1 Corinthians 12

Oromo Bible (WAADAA LAMMATAA) 2013

← Chapter 11 Jump to: Chapter 13 →

1Obboleeyyan tiyya! Waan Ayyaana Woyyu'uu akka beettan fedha.

2Akkuma hennaa worra Yihuudota hin taane turtan, gara waaqa tolfamaa laagaa hin qabnee masakkama'aa turuu keessan hin beettan.

3Kanaafuu eennullee Ayyaana Rabbiitiin yoo dubbatu, Yesuus ka abaarame ka jedhu tokkollee akka hin jirre; Ayyaana Woyyu'uun yoo ta'e malee, «Yesuus Goofta'a» jechuu tokkollee akka hin dandenne isin beessisa.

4Kennaan badhaadhaa adda adda, Ayyaanni ammoo tokko.

5Tajaajillillee adda adda, Gooftaan tokko.

6Akkaataan hujii isaallee adda adda, Rabbiin maraa godhu ammoo tokko.

7Haata'uu ammoo kennaan Ayyaanaa ka nama maraa keessatti mudhatu bu'aa nama maraatiif kennama.

8Tokkoo ogummaa dubbachuu Ayyaanaan kennamaaf; tokkoollee Ayyaanuma saniin beekkomsaan dubbachuun kennamaaf.

9Tokkoo Ayyaanuma saniin amantaa, tokkoollee Ayyaanuma tokko saniin kennaa fayyisu'uu,

10Tokkoo maalalee godhuu'u, tokkoollee raaga dubbachuu, tokkoo ayyaana hamaa adda baasuu, tokkoollee laagaa adda addaa dubbachuu, tokkoo ka laagaa addaatiin dubbatame hiikuun kennamaaf.

11Kana maraa ammoo Ayyaanni tokko sun akka fedha ufiititti qooda'aa hojjata.

12Akkuma nafti tokko qaama heddu qabu, qaamoon nafaa martinuu uduu heddu ta'aniiran, qaama tokko akka ta'an; Kiristoosillee akkasuma.

13Yihuudii yoo taane, namoota Giriikii yoo taane, garboota yoo taane, wolabootallee yoo taane, nu martinuu Ayyaana tokkoon qaama tokko akka taanu waan cuuphamneerruuf, nu martinuu Ayyaana tokko keessaa dhunneerra.

14Nafti qaama heddu malee, qaama tokko waan hin taaneef.

15Lutti harkaan, «Ani harka miti, qaama nafaatiillee miti» yoo jettee; akkas jette'eef kutaa nafaa ta'uun isi'ii hin hafaa?

16Gurrillee ani ija waan hin taaneef, qaama nafaatii miti uduu jedhee, kana jedhe'eef kutaa nafaa ta'uun isaa hin hafaa?

17Nafti maruu uduu ija ta'ee, silaa dhagayuun eessa jira? Maruu uduu gurra ta'ee, silaa maali'iin ulanna?

18Amma ammoo Rabbi akka fedha ufiititti qaamoolee san adduma addaan nafa irra godheera.

19Maruu uduu qaama tokko ta'ee, nafti silaa eessaa argamaa?

20Haata'uu ammoo amma qaamooleen hedduu, nafti ammoo tokko.

21Ijji harkaan na hin barbaachiftu jechuu hin dandeettu yookiin mataan akkasuma lukaan na hin barbaachiftan jechuu hin danda'u.

22Haata'uu ammoo qaamni namaa ka dadhabaa fakkaatan nafa caalaa barbaachisan.

23Qaamoolee nafaa worra hin kabajjamne ka nutti fakkaatan, ulfinna caalu isaanitti uwwifna. Qaama keenna ka ittiin saalfannu ammoo ulfinnatu isaanii eda'ama.

24Qaamooleen keenna ka ulfinna qaban ammoo, isaan hin barbaachisu. Haata'uu ammoo qaamooleen ufii sirri'itti akka wolii yaadaniif malee, nafaan akka gargar hin baaneef qaama kanniinii waan hanqate ulfinna caalu kenna'aati Rabbi akkanaan nafa wolitti qamashe.

26Qaamni tokkollee uduu rakkatee qaamni maruu isa woliin rakkatan, qaamni tokko yoo ulfinna argate qaamni maruu isa woliin gammada.

27Isinillee nafa Kiristoosiiti, marti keessanuu qaama isaa ti.

28Rabbillee woldaa Kiristaanaatitti dursee ergamoota, lammaffaa raattota, sadaffaa Barsiisota, maalalee godhuu, kennaa fayyisu'u, gargaarsa, bulchiinsaa fi laagaa adda addaa kenneera.

29Maruu ergamootaa? Maruu raattotaa? Maruu barsiisotaa? Maruu maalalee hujanii?

30Maruu keennaa fayyisu'u qabanii? Martinuu laagaa addaatiin dubbatanii? Maruu hin hiikanii?

31Haata'uu ammoo kennaa badhaadhumma'aa ka maraa caalu jabaadha'aa barbaadaa'a. Akkasuma karaa waa maraa caalu isinitti mudhisa.

← Chapter 11 Jump to: Chapter 13 →