Numbers 28

Kirundi (Bibliya Yera 1951, 1967 (Burundi))

← Chapter 27 Jump to: Chapter 29 →

1Uhoraho abarira Mose,

2at’ Ugere Abisirayeli, ubabarire, ut’ Ibimazi vyiwe, ari zo mfungurwa ashikanirwa zitōngōrwa n’umuriro, z’umubabge umumotera neza, uti Muze muhore muvyitondera, mubimushikanire mu bihe vyavyo vyashinzwe.

3Ubabarire, ut’ Iki ni co kimazi co gutōngōrwa n’umuriro muzohora mumushikanira: muze mutange abana b’intama babiri‐babiri uko bukeye, b’amasuguru, batarengeje umwaka, batagira agasembga, kw ibimazi vyo kwoswa vy’intasība.

4Umwana w’intama umwe muze muwutange mu gitondo, uwundi ku mugoroba;

5bo n’ifu igogōretse y’ikigiracumi c’ ingero yitwa efa kw ishikanwa ry’ ifu, ivanzwe n’amavuta avuye muri elayo zisekuwe y’ikigirakane c’ ingero yitwa hini.

6Ivyo n’ikimazi co kwoswa c’intasība, nk’uko vyashingiwe ku musozi Sinayi, ngo kibe umubabge umota neza w’ikimazi nshikaniwe jewe Uhoraho, kigatōngōrwa n’umuriro.

7Ishikanwa ry’ibiturire muzohora mushikanana n’umwana w’intama umwe‐umwe, rize ribe ikigirakane ca hini nyene; iryo shikanwa ry’ ibiturire bihiye munshikanira, muze murivyagize Ahēra.

8Uwundi mwana w’intama muze muwutange ku mugoroba: muwutangane n’ishikanwa ry’ifu n’iry’ ibiturire, nk’ivyo mu gitondo, bibe ikimazi gitōngōrwa n’umuriro, umubabge ummotera neza, jewe Uhoraho.

9Kw isabato muze mutange abana b’intama babiri b’amasuguru, batarengeje umwaka, batagira agasembga, bo n’ibigiracumi bibiri vy’ifu igogōretse vy’ingero ya efa, ivanzwe n’amavuta ya elayo, kw ishikanwa ry’ifu, hamwe n’ishikanwa ry’ibiturire rigendanye na vyo.

10Ivyo ni co kimazi co kwoswa kw isabato yose ukw itashe, congerwe ku kimazi co kwoswa c’intasība, no kw ishikanwa ry’ibiturire rigendanye na co.

11Ku musi ukwezi kwose kubonetse, muze munshikanire ikimazi co kwoswa, jewe Uhoraho; kibe amamasa abiri y’imikangara, bo n’impfizi y’intama imwe, n’ abana b’intama ndwi b’amasuguru, batarengeje umwaka, batagira agasembga;

12imasa yose muze muyitangane n’ibigiracumi bitatu vy’ifu igogōretse vy’iyo ngero ya efa, ivanzwe n’amavuta ya elayo, kw ishikanwa ry’ifu; ya mpfizi y’intama na yo muyitangane n’ ibigiracumi bibiri vy’ifu igogōretse vy’iyo ngero nyene, ivanzwe n’amavuta ya elayo;

13umwana w’intama umwe‐umwe muwutangane n’ikigiracumi kimwe c’ifu igogōretse ivanzwe n’amavuta ya elayo: bize bibe ikimazi co kwoswa, umubabge umota neza, ikimazi gitōngōrwa n’umuriro nshikaniwe jewe Uhoraho.

14Amashikanwa y’ibiturire agendana na vyo az’ abe aya: irigendana n’ imasa yose rize ribe vino itīmbānye iyo ngero ya hini, iryo kur’ iyo mpfizi y’intama rize ribe ikigira gatatu ca hini nyene, iryo ku mwana w’intama wose rize ribe ikigira kane c’iyo hini; ivyo bize bibe ikimazi co kwoswa uk’ ukwezi kubonetse, ukw amezi yo mu mwaka angana.

15Kandi muze mutange n’impfizi y’impene, muyimpaye jewe Uhoraho, kw ikimazi gitangiwe ivyaha, mucongere ku kimazi co kwoswa c’ intasība, no kw ishikanwa ry’ibiturire rigendanye na co.

16Mu kwezi kwa mbere, ku musi ugira icumi na kane wakwo, haze hame haba Pasika yanje, jewe Uhoraho.

17Ku musi w’ icumi na gatanu w’ukwo kwezi nyene, haze habe umusi mukuru: muze mumare imisi ndwi murya imitsima itambiwe.

18Ku musi w’intangamarāra wayo muze mukoranywe no kuba ikoraniro ryera: ntihaze hagire igikorwa kiruhisha muwukorako:

19ariko muze munshikanire ikimazi gitōngōrwa n’umuriro, jewe Uhoraho, ari co kimazi co kwoswa: kize kibe amamasa abiri y’imikangara, n’impfizi y’intama imwe, n’abana b’intama ndwi b’amasuguru, batarengeje umwaka; muze mubitange bitagira agasembga,

20hamwe n’ishikanwa ry’ifu bigendanye, ifu igogōretse ivanzwe n’amavuta ya elayo: iryo kw imasa ribe ibigiracumi bitatu vy’iyo ngero ya efa, iryo ku mpfizi y’intama ribe ibigiracumi bibiri vya efa nyene,

21iryo ku mwana w’intama umwe‐umwe mur’ abo, ukw ari ndwi, ribe ikigiracumi kimwe.

22Muze mutange n’impfizi y’impene kw ikimazi gitangirwa ivyaha, co kubabera impongano.

23Ivyo muze muvyongere ku kimazi co kwoswa co mu gitondo, ari co kimazi co kwoswa c’intasība.

24Ivyo abe ari vyo muzohora mutanga uko bukeye kumara iyo misi ndwi; bizoba bibaye imfungurwa nshikaniwe jewe Uhoraho, zitōngōrwa n’umuriro, umubabge ummotera neza. Bize vyongerwe ku kimazi co kwoswa c’intasība, no kw ishikanwa ry’ibiturire rigendanye na co.

25Kandi ku musi ugira indwi muze mukoranywe no kuba ikoraniro ryera: ntihaze hagire igikorwa kiruhisha muwukorako.

26No ku musi wo kuzana ivyimburwa vy’umushuzo, igihe munshikanira ishikanwa ry’umushuzo, jewe Uhoraho, ku musi mukuru ukurikira amasabato ndwi, muze mukoranywe no kuba ikoraniro ryera: ntihaze hagire igikorwa kiruhisha muwukorako.

27Ariko muze mutange ikimazi co kwoswa c’umubabge ummotera neza, jewe Uhoraho, kize kibe amamasa abiri y’imikangara, n’ impfizi y’intama imwe, n’abana b’intama ndwi b’amasuguru batarengeje umwaka;

28hamwe n’ ishikanwa ry’ifu bigendanye, ifu igogōretse ivanzwe n’amavuta ya elayo: iryo ku masa yose ribe ibigiracumi bitatu vya efa, iryo ku mpfizi y’intama ribe ibigiracumi bibiri vya efa nyene,

29iryo ku mwana w’intama umwe‐umwe mur’ abo, ukw ar’indwi, ribe ikigiracumi kimwe.

30Muze mutange n’impfizi y’impene imwe yo kubabera impongano.

31Muze muvyongere kuri ca kimazi co kwoswa c’intasība, no kw ishikanwa ry’ifu rigendanye na co, mubitange bidafise agasembga, hamwe n’ ishikanwa ry’ibiturire bigendanye.

← Chapter 27 Jump to: Chapter 29 →