Leviticus 19

Quechuan QXO (Biblia en Quechua del sur de Conchucos)

← Chapter 18 Jump to: Chapter 20 →

1Mastam Moisésta Tayta Dios nirqan:

2«Israel runakunata niy: «Noqa Tayta Diosnikim santu kä. Qamkunapis santu kayay.

3«Mamaykita y taytaykita respitayanki. «Jamay junaqkunachö respitamar jamayanki. Noqam Tayta Diosniki kä.

4«Ima ïdulukunamanpis ama yärakuyankitsu. Metalpita fundiypa ima ïdulukunatapis ama rurayankitsu. Noqam Tayta Diosniki kä.

5«Alli päsakuy sacrificiupä ashmakunata pishtarqa shonqüpänö rurayanki.

6Alli päsakuy sacrificiupä pishtayanqayki ashmapa aytsanta tsay junaqlla mikuyanki. Sobraptinqa waraynin junaqpis mikuyanki. Ishkay junaqchöpis tsay aytsata mana usharqa kimsa kaq junaqchöqa rupatsiyanki.

7Kimsa kaq junaqchöqa tsay aytsa asyashqanam kanqa. Rupatsinaykipa rantin mikuptikiqa tsay sacrificiu ruranqayki manam välinqanatsu.

8Tsay aytsaqa noqapä sagrädum kaykan. Tsaymi tsay asyashqa aytsata pipis mikurqa sagrädu kaqta respitantsu. Tsay aytsata mikuq kaqtaqa Israel runakunapita qarquyanki.

9«Cosëchata qorirpis ama chipyaqqa qoriyankitsu. Shushuqkunatapis ama pallayankitsu.

10Üvatapis ashi ashirkurqa ama pallayankitsu. Shushuqkunatapis ama qoriyankitsu. Tsaykunataqa jaqiykuyanki pobrikuna y qamkunachö täraq jäpa runakuna qorikuyänanpä. Noqam Tayta Diosniki kä.

11«Ama suwakuyankitsu. Ama llullakuyankitsu. Ama pitapis engañayankitsu.

12«Imatapis noqapa jutïchö awnirqa mana qonqaypa cumpliyanki. Llullakur jutïta joqarirqa manam respitayämankitsu. Noqaqa Tayta Diosmi kä.

13«Runa mayikita engañar ama ni imantapis apayankitsu. Arupäshuqnikitapis tsay junaqlla pägayanki.

14«Mana wiyaqkunata ama ashlliyankitsu ni qapra purikunanman imatapis ama churapäyankitsu. Tsaynö rurayanqaykipa rantinqa noqata mantsapakayämay. Noqaqa Tayta Diosmi kä.

15«Autoridä karpis llapanta shumaq juzgayanki. Pobritapis rïcutapis favornin mana shäriypa arreglayanki.

16«Pipa wasantapis rimar ama puriyankitsu. «Runa mayikita wanutsiyänanpä ama manakaqkunata tumpayankitsu. Noqaqa Tayta Diosmi kä.

17«Pitapis ama chikiyankitsu. «Runa mayiki imatapis llutanta ruraptinqa yätsiyay. Mana yätsirqa qamkunapis jutsayuqmi kaykäyanki.

18«Runa mayikita ama venganzata rurayankitsu ni nanaparäyankitsu. Tsaypa rantinqa kikikikuna kuyakuyanqaykinö runa mayikita kuyayanki. Noqaqa Tayta Diosmi kä.

19«Llapan leynïkunata shumaq cäsukuyanki. Ashmaykikunata juk casta ashmawanqa ama calintatsiyankitsu. Chakraykiman takuy murutaqa ama muruyankitsu. Ishkay casta jïluwan awashqa röpata ama jatikuyankitsu.

20«Sirviq jipash churakänanpä awnishqa kaykaptin pipis tsay jipashwan punuptinqa ishkanmi castigashqa kayanqa. Peru tsay sirviq jipash libri yarqunanpä pipis manarä pägashqa kaptinqa castigarpis manam mayqantapis wanutsiyanmantsu.

21Tsaypa rantinqa consagratsina sacrificiupä jipashwan punuq runa juk carnëruta Tinkuna Toldupa patiunman apamunqa.

22Tsay carnëruta pishtar altarchö rupatsirmi tsay runa perdonashqa kananpä Tayta Diosta sacerdöti mañakunqa. Tsaynöpam jutsata ruranqanpita perdonashqa kanqa.

23«Entreganäpä kaq nacionman chaykur plantayanqayki jachakunapa wayuyninta kimsa wata ama mikuyankitsu.

24Chusku watachörä Tayta Diosta agradëcikur llapan wayuyninta paypä apayämunki.

25Pitsqa wata kaqchömi sïqa wayuyninta mikuyanki. Tsaynö rurayaptikirämi plantayanqayki jachakuna mas wayunqa. Noqam Tayta Diosniki kä.

26«Ima aytsatapis yawaryuqtaqa ama mikuyankitsu. «Qamkunachö ama pipis katsuntsu suerti qatiqkuna ni brüjukunapis.

27«Aqtsaykita rutukurqa imaypis rutukuyanqaykinölla rutukuyanki. Ama uma jirkallaykichö dëjaypaqa rutukuyankitsu. Ni shapraykipa puntallantapis ama rutuyankitsu.

28«Pipis wanuptinqa llakikur cuerpuykita ama roqukuyankitsu. Qaraykichö ima tatuäjitapis ama ruratsiyankitsu. Noqaqa Tayta Diosmi kä.

29«Warmi tsurikikunata prostitüta kayänanpä ama consientiyankitsu. Tsaynö consientiyaptikiqa taykäyanqayki nacionchö jutsa ruraymanmi runakuna churakäyanqa.

30«Jamay junaqkunata respitayanki. Sagrädu Toldutapis respitayanki. Noqaqa Tayta Diosmi kä.

31«Brüjukunaman ni suerti qatiqkunaman ama aywayankitsu. Paykunaman aywarqa pasaypa jutsayuqmi kayanki. Noqam Tayta Diosniki kä.

32«Rukukunata respitayanki. Paykunata respitarqa noqatam mantsapakaykäyämanki. Noqaqa Tayta Diosmi kä.

33«Qamkunachö täraq jäpa runakunata ama ñakatsiyankitsu.

34Kikikikunapura alli rikanakuyanqaykinölla paykunatapis alli rikayanki. Yarpäyay qamkunapis Egiptuchö jäpa kayanqaykita. Noqam Tayta Diosniki kä.

35«Metruykiwan, pësaykiwan ni ima tupuykiwanpis ama pitapis engañayankitsu.

36Tsaymi balanzayki, pësayki y metruykipis exactu kanqa. Egiptupita jipimuqniki Tayta Diosnikim kä.

37«Llapan ninqäkunata y llapan leynïkunata cumpliyay. Noqaqa Tayta Diosmi kä».

← Chapter 18 Jump to: Chapter 20 →