ka tar n na n kõ foom n lebsã yĩnga. Bala, nin-tɩrsã vʋʋgr wakate, fo na n paama keoore.

15Neb nins sẽn dag n zĩ n dɩtẽ wã sẽn wʋm a Zezi gom kãensã, b ned a yembr yeelame yaa: Bark bee ned ning sẽn na n naag-a n dɩ Wẽnnaam soolmẽ wã zugu!

16La a Zezi leoka yẽnda n yeele: Dao a yembr n dag n segl rɩɩb n bool neb wʋsg tɩ b wa rɩ.

17Dɩɩbã wakate, a tʋma a tʋmtʋmd t'a tɩ yeel neb nins a sẽn boolã tɩ b wa tɩ bũmba fãa zoe n segl n saame.

18La bãmb ned kam fãa sɩng n padmame. Pipi soabã yeelame tɩ yẽ raa pʋʋgo, la yaa tɩlɛ tɩ yẽ kẽng n tɩ gese, la a kotame tɩ b bas-a taale.

19A to yeelame tɩ yẽ raa nag-koods piiga, la yẽ na n mak-b lame n gese, la a kotame tɩ b bas-a taale.

20Ned a to yeelame tɩ yẽ nan peega a pʋg-paala, la rẽ n kɩt tɩ yẽ ka na n tõog n wa ye.

21Tʋmtʋmdã lebgame n tɩ togs a soaalã bõn-kãense. A soaalã sũur yĩigame t'a yeel a tʋmtʋmdã t'a kẽng raasẽ wã, la tẽngã soayã zut tao-tao, n wa ne naong rãmba, la koms-rãmba, la zoense, la wobsã be.

22Tʋmtʋmdã yeelame tɩ yẽ maana a soaalã sẽn yeelã, la vɩʋʋg ket n beeme.

23La soaalã yeela tʋmtʋmdã yaa: Rɩk soayã, la f yeg yãgã n modg nebã tɩ b wa kẽ hal tɩ mam yirã pid ne neba.

24Bala, mam yeta yãmb tɩ neb nins mam sẽn dag n boolã, bãmb ned baa a yen kõn lemb mam dɩɩbã ye.

25Neb kʋʋng wʋsg dag n tũuda a Zezi sorã zugu. A Zezi wẽnemdame n yeel-b yaa:

26Ned sã n wat mam nengẽ, n ka kis a ba la a ma la a paga la a kamba la a ba-bi-raopa la a ba-bi-pogse, la baa ne a mengã vɩɩm, a ka tõe n yɩ mam karen-biig ye.

27La ned ning fãa sẽn kõn dɩk a da-pɩk n tũ maam, ka tõe n yɩ mam karen-biig ye.

28Bala, ãnna n be yãmb sʋkã n dat n me gãosgo, n ka reng n zĩnd n geel ligd ning fãa a sẽn tog n yiis tʋʋmdã yĩnga, n bãng a sã n tara sẽn sek tɩ me-a n sa?

29Sã n ka rẽ, a sã n yẽbg roogã n sa, n yaool n ka tõe n baas-a, neb nins fãa sẽn na n yã wã na n yaala yẽnda n yeele:

30Rao kãngã sɩnga gãosg meeb la a ka tõog n baas ye.

31Wall rĩm bʋg n be n dat n tɩ zab ne rĩm a to, n ka reng n zĩnd n mag n gese, yẽ ne a nebã tus piigã sã n tara pãn-tõog tɩ kẽng n seg rĩm a to wã sẽn wat ne neb tus pisi wã?

32Rĩm a to wã sẽn ket n be yɩɩga, a na n tʋma neb a nengẽ tɩ b tɩ yẽs laafɩ yẽsg ne-a.

33Woto me, yãmb ned ning fãa sẽn ka basd bũmb nins fãa a sẽn tarã ka tõe n yɩ mam karen-biig ye.

34Yamsem yaa bõn-sõngo. La yamsem sã n lebg poada, bõe la b na n ning-a t'a le paam noosem?

35A ka yõod tãnd yĩnga, wall birg yĩng ye. B lobd-a la yɩnga. Bɩ sẽn tar-a tʋb n wʋmdẽ wʋme!

← Chapter 13 Jump to: Chapter 15 →