Numbers 25

Kirundi (Bibliya Yera 1951, 1967 (Burundi))

← Chapter 24 Jump to: Chapter 26 →

1Abisirayeli batebeye i Shitimu, abantu batangura gusambana n’Abanyamowabukazi:

2kuko bābatumira ngo baze gusangira na bo ibimazi vy’ibigirwamana vyabo: nukw abo bantu bakabiryako, bakūnamira ivyo bigirwamana vyabo.

3Abisirayeli bīfatanya na Bayali y’i Peyori, uburake bg’Uhoraho burabaziriringira.

4Uhoraho abarira Mose, ati Jana n’abakuru bose baganza abantu, umanike abakoze ivyo imbere yanje, ubānikire ku zuba, kugira ng’ uburake bganje bg’inkazi buve ku Bisirayeli.

5Nuko Mose abarira abacamanza b’Abisirayeli, at’ Umuntu wese muri mwebge ni yice mu bo atwara abīfatanije na Bayali y’i Peyori.

6Bagize bartya, umwe mu Bisirayeli azana Umumidiyanikazi amushikana mu b’i wabo, amwātātana imbere ya Mose n’imbere y’ ishengero ryose ry’Abisirayeli, aho bāriko bararirira ku muryango w’ihema ry’ibonaniro.

7Maze Finehasi mwene Eleyazari, Eleyazari wa Aroni umuherezi, abibonye, ava hasi hagati mw ishengero, ahitana icumu,

8akurikira wa mugabo w’Umwisirayeli haruguru mw ihema ryiwe, abatobekeranisha icumu bompi, wa mugabo w’Umwisirayeli na wa mugore, umugore rimutobekeranya mu nda. Uko ni kw ikīza cābogojwe mu Bisirayeli.

9Abishwe n’ico kīza bār’ ibihumbi mirongwibiri na bine.

10Uhoraho abarira Mose,

11ati Finehasi mwene Eleyazari, Eleyazari wa Aroni umuherezi, ahwamitse uburake bganje, atumye buva ku Bisirayeli, kuko yarwaniye ifūhe ryanje muri bo, bigatuma ntarandura Abisirayeli kubg’ iryo fūhe ryanje.

12Ni co gituma ukwiye kuvuga yuko mmuhaye isezerano ryanje ry’amahoro,

13rizomubera isezerano ry’ubuherezi bg’intahava, bo n’uruvyaro rwiwe, kuko yagize ifūhe kubganje, jewe Imana yiwe, agatangira Abisirayeli impongano.

14Wa mugabo w’Umwisirayeli yicanwa na wa Mumidiyanikazi, yitwa Zimuri, yari mwene Salu, yar’ umukuru w’inzu ya ba sekuruza wo mu ba Simeyoni.

15Uwo Mumidiyanikazi bicanywe yitwa Kozibi, yari mwene Suri, umukuru w’inzu ya ba sekuruza wo mu Bamidiyani.

16Uhoraho abarira Mose,

17ati Genda ukubagure Abamidiyani, ubice,

18kuko bābakubaguye mu buryo bgiyorobetse, hamwe bābōhagiza mu vy’i Peyori no mu vya Kozibi, umwe w’i wabo, wa mukobga w’umukuru wo mu Bamidiyani, umwe yicwa ku musi w’ikīza catēye kubg’ ivyabaye i Peyori.

← Chapter 24 Jump to: Chapter 26 →