Luke 20

Mossi Moore (KÃAB-PAALGÃ KOE-NOOGO)

← Chapter 19 Jump to: Chapter 21 →

1Ra-kãense, daar a yembre, a Zezi sẽn zãmsd nebã wẽnd-doogẽ wã la b moond koe-noogã, maan-kʋʋdba kãsem-dãmba, la gʋlsdba ne kãsem-dãmbã waame.

2La b yeela a Zezi yaa: Togs-y tõndo: Yaa ne no-bʋg la yãmb maand bõn-kãensã, wall ãnna n kõ yãmb no-kãnga.

3A Zezi leok-b lame yaa: Mam me na n soka yãmb sokre.

4Togs-y maam: A Zã lisgã yii arzãn bii, bɩ yaa ninsaalb nengẽ?

5La bãmb yẽsa ne taab n yeele: Tõnd sã n yeel t'a yii arzãna, b na n yeelame tɩ la yaa bõe tɩ tõnd ka tẽ a Zã,

6la tõnd sã n yet t'a yii ninsaalb nengẽ, neba fãa na n loba tõnd kuga, bala neba tẽeda hakɩɩk t'a Zã yaa Wẽnnaam no-rɛɛsa.

7Dẽ bãmb leokame tɩ b ka mi lis-kãng sẽn yi zĩig ning ye.

8A Zezi yeel-b lame yaa: Mam me ka na n togs yãmb mam sẽn paam noorã zĩig ninga n maand bõn-kãensã ye.

9La a Zezi sɩngame n wẽ neba yel-bũn kãnga n yeele: Dao a ye n da sel nasaar sib pʋʋgo, n dɩk-a n peng nasaar sib koaadba, la a yi n tog sor n na n tɩ kaoose.

10La bõn-bɩʋʋng sẽn ta, a tʋma tʋmtʋmd nasaar sib koaadbã nengẽ tɩ b kis-a nasaar sib biis t'a wa n kõ-a. La nasaar sib koaadbã pãba yẽnda n lebs-a t'a kuil nug-zaala.

11Yẽ leb n tʋma tʋmtʋmd a to Yɛsa. La koaadbã pãba yẽnda n paoog-a n lebs-a t'a kuil nug-zaala.

12Yẽ leb n tʋma tãabẽ soaba, la b pogla yẽnda n dig-a.

13La nasaar sib pʋʋgã soab yeelame yaa: "Mam na n maana bõe? Mam na n tʋma m bi-ribl-nongrã tɩ tõeeme tɩ b waoog-a."

14La nasaar sib koaadbã sẽn yã biigã, b yẽsa ne taab n yeele: "Yaa yõwã n na n soog a ba wã paoongã."

15La b yõka yẽ n yiis nasaar sib pʋʋgẽ wã n kʋ-a. Moasã nasaar sib pʋʋgã soab na n maan-b-la bõe?

16A na n waame, n sãam koaadb-kãense, la a rɩk pʋʋgã n peng koaadb a taaba. La nebã sẽn wʋm bõn-kãnga, b yeelame tɩ: Bɩ ra yɩ a woto ye.

17La a Zezi gesa bãmb n yeel yaa: Gʋlsg sõngã sẽn yeel tɩ: "Kugr ning tãn-metbã sẽn zãgsã lebga roogã pãng kugri, a soaka zĩigẽ wã" võor yaa bõe?

18Ned ninga sẽn na n lʋɩ-a kug-kãnga zug na n tõtmame, la kug-kãnga sẽn na n lʋɩ ned ninga zugu, a na n beds-a lame.

19Maan-kʋʋdbã kãsem-dãmb ne tõog karen-saam-dãmbã baoome tɩ yõk a Zezi wakat kãng bala, la bãmb zoee nebã. B ra bãngame tɩ yaa bãmb yĩng la a Zezi sẽn wẽ yel-bũn kãngã wã.

20Bãmb sɩngame n gũusd a Zezi, sẽn na yɩl n paam a Zezi gomd n bẽd-b n yõk n tɩ kɩs pãn-soaadbã ne Gʋvɛrneerã sẽn so noorã.

21Nin-kãens soka a Zezi a woto: Karen-saamba, tõnd miime tɩ yãmb gomda tɩrlem la y zãmsd nebã ne tɩrlem, la tɩ yãmb ka tũusd neb ye. La yãmb zãmsda nebã Wẽnnaam sor wa sẽn zems sɩdã.

22Tõogã kõta tõnd noor tɩ d yao Sezaar yõor yaood bɩ a ka kõta?

23La a Zezi sẽn bãng bãmb sɩlma leok-b lame yaa:

24Wilg-y maam lagfo. Maasmã ne gʋlsemã sẽn be a zugã yaa ãnna rẽnda? Tɩ b leok tɩ Sezaar.

25Dẽ, a Zezi yeela bãmb yaa: Rẽ wã, kõ-y Sezaar bũmb ning sẽn ya Sezaar dẽnda, la y kõ Wẽnnaam bũmb ning sẽn ya Wẽnnaam dẽnda.

26Bãmb ka tõog n yõk a Zezi b gomd baa a yen pʋgẽ nebã taoor ye. La a Zezi leokrã yɛɛs-b lame tɩ b sĩndi.

27Saduusẽ-dãmba sẽn yet tɩ kũum vʋʋgr ka be wã neb kẽer kolgame n sok a Zezi a woto:

28Karen-saamba, a Moyiis dag n gʋlsame n yeel tõnd tɩ: "Ned ba-biig sã n tar pag n ki n bas-a n ka paam biiga, bɩ yẽ peeg pagã n dog kamb a ba-biigã yĩnga."

29La raop a yopoe n dag n be n ya ba-biisi. La kãsma peega paga la a kiime n ka paam biig ye.

30La yiib soabã reega pʋgkõorã, n ki n bas-a tɩ tãab soaba reeg-a.

31La a yɩɩ woto ne bãmb b yopoe wã fãa, b kiime n ka paam kamb ye.

32La pagã me yaool n kiime.

33Kũum vʋʋgr daare, bãmb sʋkã, yẽ na n yɩɩ ãnna soab paga? Bala yẽnda rag n yɩɩ neb a yopoe wã paga.

34A Zezi leoka bãmb yaa: Dũni kãnga nebã peegda pagba tɩ pagba kuiis sɩdba,

35la neb nins b sẽn na n mik tɩ b zemsame tɩ zĩnd dũni ning sẽn watã pʋgẽ wã la tɩ vʋʋg n bas kũumã ka na n le peeg pagba, wala kuil sɩdb ye.

36Bãmb ka tõe n leb n ki yɛs ye, tɩ bõe, b na n yɩɩ wa malegse, la b na n yɩɩ Wẽnnaam kamba, bãmb sẽn vʋʋg n bas kũumã yĩnga.

37Zĩig ning b sẽn gomd tuugã bugma sẽn be a zugã yellã, a Moyiis wilgame tɩ kũum vʋʋgdame, yẽ sẽn boond Zu-soabã t'a Abraham ne a Izak la a Zakob Wẽnnaamã.

38La Wẽnnaam ka kũum Wẽnnaam ye, b yaa nin-vɩɩs Wẽnnaam. Bala ne bãmba neba fãa vɩɩme.

39Gʋlsdb kẽer leokame yaa: Karen-saamba, yãmb goma sõama.

40La bãmb ka saag n le sok a Zezi sokr a to yɛs ye.

41A Zezi sok-b lame yaa: B tõe n yɩɩ a wãn n yeel tɩ Kirist yaa a Daviid yagenga?

42A Daviid meng yeela yɩɩn-sõamyã sebr pʋgẽ tɩ: "Zu-soaba yeela mam Zu-soaba yaa: Zĩnd mam dɩtgo,

43hal tɩ m kɩt f bɛɛba yɩ fo nao roagendga."

44Dẽ, a Daviid boonda bãmb tɩ Zu-soaba, woto bãmb na n yɩɩ a wãn n yaa a yagenga?

45La nebã fãa sẽn kelgd a Zezi, bãmb yeela b karen-biisã yaa:

46Gũus-y y mens ne gʋlsdbã sẽn nong n gõod ne fu-wogdo, n nongẽ tɩ neba pʋʋsd bãmb raasẽ, la b baood n zĩnd waoogr goeels zut karen-dotẽ, la rɩɩb zĩisẽ wã.

47Bãmb deesda pʋgkõapã paoong zãnga la b pʋʋsd pʋʋs-wogd nebã nin gesg yĩnga. Bãmb na n paama sɩbgr sẽn ya toog n yɩɩda.

← Chapter 19 Jump to: Chapter 21 →