Numbers 3

Kirundi (Bibliya Yera 1951, 1967 (Burundi))

← Chapter 2 Jump to: Chapter 4 →

1Uru ni rwo ruvyaro Aroni na Mose bari bafise igihe Uhoraho yavuganira na Mose ku musozi Sinayi.

2Aya ni yo mazina ya bene Aroni: imfura yiwe ni Nadabu, agakurikirwa na Abihu na Eleyazari na Itamari.

3Ayo ni yo mazina ya bene Aroni, abaherezi bāsutswekw amavuta yo kubarobanura, bagashikirizwa ibango ry’ ubuherezi.

4Mugabo Nadabu na Abihu bāpfiriye imbere y’Uhoraho, igihe bāmwosereza imibavu ku muriro urahuwe ahandi, bari mu bugaragwa bg’i Sinayi; bapfa ar’ incike. Ariko Eleyazari na Itamari bāshishikara ibango ry’ ubuherezi imbere ya se Aroni.

5Uhoraho abarira Mose,

6at’ Igiza hafi umuryango wa Lewi, ubashire imbere ya Aroni umuherezi, kugira ngo bamutumikire:

7bamutumikire mu vyo yagezweko, no mu vy’ ishengero ryose ryagezweko, imbere y’ihema ry’ ibonaniro; bakore n’ibikorwa vy’ iryo hema.

8Bazezwe ibintu vyose vyo mw ihema ry’ibonaniro, batumikire n’ishengero ry’Abisirayeli mu vyo ryagezweko, bakore n’ibikorwa vy’iryo hema.

9Nukw Abalewi ubashikirize Aroni n’ abana biwe, arabahawe arabeguriwe, barobanuwe mu Bisirayeli.

10Ushireho Aroni n’abana biwe, abe ari bo bazezwa igikorwa c’ubuherezi bgabo: kand’ uwundi wese atar’ uwo muri bo yovyēgēra akavyitamwo, aze yicwe.

11Uhoraho abarira Mose,

12ati Rāba jewe nisobanuriye Abalewi mu Bisirayeli bandi, ngo babe mu gishingo c’abana bose b’ubuzibūra bg’Abisirayeli: Abalewi bose bazoba abanje niharije.

13Kukw abana bose b’imfura ar’ abanje: ku musi nicirakw abana bose b’imfura bo mu gihugu ca Egiputa, ni ho nirobanuriye imfura zose zo mu Bisirayeli nkazēza, iz’ abantu bo n’uburiza bg’ibitunzwe: bizoba ivyanje; nd’ Uhoraho.

14Uhoraho abaririra Mose mu bugaragwa bg’i Sinayi,

15ati Harūra Abalewi, nk’ukw amazu ya ba sekuruza ari, nk’ukw imiryango yabo iri: uharūre izinamuhungu wese, uhereye ku bamaze ukwezi kumwe ukaja hejuru.

16Nuko Mose arabaharūra, nk’ukw ijambo ry’Uhoraho ryavuze: agira nk’uko yabariwe.

17Aba ni bo bana ba Lewi, ukw amazina yabo akurikirana: Gerushoni na Kohati na Merari.

18Aya ni yo mazina ya bene Gerushoni, nk’ukw imiryango yabo iri: Libuni na Shimeyi.

19Aba ni bo bene Kohati, nk’ukw imiryango yabo iri: Amuramu na Isihari na Heburoni na Uziyeli.

20Aba ni bo bene Merari, nk’ukw imiryango yabo iri: Mahili na Mushi. Iyo ni yo miryango y’Abalewi, nk’ ukw amazu ya ba sekuruza ari.

21Abākomōtse kuri Gerushoni n’umuryango w’Abalibuni n’uw’ Abashimeyi: iyo ni yo miryango ya ba Gerushoni.

22Abāharūwe bo muri bo, nk’ukw igitigiri c’izinamuhungu wese cari kiri, uhereye ku bamaze ukwezi kumwe no kuja hejuru, bār’ ibihumbi ndwi n’amajana atanu.

23Ab’ imiryango ya ba Gerushoni bāsagaza inyuma ya rya hema ahahera i burengerazuba.

24Umukuru w’ inzu ya ba sekuruza b’aba Gerushoni yari Eliyasafu mwene Layeli.

25Ivy’ ihema ry’ibonaniro aba Gerushoni bāzēzwa vyar’ ihema ry’imbere, n’ihema ryo hejuru, n’ico kurenza hejuru yaryo, n’ igihuzu cakinga ku muryango w’iryo hema ry’ibonaniro nyene,

26n’impuzu zo kubamba ngo zibe urugo, n’igihuzu cakinga mw irembo ry’urwo rugo rukīkūza ihema n’igicaniro, n’imigozi, n’ ibikorwa vyavyo vyose.

27Abākomōtse kuri Kohati n’ umuryango w’Abamuramu n’uw’ Abisihari n’uw’ Abaheburoni n’uw’ Abuziyeli: iyo ni yo miryango y’aba Kohati.

28Nk’ukw igitigiri c’izinamuhungu wese cari kiri, uhereye ku bamaze ukwezi kumwe no kuja hejuru, bar’ ibihumbi munani n’amajana atandatu: ni bo bāzēzwa ivy’ Ahēra.

29Ab’ imiryango y’aba Kohati bāsagaza ku ruhande rw’iryo hema ahahera i bumanuko.

30Umukuru w’inzu ya ba sekuruza b’aba Kohati yari Elisafani mwene Uziyeli.

31Ivyo bāzēzwa yar’ isandugu n’ameza n’ico guterekwakw amatara, n’ibicaniro vyompi, n’ibintu vy’Ahēra vyo gukoresha, n’igihuzu co gukingīra Ahēra, n’ibikorwa vyavyo vyose.

32Eleyazari mwene Aroni umuherezi ni we yagizwe mukuru kuri ba bakuru b’Abalewi, ngw abgirize abājējwe ivy’ Ahēra.

33Abākomōtse kuri Merari n’umuryango w’Abamahili n’uw’ Abamushi: iyo ni yo miryango y’aba Merari.

34Abāharūwe bo muri bo, nk’ukw igitigiri c’izinamuhungu wese cari kiri, uhereye ku bamaze ukwezi kumwe no kuja hejuru, bār’ ibihumbi bitandatu n’amajana abiri.

35Umukuru w’inzu ya ba sekuruza b’aba Merari yari Suriyeli mwene Abihayili; abo ni bo bāsagaza ku ruhande rw’iryo hema ahahera i burārūko.

36Aba Merari, ivyo bāshingiwe kuzēzwa zar’ imbaho z’iryo hema, n’ibiti vyo gusobeka muri zo, n’inkingi zaryo, n’ibitereko vyo kuzinegamwo, n’ibintu vyaryo vyose, n’ibikoreshwa vyaryo vyose;

37n’ibirimbi vy’ urugo rwo kurikīkūza, n’ibitereko vyavyo vyo kubinegamwo, n’ imambo zavyo n’imigozi yavyo.

38Abāshinga amahema yabo imbere y’iryo hema ahahera i burasirazuba, yari Mose bo na Aroni n’abana biwe; ni bo bāzēzwa igikorwa c’Ahēra, n’ibindi bākora kubg’ Abisirayeli; kand’ uwundi wese atar’ uwo muri bo yovyēgēra akavyitamwo, yar’ akwiye kwicwa.

39Abāharūwe bo mu Balewi, abo Mose na Aroni bāharūye, nk’uk’ Uhoraho yabibabariye, bār’ ibihumbi mirongwibiri na bibiri, nk’ukw imiryango yabo iri, izinamuhungu wese, uhereye ku bamaze ukwezi kumwe ukaja hejuru.

40Uhoraho abarira Mose, ati Harūra izinamuhungu wese mu bana b’imfura b’Abisirayeli, uhereye ku bamaze ukwezi kumwe ukaja hejuru, ubaharūre nk’ukw amazina yabo ari.

41Unshingūrire Abalewi, ubashire mu gishingo c’imfura zose z’Abisirayeli: nd’Uhoraho; kand’ unshingūrire n’amasho n’imikuku vy’Abalewi, ubishire mu gishingo c’ivy’ uburiza bgose bg’amasho n’imikuku vy’Abisirayeli.

42Nuko Mose aharūra imfura zose zo mu Bisirayeli, nk’uk’ Uhoraho yamubariye.

43Abahungu b’imfura bose bāharūwe, uhereye ku bamaze ukwezi kumwe no kuja hejuru, nk’ukw igitigiri c’amazina yabo kiri, abāharūwe bār’ ibihumbi mirongwibiri na bibiri n’amajana abiri na mirongwirindwi na batatu.

44Uhoraho abarira Mose,

45ati Shingūra Abalewi, ubashire mu gishingo c’imfura zose z’Abisirayeli, n’amasho n’imikuku vy’ Abalewi ubishire mu gishingo c’ivyabo; Abalewi babe abanje niharije: nd’Uhoraho.

46Kand’ abana b’imfura b’Abisirayeli basigaye, ukw ar’ amajana abiri na mirongwirindwi na batatu, basāgutse ku gitigiri c’Abalewi,

47uz’ ubāke shekeli zitanu kw incungu, umuntu umwe‐umwe ku mutwe wiwe; shekeli uzokwāka zize zibe izigezwe kuri shekeli ir’ Ahēra: shekeli imwe irimwo gera mirongwibiri.

48Ayo mahera acunguye abasāgutse uyahe Aroni n’abana biwe.

49Nuko Mose yāka amahera y’incungu abo bāsāgutse ku bācunguwe n’Abalewi:

50amahera yātse abo bana b’ imfura b’Abisirayeli aba shekeli igihumbi n’amajana atatu na mirongwitandatu na zitanu, zigezwe kuri shekeli ir’ Ahēra.

51Ayo mahera y’incungu Mose ayaha Aroni n’abana biwe, nk’ukw ijambo ry’Uhoraho ryavuze, nk’uk’ Uhoraho yageze Mose.

← Chapter 2 Jump to: Chapter 4 →