Luke 15

Mossi Moore (KÃAB-PAALGÃ KOE-NOOGO)

← Chapter 14 Jump to: Chapter 16 →

1Yaood-dɛɛgdba fãa ne yel-wẽn maandba fãa kolga a Zezi n na n kelg-ba.

2La Fariisẽ-dãmba la tõog karen-saam-dãmba da yẽgemdame n yetẽ tɩ rao-kãnga reegda yel-wẽn maandba la b rɩt ne-ba.

3La a Zezi wẽe bãmb yel-bũn kãnga n yeele:

4Nin-bʋg n be yãmb sʋkã n na n tar piis koabga, t'a yembr meneme, t'a ka bas pis-wɛ la a wɛ wã weoogẽ wã n kẽng n tɩ gẽes pesg ning sẽn menem-a wã hal t'a yãnd-a?

5La yẽ sã n yãnd-a, a na n palg-a-la a bagdẽ ne sũ-noogo.

6La yẽ sã n lebg n ta yiri, a boonda a zo-rãmbã ne a yagsã a yir n yeel-b yaa: "Naag-y maam n maan sũ-noogo, bala, mam yãnda m pesgã sẽn dag n menemã".

7Woto me, mam yeta yãmb tɩ sũ-noog na n zĩnda arzãn pʋgẽ, yel-wẽn maand a yen sẽn tek yam n kos sugr yĩnga, n yɩɩd nin-tɩrs pis-wɛ la a wɛ sẽn ka baood sugr kosgã yĩnga.

8Walla, pʋg bʋg n na n tar ligd piiga t'a yembr menem t'a ka yõgen fɩtla, n pɩɩs roogã la a gẽes-a neer hal n yãnd-a?

9La a sã n yãnd-a, a boonda a zo-rãmbã ne a yagsã a yir n yeel-b yaa: Naag-y maam n maan sũ-noogo, bala, mam yãnda m lagfã sẽn dag n menemã.

10Woto me, mam yeta yãmb tɩ yel-wẽn maand a yen sã n tek yam n kos sugri, sũ-noog na n zĩnda Wẽnnaam malegsã sʋka.

11A Zezi leb n yeelame yaa: Rao n dag n tar kom-dibli a yiibu.

12La yaowã yeela a ba wã yaa: "M ba, pʋɩ-y y paoongã n yãk m pʋɩɩr n kõ-ma". La ba wã pʋɩ-b-la a paoongã.

13Rasem bilf zugẽ, yaowã tigsa a sẽn da tarã fãa n kẽng tẽng sẽn zãra, n tɩ sãam a paoongã be ne tʋʋm-dẽgd maanego.

14La yẽ sẽn sãam a paoongã fãa n sa, kom kãseng n kẽ tẽn-kãnga, la koma sɩngame n nams-a.

15Yẽ kẽng n tɩ noka tẽnga ned a yembre, t'a tʋm yẽ a pʋtẽ t'a tɩ gũ kurkuyã.

16Yẽ dag n datẽ la zãbnã kurkuyã sẽn da rɩtã n dɩ n pid a pʋga, la ned ka kõt yẽnda ye.

17Yẽ tagsa a sũurẽ n yeele: "M baaba tʋmtʋmdbã waooga, la b tara rɩɩb n dɩt n tɩgd n kelldẽ, tɩ kom kʋʋd maam ka.

18Mam na n yikame n kẽng m baaba nengẽ n tɩ yeel-b yaa: M ba, mam beega Wẽnnaam la m beeg yãmba.

19Mam ka le zems tɩ b bool maam tɩ yãmb biig ye. Ges-y maam wa yãmb tʋmtʋmd a yembre".

20La a yikame n kẽng a ba wã nengẽ. La yẽ sẽn ket n be yɩɩga, a ba wã yã-a lame t'a nimbãanega yõk-a. A ba wã wudgame n tɩ mobg-a n mok-a.

21Biigã yeela a ba wã yaa: "M ba, mam beega Wẽnnaam la m beeg yãmba. Mam ka le zems tɩ b bool maam tɩ y biig ye."

22La a ba wã yeela a tʋmtʋmdbã yaa: "Wa-y ne fuug ning sẽn yaa-a neer n yɩɩdã tao-tao n yeelg-a. Ning-y-yã-a nug-bilã nugbĩnga, la y wĩd-a neooda.

23Wa-y ne nag-bi-noabdgã, n kʋ-a tɩ d rɩ la d maan sũ-noogo.

24Bala, mam bi-ribl kãnga ra kiime la a leb n vʋʋgame. A rag n menemame, la d leb n yãnd-a lame." La bãmb sɩngame n kɩdemdẽ.

25La bi-ribl kãsengã ra bee pʋtẽ. La yẽ sẽn lebg n watẽ n kolg yiri, a wʋma yʋʋmb ne saoog rãamde.

26Yẽ boola tʋmtʋmd a yembr n sok-a bũmb ninga sẽn maandã võore.

27Tʋmtʋmdã yeela yẽ yaa: "Yãmb yaowã lebg n waame, tɩ yãmb ba wã kʋ nag-bi-noabdgã, a sẽn lebg n wa ne laafɩ wã yĩnga."

28Yẽ sũurã puugame t'a ka sak n na n kẽ ye. A baaba wã yiime n na n bool-a t'a wa n kẽ.

29Dẽ, a leoka a ba wã yaa: "Ade, yaa yʋʋm wʋsg la mam tʋmd n kõt yãmba. Mam nan ka kɩɩs yãmb noor ye. La maam yẽ, yãmb zɩɩ n kõ maam baa bull tɩ m maan sũ-noog ne m zo-rãmb ye.

30La yãmb bi-kãnga, sẽn sãam-a yãmb paoongã ne pʋg-yoaadbã sẽn lebg n wa wã, yãmb kʋʋ nag-bi-noabdgã n kõ-a".

31A ba wã yeel-a lame yaa: "M biiga, fo bee ne maam daar fãa, la bũmb nins fãa mam sẽn tarã yaa foom n so.

32La a zemsame tɩ tõnd maan sũ-noog n kɩdem. Bala fo yao wã fo sẽn ne wã ra kiime, la a leb n vʋʋgame. A rag n menemame, la m leb n yãnd-a lame".

← Chapter 14 Jump to: Chapter 16 →