bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Leviticus 14
Leviticus 14
Quechuan QXO (Biblia en Quechua del sur de Conchucos)
← Chapter 13
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 15 →
1
Mastam Moisésta Tayta Dios nirqan:
2
«Leprawan qeshyaykanqanpita allir runakuna purificashqana kayänanpämi kaynö rurayanqa: Leprawan qeshyanqanpita alliskirmi sacerdötiman willakatsinqa.
3
Sacerdötinam campamentupita yarquskir leprawan qeshyaykaq runa allinqanta o mana allinqantapis rikananpä aywanqa. Tsay runapa lepran allinqanta rikarqa
4
purificakunanpämi apatsimunqa ishkay püru kaq pishqukunata, cedru qeruta, puka tëlata y hisöpu jachata.
5
Jukaq pishquta wanuskatsirmi pukyupita chaqamunqan yaku wiñaraykaq mitu mankaman yawarninta jututsinqa.
6
Tsay yawaryuq yakumanmi ushmatsinqa kawaykaq pishquta, cedru qeruta, puka tëlatawan hisöpu jachata.
7
Purificashqa kananpämi leprawan qeshyanqanpita alliq runata yawarwan qanchis kuti tsaqtsunqa. Purificashqana kanqanta sacerdöti willarmi kawaykaq pishquta dëjanqa.
8
«Purificakurqa röpanta taqshakutsun, aqtsanta shapranta chipyaq rutukutsun y bäñakutsun. Tsaynöpam püruna kanqa. Tsaypita campamentuman kutirpis qanchis junaqyaq toldunman amarä yaykutsunrätsu.
9
Qanchis junaqchö aqtsanta yapay rutukutsun. Tsaynölla shaprantapis, cëjasnintapis y cuerpunchö kaq llapan shaprantapis chipyaq afeitakutsun. Tsaynölla röpantapis yapay taqshakuskir bäñakutsun. Tsaynö rurarrämi purificashqa kanqa.
10
«Leprawan qeshyanqanpita alliskir puwaq kaq junaqchöqa ishkay sänu carnishta y juk watayuq sänu china üshata sacrificiupä sacerdötiman apamutsun. Tsaynölla ofrendapä apamunqa aceitiwan pichurkur joqta kïlu pullan allin kaq jarinata y mediu litrutanö aceitita.
11
Tsaypitanam purificashqa kananpä kaq runata ofrendantawan Tinkuna Toldupa patiunman sacerdöti apanqa Tayta Diospa puntanchö kananpä.
12
Apamunqan aceitita y juk carnishtam Tayta Diospa puntanchö joqarkur wakman kayman sacerdöti kuyutsinqa consagratsina sacrificiu kananpä.
13
Tsaypitanam ashmata imaypis pishtanqan sagrädu kaqchö tsay carnishta pishtanqa. Tsay carnishpa aytsan sagrädu kar purificatsina sacrificiupä apamunqan ashmapa aytsannömi y consagratsina sacrificiupä apamunqan ashmapa aytsannömi sacerdötipa derëchun kanqa.
14
«Tsaypitanam consagratsina sacrificiupä pishtanqan carnishpa yawarninwan purificakuq runapa derëcha kaq rinrinta llushinqa. Tsaynöllam derëcha kaq makinpa maman dëdunta y derëcha kaq chakinpa maman dëduntapis llushinqa.
15
Tsaypitanam sacerdötiqa kikinpa itsuq kaq maki paltanman ichiklla aceitita wiñarkur
16
derëcha kaq dëdunta tsay aceitiman jatinqa. Tsaywanmi Tayta Diospa puntanman qanchis kuti tsaqtsunqa.
17
«Makinchö sobraq aceitiwannam purificakuq runata sacerdöti llushinqa derëcha kaq rinrinta y derëcha kaq makinpa y chakinpa maman dëdunta. Tsaynömi llushinqa consagratsina sacrificiupä pishtanqan carnishpa yawarninwan llushinqan jananman.
18
Tsay aceititam purificakuq runapa umanmanpis wiñanqa. Tsaynö ruranqa tsay runa Tayta Diospa puntanchö püru kananpämi.
19
«Tsaypitam purificatsina sacrificiupä apamunqan üshatapis sacerdöti pishtanqa tsay runa purificashqa kananpä. Tsaynöllam rupatsina sacrificiupä apamunqantapis pishtaskir
20
apamunqan jarinatawan altarchö rupatsinqa. Tsaykunatam sacerdöti ruranqa tsay runa purificashqa kananpä. Llapanta tsaynö ruraptinrämi purificashqa kanqa.
21
«Pobri karqa consagratsina sacrificiupä juk carnishta apamunqa. Tsaytam tsay runa purificashqa kananpä altar ñöpanchö joqarkur wakman kayman sacerdöti kuyutsinqa. Tsaynöllam aceitiwan pichushqa ishkay kïlu allinnin jarinata y mediu litrunö aceititapis ofrendapä apamunqa.
22
«Puëdinqallanmanmi ishkay kullkushta o ishkay pushapa palumata karpis apamunqa. Jukaq palumam purificatsina sacrificiupä kanqa y jukaqnam rupatsina sacrificiupä kanqa.
23
Purificakunqanpita puwaq junaqtam tsaykunata Tinkuna Toldupa patiunman apaykur Tayta Diospa puntanchö kaykaq sacerdötita entreganqa.
24
«Sacerdötinam consagratsina sacrificiupä apamunqan carnishtawan aceitita Tayta Diospa puntanchö joqarkur wakman kayman kuyutsinqa.
25
Tsaypitanam tsay carnishta pishtanqa consagratsina sacrificiupä. Yawarta tsarinqanwanmi purificashqa kananpä kaq runata llushinqa derëcha kaq rinrinta y derëcha kaq makinpa y chakinpa maman dëdunta.
26
«Tsaypitanam kikinpa itsuq kaq maki paltanman ichiklla aceitita sacerdöti wiñanqa.
27
Derëcha kaq dëdunta tsay aceitiman jatiykurmi Tayta Diospa puntanman qanchis kuti tsaqtsunqa.
28
Tsaynöllam makinchö kaykaq aceitiman dëdunta jatiykur purificakuq runata sacerdöti llushinqa derëcha kaq rinrinta y derëcha kaq makinpa y chakinpa maman dëdunta. Tsaynö llushinqa consagratsina sacrificiupä pishtanqan carnishpa yawarninta llushinqan jananman.
29
Makinchö sobraq aceititanam purificakuq runapa umanman wiñanqa. Tsaynö ruranqa tsay runa Tayta Diospa puntanchö purificashqa kananpämi.
30
«Tsaypitam purificakuq runa apamunqan kullkushkunata o pushapa palumakunata karpis altarchö sacerdöti rupatsinqa.
31
Jukaqmi kanqa purificatsina sacrificiupä y jukaqnam kanqa rupatsina sacrificiupä. Tsaykunatam churanqa tsaki mikuyta apamunqan ofrenda jananman. Tayta Diospa puntanchömi sacerdöti tsaynö ruranqa tsay runa purificashqa kananpä.
32
Leprawan qeshyanqanpita alliskirmi pobrikuna tsaynö purificakuyanqa».
33
Tsaypitanam Moisésta y Aarónta Tayta Dios nirqan:
34
«Qamkunata entreganäpä Canaánchö taykäyaptiki mayqan wayipis mupalliptinqa
35
wayipa duëñunmi sacerdötiman aywaykur willanqa wayin mupalliykanqanta.
36
«Tsaynö willaptinmi wayichö imapis impüru mana kananpä sacerdöti mandanqa tsay wayita jäkatsiyänanpä. Tsaypitanam sacerdöti yaykunqa mupallinqan imanö kanqantapis rikananpä.
37
«Wayita rikapakunqanchö mupallir verdiyaykaqta o pukayaykaqta y pirqa pasmaykaqta rikarqa
38
wayipita yarqurmi qanchis junaqyaq sacerdöti wichqaykunqa.
39
Qanchis junaq cumpliskiptinmi wayita rikananpä sacerdöti yapay kutinqa. Mupallir miraykanqanta tarirqa
40
sacerdötim ninqa mupallishqa kaq rumikunata jipiskir impüru sitiuman jitayänanpä. Tsayqa markapita juklächömi kanqa.
41
Tsaynöllam mandanqa wayi rurintapis raspaskir raspanqan allpata markapita juklächö kaykaq impüru sitiuman jitayänanpä.
42
Tsaymi jipinqan rumikunapa trokin juk rumikunatana churar juk mituwanna tarajeatsinqa.
43
«Tsaynö rasparnin y rumita jitaykaptinpis y tarajeaykaptinpis mupallinqan yapay yuriptinqa
44
yapay imanö kanqantapis rikananpämi sacerdöti yaykunqa. Wayi rurinchö entërupana mupallishqa kaptinqa tsay wayi impüru kanqantam ninqa.
45
Tsaynö kaptinqa tsay wayita juchuskatsirmi ruminkunatapis, qerunkunatapis y llapan allpantapis markapita juklächö kaykaq impüru sitiumanna jitayanqa.
46
Manarä juchutsiptin pipis tsay wichqaraykanqan kaq wayiman yaykurqa patsa tsakanqanyaqmi impüru kanqa.
47
Tsay wayichö pipis mikurqa o punurqa röpanta taqshakunqa.
48
«Wayiman sacerdöti yaykur tarajeanqanpita mupallinqan illakashqatana rikarqa püruna tsay wayi kanqantam ninqa.
49
Wayi purificashqa kananpä apatsimunqa ishkay pishqukunata, cedru qeruta, puka tëlata y hisöpu jachata.
50
Juk pishquta wanuskatsirmi pukyupita chaqamunqan yaku wiñaraykaq mitu mankaman yawarninta jututsinqa.
51
Pishqupa yawarninmanmi ushmatsinqa cedru qeruta, hisöputa, puka tëlata y kawaykaq pishquta. Tsay yawarwanmi wayitapis qanchis kuti tsaqtsunqa.
52
Tsaynömi wayita purificanqa pishqupa yawarninwan, pukyu yakuwan, kawaykaq pishquwan, cedru qeruwan, hisöpu jachawan y puka tëlawan.
53
Tsaynö ruraskirnam kawaykaq pishquta markapita jipiskir aywakunanpä dëjanqa. Tsaynöpam wayi purificashqana kanqa».
54
Kay leykuna ninqannömi ruranqa pipis leprawan qeshyar qeri ushaptin,
55
röpan mupalliptin, wayin mupalliptin,
56
jakaypa qeshyaptin, chupuwan qeshyaptin y kancha yuriptin.
57
Kay leykunata cäsurmi püru kanqanta o impüru kanqantapis musyanqa. Kaykunam leprapä leykuna kaykan.
← Chapter 13
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 15 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27