Luke 18

Mossi Moore (KÃAB-PAALGÃ KOE-NOOGO)

← Chapter 17 Jump to: Chapter 19 →

1A Zezi wẽe bãmb yel-bũnd n na n wilg-b tɩ b tog n pʋʋsa wakat fãa n da yɛ ye.

2A Zezi yeelame: Bʋ-kaood a ye n da be tẽng a yen pʋgẽ n ka zoet Wẽnnaam, la a ka zoet ned baa a yen nif ye.

3Pʋgkõor a ye me n da be tẽn-kãng pʋga, n wat n yet bʋ-kaoodã t'a sõng-a tɩ ned n zabd ne yẽnda.

4Bʋ-kaoodã zãgsame n kaoos t'a ka na n sõng-a ye. La a yaool n tagsa a sũurẽ n yeele: "Baa ne mam sẽn ka zoet Wẽnnaama, la m ka zoet ned nifã,

5pʋgkõ-kãngã sẽn pẽdgd maama yĩnga, mam na n baas n sõng-a lame t'a ra wat n namsd maam tɩ wa n loog nug ye."

6Zu-soabã leb n yeelame yɛsa: Kelg-y bʋ-kaood-wẽngã sẽn yeelã.

7Dẽ, Wẽnnaam kõn sõng bãmb nin-tũusdsã sẽn zẽkd b koees wĩndg la yʋng n kot bãmbã? B na kaoos n sõng-ba?

8Mam yeta yãmb tɩ b na n sõnga bãmb tao-tao. La Ninsaal Bi-riblã sã n wa, b na n yãa tẽeb tẽng zugu?

9A Zezi leb n wẽe yel-bũn-kãnga neb kẽer yĩnga, b sẽn da tẽed tɩ b yaa tɩrse, la b paoogd neb a taabã yĩnga, n yeele:

10Daop a yiib n da kẽng wẽnd-doogẽ n na n tɩ pʋʋse. A ye wã yaa Fariisẽ ned la a to wã yaa yaood-dɛɛgda.

11Fariisẽ nedã yalsa yĩngr n pʋʋs a sũurẽ a woto: "Mam Wẽnnaam, m pʋʋsda yãmb bark mam sẽn ka wẽnd wa neb a taabã sẽn ya wagda la nin-wẽnse la yoaadbã, la m ka wẽnd baa yaood-deegd-kãnga wã yĩnga.

12Mam loeta noor naoor a yiib rasem a yopoe pʋgẽ, mam yãkda m sẽn tarã piig pʋɩɩr n kõtẽ."

13Yaood-dɛɛgdã yalsa yɩɩga, n pʋs n ka saagd n na n doog a neng yĩngr ye. La a ra pĩisda a yãoog n yetẽ: "Mam Wẽnnaam! Zoe-y mam nimbãaneg tɩ m yaa yel-wẽn-maanda."

14Mam yeta yãmb tɩ rao-kãng lebg n kuila a yir ne tɩrlem. La fariisẽ nedã ka paam ye. Bala, b na n sika ned ning sẽn zẽkd a menga, la b na zẽka ned ning sẽn sikd a menga.

15Neb n dag n talled hal baa kom-peels n wat a Zezi nengẽ tɩ b sɩɩs-ba. La karen-biisã sẽn yã bõn-kãnga, b sɩngame n lengd neb nins sẽn tall-b kambã n wa wã.

16La a Zezi kɩtame tɩ b wa ne kambã, la b yeele: Bas-y kom-bõonegã tɩ b wa mam nengẽ la y ra gɩdg-b ye. Bala, Wẽnnaam soolmã yaa neb nins sẽn wẽnd-b bãmbã yĩnga.

17Sɩd-sɩdã, mam yeta yãmb tɩ ned ning fãa sẽn ka reegd Wẽnnaam soolmã wa bi-bilf ka na kẽ be ye.

18Naab a yembr soka a Zezi yaa: Karen-saam-sõngo, bõe la mam tog n maan n paam vɩɩm sẽn kõn sa?

19A Zezi yeel-a lame yaa: Bõe yĩng tɩ f boond maam tɩ nin-sõngo? Ned kae n ya sõama tɩ sã n ka Wẽnnaam b yen bala.

20Fo mii tõodã: "Da yo ye, da kʋ ye, da zu ye, da kɩs kaset zĩrĩ ye, waoog f ba la f ma".

21Rao wã yeelame tɩ yẽ saka bõn-kãensã fãa hal sẽn sɩng a yãadem wakate.

22A Zezi sẽn wʋm woto, b yeel-a lame yaa: Bũmb a ye n ket n paoog foom. Koos fo sẽn tarã fãa n pʋɩ naong rãmba la f na n paama paoong arzãna. La f wa tũ maam.

23Yẽ sẽn wʋm bõn-kãnga, a sũurã sãama hal wʋsgo, bala yẽ ra tara arzegs wʋsgo.

24A Zezi sẽn yã t'a sũurã sãama wʋsgã, b yeelame: Ad na n yɩɩ toog ne neb nins sẽn tar arzegsã tɩ kẽ Wẽnnaam soolmẽ.

25Bala, yʋgemd sẽn na n tũ fu-pĩim yõorẽ n loog yaa naana n yɩɩd arzɛk soab sẽn na n kẽ Wẽnnaam soolmẽ.

26Neb nins sẽn da kelgd bãmbã yeelame tɩ rẽ, ãnna n tõe n paam fãagre.

27La a Zezi leokame tɩ ninsaalbã sẽn ka tõe bũmb ningã, Wẽnnaam tõeeme.

28La a Pɩyɛɛr yeelame yaa: Ade, tõnd basa d sẽn tarã n tũ yãmba.

29La a Zezi yeela bãmb yaa: Sɩd-sɩdã, mam yeta yãmba, tɩ ned ka be sẽn na n bas a yiri, a paga, a buudu, wall a kamba, Wẽnnaam soolmã yĩnga,

30n ka reeg wʋsg n yɩɩd a woto zamaan kãnga pʋgẽ, la a paam vɩɩm sẽn kõn sa zamaan ninga sẽn watã pʋgẽ ye.

31A Zezi peega karen-biis piig la yiibã kɛɛng n yeel-b yaa: Ade, tõnd dabda Zeruzalɛm, la bũmb ninga fãa Wẽnnaam no-rɛɛsdbã sẽn da gʋls Ninsaal Bi-riblã yell wɛɛngẽ wã na n pidsame.

32Bala, b na n yõka bãmb n kõ bu-zẽmsã. Bu-zẽmsã na n yaala bãmba, n gom bãmb wẽnga n tʋbs bãmb kolkoodo.

33La b na n pãba bãmb ne kalwaase n yaool n kʋ-ba. La ra-tãtẽ-daare bãmb na n vʋʋgame.

34La karen-biisa ka wʋm b gomda võor baa bilfu. Gom-kãensa rag n solga ne bãmba, la b ra ka mi gom kãng sẽn dat n yɛɛlg ye.

35A Zezi sẽn kolg Zeriko, zoang a ye n da zĩ sorã kɩreng n bõsdẽ.

36Yẽ wʋma kʋʋngã sẽn loogdã rãamde, a sokame n na n bãng sẽn ya bũmb ninga.

37La b togsa yẽ tɩ yaa Nazarɛt dao a Zezi n da loogde.

38La a kelmame n yeele: Zezi, a Daviid Bi-ribla, zoe-y mam nimbãanega!

39Neb sẽn da kẽnd taoorã lenga yẽ n dat t'a sĩndi. La a kelmame n yɩɩd pĩnda n yeel tɩ: Daviid bi-ribla, zoe-y mam nimbãanega.

40A Zezi yalsame n yeel tɩ b tall-a n wa. La a sẽn kolge, a Zezi sok-a lame:

41Bõe la fo rat tɩ m maan n kõ-fo? Yẽ leokame tɩ: Zu-soaba, m dat n le paama m ninã.

42La a Zezi yeela yẽnda: Leb n paam f nini. Fo tẽeb n fãag-fo.

43Wakat kãng bala, a ninã pukame t'a tũ a Zezi la a waoogd Wẽnnaam. Neba fãa sẽn yã rẽnda wã, b pẽga Wẽnnaam.

← Chapter 17 Jump to: Chapter 19 →