1 Corinthians 16

Oromo Bible (WAADAA LAMMATAA) 2013

← Chapter 15 Jump to:

1Woyyoota Rabbiitii birrii wolitti fuudhuu akkuma Woldaa Kiristaanaa ka Galaatiya'aatii seera baase, isinillee akkasuma godhaa'a.

2Birrii wolitti guruun hennaa ani dhufe akka hin taane, isin keessaa gari gariin keessan jalqaba torbaanii akkuma ta'etti ka qabu irraa hanbisa'aa mana ufii haa kaayuu.

3Eennuunillee yoo ta'e, worra amanaman namoota isinitti fakkaatan, waan isin arjoomtan san gara Yerusaaleemii akka geessan xalayaa itti kennee isaan erga.

4Akkasuma ani yoo ka deemuu na woliin deeman.

5Hennaa deemu Maqedooniyaa keessa waan lufuuf, gara keessan dhufa.

6Isinillee hulee ani dhaqu maraa, deemsa kiyyaaf akka na gargaartan, maallaataa isin bira tura yookiin hin bubula ta'a.

7Amma ammoo karaa saniin hennaa lufu isinitti goruu waan hin barbaanneef, yoo Gooftaan jedhe bara ta'e isin bira turu'uuf abdii godha.

8Efesoonitti ammoo haga Ayyaana shantamaffa'aa tura.

9Balbali guddaan huji'ii naa banameera, worri na morman ammoo heddu.

10Ximootiwoos isin bira yoo dhufe, inni sodaa malee isin woliin akka taa'u godhaa'a. Akkuma kiyya akkasuma hujii Goofta'aa waan hojjatuuf, kanaafuu eennullee akka isa hin tuffanne.

11Haata'uu ammoo obboleeyyan isaa woliin waan isa eeguuf, nagayaan gara kiyya akka dhufu, waan imala isaatii ta'uun gargaara'aan.

12Waan obboleessa keenna Aphiloosii ammoo obboleeyyan isaa woliin gara keessan akka deemuuf guddisee kadheen ture, Inni ammoo amma dhufuu hin barbaadu, yoo toleef ammoo hin dhufa.

13Dammaqaa'a; amanta'aan jabaadha'aa dhaabadhaa'a, guddadhaa'a.

14Isin biratti wonti maruu jaalalaan haata'u.

15Obboleeyyan tiyya! Maatiin Isxifaanosii hangafa Akaayiyya'aa akka ta'an woyyootallee tajaajilu'uuf akka ufi kennan hin beettan.

16Worra akka isaanii jiraniif isa woliin hojjatu, worra dadhaban maraaf isinillee akka ajajamtaniif isin kadhadha.

17Isxifaanosi, Fardonaxisii fi Akaayiqosi garana dhufuun isaanii na gammachisa. Waan hennaa isin na woliin hin jirre na jalaa dhidhate naa guutaniiraniif.

18Garaa kiyyaa fi garaa keessan gab waan godhaniif, eegasuu namoota akkana jiran kanniin beeka'aan.

19Woldeenni Kiristaanaa ta Isiya'aa nagaya isinii dhaamaniiran. Aqilaa, Pherisqilla'aa fi woldeenni Kiristaanaa ta mana isaanii jirtu woliin maqaa Goofta'aatiin nagaya guddaa isinii dhaamaniiran.

20Obboleeyyan maruu nagaya isinii dhaamaniiran. Dhungoo woyyu'uun nagaya wol gaafadhaa'a.

21Ani Phaawuloos nagaya kana harkuma kiyyaan barreesseera.

22Gooftaa Yesuus Kiristoosiin ka hin jaalanne yoo jiraate, ka abaarame haata'u. Gooftaa keenna koottu.

23Badhaani Gooftaa keenna Yesuus Kiristoosii isin maraa woliin haata'u.

24Jaalalli kiyya karaa Yesuus Kiristoosiitiin isin maraa woliin haa ta'u! Amiin!

← Chapter 15 Jump to: