Numbers 35

Kirundi (Bibliya Yera 1951, 1967 (Burundi))

← Chapter 34 Jump to: Chapter 36 →

1Uhoraho abaririra Mose mu kiyaya c’i Mowabu kuri Yorodani, aharābana n’i Yeriko,

2ati Barira Abisirayeli baze bahe Abalewi ibisagara vyo kubamwo, babisobanuye mu mashamvu yabo beguriwe; uti Mubahe n’amaragiro inyuma y’ivyo bisagara impande zose.

3Ivyo bisagara bize bibe ivyabo vyo kubamwo, amaragiro na yo az’ abe ay’amasho yabo n’ibitungwa vyabo n’ibindi baragiye vyose.

4Uti Kand’ amaragiro y’ivyo bisagara muzoha Abalewi az’ ahēre ku ruzitiro rw’ igisagara agende aja hirya, amatambge igihumbi y’ukuboko uciriye mu nkokora, birtyo birtyo impande zose.

5Uti Kand’ inyuma y’igisagara i burasirazuba, amakīka muze mugere amatambge ibihumbi bibiri, amakīka y’i bumanuko abe ibihumbi bibiri nyene, ay’ i burengerazuba abe ibihumbi bibiri, n’ay’ i burārūko ibihumbi bibiri nyene; igisagara kibe hagati. Ayo ni yo azoba amaragiro yo ku bisagara vyabo.

6Uti Kandi mu bisagara muzoha Abalewi, bitandatu muri vyo bize bibe ivy’ ubuhungiro, ivyo mushizeho kugira ng’uwishe umuntu ahungireyo; uti Kandi mubahe ibindi mirongwine na bibiri bigeretse kur’ ivyo.

7Nukw ibisagara muzoha Abalewi vyose na vyose bize bibe mirongwine n’umunani; uti Muze mubitangane n’amaragiro agendanye na vyo.

8Ibisagara muzobasobanurira bivuye ku mashamvu y’Abisirayeli, abenshi mubāke vyinshi, abake mubāke bike; umuryango wose, ukw ishamvu yabo ingana, abe ari ko baha Abalewi ku bisagara vyabo.

9Uhoraho abarira Mose,

10ati Barira Abisirayeli, uti Ni mwajabuka Yorodani, mugashika mu gihugu c’i Kanani,

11muze mwirobanurire ibisagara, ngo bize bibe ibisagara vy’ubuhungiro, kugira ng’ umukoracumu yishe umuntu atabigize ibigirankana, ahungireyo.

12Ivyo bisagara bizobabera ubuhungiro bgo guhunga umuhōzi, kugira ng’ uwo mukoracumu ntapfe atarahagarara imbere y’ikombe ngw acirwe urubanza.

13Uti Mu bisagara muzobaha, bitandatu bize bibabere ibisagara vy’ubuhungiro.

14Muze mushireh’ ibisagara bitatu hakuno ya Yorodani, bindi bitatu mu gihugu c’i Kanani; bize bibe ibisagara vy’ubuhungiro.

15Ivyo bisagara bize bibere Abisirayeli ubuhungiro, bo n’umunyamahanga n’inyambukira bari muri bo; kugira ng’ umukoracumu yishe umuntu atabigize ibigirankana, ahungireyo.

16Ariko ni yaba yamukubise ikintu c’icuma, akagwaho, azoba ar’ umwicanyi: kand’ umwicanyi ntaz’ abure kwicwa.

17Canke ni yaba yamuhondesheje ibuye afise mu ntoke, ryoshobora kwica umuntu, akagwaho, azoba ar’ umwicanyi: kand’ umwicanyi ntaz’ abure kwicwa.

18Canke ni yaba yamukubise ikintu c’igiti afise mu ntoke, coshobora kwica umuntu, akagwaho, azoba ar’umwicanyi: kand’ umwicanyi ntaz’ abure kwicwa.

19Ūhōra uwishwe az’ abe ari we amwica ubgiwe: aho bazohūrira, amwice.

20Canke ni yaba yamucuranguje kubg’ urwanko, cank’ akamutera ikintu yamuryamiye, akagwaho;

21cank’ akamukubita igipfunsi kubg’ ubgansi, akagwaho; uyo amwishe ntaz’ abure kwicwa: azoba ar’ umwicanyi. Ūhōra uwishwe az’ amwice aho bazohūrira hose.

22Mugabo, ni yaba yamucuranguje atavyitumye, atabitewe n’urwanko, canke ni yaba yamuteye ikintu atamuryamiye,

23canke ni yaba yamuteye ibuye ryoshobora kwica umuntu, atamubona, akagwaho, kand’ atar’ asanzwe ar’ umwansi wiwe, atārondera kumugirira nabi;

24abanyekombe baze bacire urubanza uwishe n’ ūhōra uwishwe, ruhwanye n’ayo mabgirizwa;

25bakize uwo mukoracumu, bamukūre mu maboko y’ūmuhōra uwo yishe, bamusubize mu gisagara c’ubuhungiro aho yari yahungiye; az’ abe ari ho aba gushitsa ah’ umuherezi mukuru, yasutswekw amavuta yejejwe yo kumurobanura, azopfira.

26Arik’ uwo mukoracumu ni yahīrahīra akarengana urugabano rw’igisagara abamwo c’ubuhungiro, aho yahungiye,

27ūhōra uwishwe akamusanga inyuma y’urugabano rw’ico gisagara abamwo c’ubuhungiro, akamwica, amaraso y’uwo mukoracumu ntazomusubirako;

28kuko yar’ akwiye kuguma mur’ ico gisagara yabamwo c’ubuhungiro gushitsa ah’umuherezi mukuru azopfira. Arik’ umuherezi mukuru amaze gupfa, uwo mukoracumu azobona gusubira i we mw ishamvu yiwe.

29Ivyo bize bibabere ibgirizwa muzohora mukurikira mu guca imanza, ukw ibihe vy’urunganwe rwanyu bizogenda bikurikirana aho muba hose.

30Ni hagira uwica uwundi, uwo mwicanyi aze yicishwe n’ivyabona bimwagirije; arikw icabona kimwe ntikize cagirize umuntu ngo yicwe.

31Kandi ntimuze mwemere ivyo gucungura umwicanyi yar’ akwiye gupfa: aze yicwe nta kabuza.

32Kandi ntimuze mwemere ivyo gucungura uwahungiye mu gisagara c’ubuhungiro, ngw asubire kwībēra i wabo mu gihugu, umuherezi atarapfa.

33Nuko ntimuze muhumanye igihugu murimwo; kukw amaraso ari yo ahumanya igihugu; kandi nta mpongano yaco yo kugihongera kubg’ ayo maraso yakiviriyemwo, atar’ amaraso y’uwayavishije.

34Ntimuze muhumanye igihugu muzobamwo, ico nzoba ndimwo hagati: kuko jewe Uhoraho mba hagati mu Bisirayeli.

← Chapter 34 Jump to: Chapter 36 →