Leviticus 9

Quechuan QXO (Biblia en Quechua del sur de Conchucos)

← Chapter 8 Jump to: Chapter 10 →

1Tsaypita puwaq junaqtanam Moisés qayarqan Aarónta, tsurinkunata y Israel mayor runakunatapis.

2Tsaychömi Aarónta nirqan: «Purificatsina sacrificiupä juk sänu torïtuta y rupatsina sacrificiupä sänu carnëruta Tayta Diospa puntanman apamunki.

3Israel runakunatana ninki purificatsina sacrificiupä juk chïvuta apayämunanpä. Tsaynölla rupatsina sacrificiupä juk watayuq sänu torïtuta y juk watayuq sänu carnishta apayämunqa.

4Tsaynölla alli päsakuy sacrificiupä juk töruta y juk carnëruta apayämunqa. Tsaykunatam Tayta Diospa puntanchö pishtayanki. Tsaynölla aceitiwan pichushqa jarinata apayämunqa. Tsaynö apayämunqa Tayta Dios kanan junaq noqantsikman chämunanpä kaptinmi».

5Aarónta Moisés ninqannöllam Israel runakuna tsaykunata apayarqan Tinkuna Toldupa patiunman. Tsaychömi llapan runakuna Tayta Diospa puntanman qorikäyarqan.

6Tsaymi Moisés nirqan: «Apayämunqaykita rupatsinantsikpämi Tayta Dios nishqa. Ninqanta rurayaptikiqa chipipiyninpis atsikyarrämi rikakämunqa».

7Tsaypitanam Aarónta Moisés nirqan: «Purificatsina sacrificiupä y rupatsina sacrificiupä apamunqayki ashmakunata altarman apaykur pishtay. Tsaykunam kanqa qampis y Israel runakunapis perdonashqa kayänaykipä. Tsaypitana Israel runakuna apayämunqan ashmakunata altarman apaykur pishtay paykunapis jutsankunapita perdonashqa kayänanpä. Tsaynö rurayänaykipämi Tayta Dios nishqa».

8Tsaynö niptinmi purificatsina sacrificiupä apamunqan torïtuta altarman apaykur Aarón pishtarqan.

9Pishtanqan ashmapa yawarnintanam Aarónpa tsurinkuna makyayarqan. Tsay yawarman dëdunta jatiykurmi altarpa waqrankunata Aarón llushirqan. Sobraq yawartanam altarpa chakinman tallirqan.

10Tsaypitanam purificatsina sacrificiupä pishtanqan ashmapa rurunninkunata, ñatinchö wiranta y wakin wiranta altarchö rupatsirqan. Moisésta Tayta Dios ninqannöllam llapanta rurarqan.

11Peru aytsantawan qarantam sïqa campamentupita jukläman apaykur rupatsirqan.

12Tsaypitanam rupatsina sacrificiupä apamunqan ashmata Aarón pishtarqan. Tsay ashmapa yawarninta tsurinkuna makyayaptinnam altarpa lädunkunata tsaqtsurqan.

13Tsaypitanam tsay ashmapa umanta y cuartizanqan aytsata apapuyaptin altarchö Aarón rupatsirqan.

14Pachantawan chakinta mayllaskirmi wakinta rupatsinqannölla altarchö rupatsirqan.

15Tsaynöllam purificatsina sacrificiupä Israel runakuna apayämunqan chïvuta pishtaskir purificatsina sacrificiuta puntata ruranqannölla Israel runakunapäpis rurarqan.

16Tsaypitanam imaypis rurananpä Tayta Dios ninqannölla rupatsina sacrificiuta rupatsirqan.

17Wäraypa rupatsina sacrificiuta rupatsinqan jananchömi juk aptay tsaki mikuytapis rupatsirqan.

18Tsaypitanam Israel runakuna alli päsakuy sacrificiupä apayämunqan töruta y carnërutapis Aarón pishtarqan. Tsay ashmakunapa yawarninta tsurinkuna makyayaptinmi altarpa lädunkunata tsaqtsurqan.

19Tsaynöllam tsurinkuna makyayarqan törupa y carnërupa chupanta, pacha wiranta, rurunkunata y ñatinchö wirantapis.

20Tsay wirankunatam pishtanqan ashmakunapa pëchunkuna jananman churayarqan. Tsaypitanam wirallantana altarchö Aarón rupatsirqan.

21Ashmapa pëchunkunata y derëcha kaq chankantanam Moisésta Tayta Dios ninqannölla joqarkur wakman kayman kuyutsirqan.

22Purificatsina sacrificiupä, rupatsina sacrificiupä y alli päsakuy sacrificiupä apayämunqankunata altarman churaykurmi Israel runakunapa jananpa makinta joqarkur Aarón bendisarqan. Altarpita yarpuskirnam

23Moiséswan Aarón Tinkuna Tolduman yaykuyarqan. Tsaypita yarqaskamur Israel runakunata bendisayaptinmi Tayta Diospa chipipiynin rikakämurqan.

24Tayta Diospa puntanpita nina shamurmi altar jananman churayanqan aytsatawan wirata rupaskirqan. Tsayta rikaykurmi llapan Israel runakuna kushikuypita qayaykachar Tayta Diosta adorar lätakuykuyarqan.

← Chapter 8 Jump to: Chapter 10 →