Numbers 29

Kirundi (Bibliya Yera 1951, 1967 (Burundi))

← Chapter 28 Jump to: Chapter 30 →

1Mu kwezi kw’indwi, ku musi wakwo wa mbere, muze mukoranywe no kuba ikoraniro ryera; ntihaze hagire igikorwa kiruhisha muwukorako: muze muwugire umusi wo kuvuzakw inzamba.

2Muze muwutangekw ikimazi co kwoswa c’ umubabge ummotera neza, jewe Uhoraho; kize kibe imasa y’ umukangara imwe, n’impfizi y’ intama imwe, n’abana b’intama ndwi b’amasuguru, batarengeje umwaka, batagira agasembga,

3hamwe n’ishikanwa ry’ifu bigendanye, ifu igogōretse ivanzwe n’ amavuta ya elayo; iryo ku masa ribe ibigiracumi bitatu vy’ingero yitwa efa, iryo ku mpfizi y’intama ribe ibigiracumi bibiri vya efa nyene,

4iryo ku mwana w’intama umwe‐umwe mur’ abo, ukw ar’ indwi, ribe ikigiracumi kimwe.

5Muze mutange n’impfizi y’impene imwe kw ikimazi gitangirwa ivyaha, co kubabera impongano.

6Muze muvyongere kuri ca kimazi co kwoswa gihora gitangwa iy’ ukwezi kubonetse, hamwe n’ishikanwa ry’ifu bigendanye, vyongerwe no kuri ca kimazi co kwoswa c’intasība, hamwe n’ishikanwa ry’ifu bigendanye, bo n’ amashikanwa y’ibiturire agendanye n’ivyo vyose, nk’uko bishinzwe; bibe umubabge umota neza, ikimazi gitōngōrwa n’umuriro nshikaniwe jewe Uhoraho.

7Ku musi w’icumi w’ukwo kwezi kw’indwi muze mukoranywe no kuba ikoraniro ryera; muze mwame muwibabazako, kandi ntimuze mugire igikorwa na kimwe muwukorako;

8ariko muze mutange ikimazi co kwoswa munshikaniye jewe Uhoraho, c’umubabge umota neza; kize kibe imasa y’umukangara imwe, n’ impfizi y’intama imwe, n’abana b’intama ndwi b’amasuguru, batarengeje umwaka; muze mubitange bitagira agasembga.

9Muze mubitangane n’ishikanwa ry’ ifu bigendanye, ifu igogōretse ivanzwe n’amavuta ya elayo; iryo ku masa ribe ibigiracumi bitatu vya efa, iryo ku mpfizi y’intama ribe ibigiracumi bibiri vya efa nyene,

10iryo ku mwana w’intama umwe‐umwe mur’ abo, ukw ar’ indwi, ribe ikigiracumi kimwe.

11Mutange n’impfizi y’impene imwe kw ikimazi gitangirwa ivyaha; muze muvyongere ku kimazi gitangirwa ivyaha c’impongano, no kuri ca kimazi co kwoswa c’intasība, no kw ishikanwa ry’ifu bigendanye, no ku mashikanwa y’ibiturire agendanye na vyo.

12Kandi ku musi ugira icumi na gatanu w’ukwo kwezi kw’indwi muze mukoranywe no kuba ikoraniro ryera; ntimuze mugire igikorwa kiruhisha muwukorako, kandi muze mumare imisi ndwi muri mu misi mikuru yo kunyubaha, jewe Uhoraho.

13Ku musi wayo w’intangamarāra muze mutange ikimazi co kwoswa, ikimazi gitōngōrwa n’umuriro, umubabge ummotera neza; kize kibe amamasa y’imikangara cumi n’ atatu, n’impfizi z’intama zibiri, n’abana b’intama cumi na bane b’ amasuguru, batarengeje umwaka; bize bibe ibitagira agasembga.

14Mubitangane n’ishikanwa ry’ ifu rigendana na vyo, ifu igogōretse ivanzwe n’amavuta ya elayo; iryo ku masa imwe‐imwe mur’ ayo, ukw ar’icumi n’atatu, ribe ibigiracumi bitatu vya efa, iryo ku mpfizi y’intama imwe‐imwe mur’ izo, ukw ari zibiri, ribe ibigiracumi bibiri vya efa nyene,

15iryo ku mwana w’intama umwe‐umwe mur’ abo, ukw ar’ icumi na bane, ribe ikigiracumi kimwe.

16Mutange n’impfizi y’impene imwe kw ikimazi gitangirwa ivyaha; muze muvyongere kuri ca kimazi co kwoswa c’intasība, no kw ishikanwa ry’ifu n’iry’ ibiturire, uko bigendana na co.

17Bukeye ku musi ugira kabiri muze mutange amamasa y’imikangara cumi n’abiri, n’impfizi z’ intama zibiri, n’abana b’intama cumi na bane b’amasuguru, batarengeje umwaka, batagira agasembga;

18mutangane n’ayo mamasa n’izo mpfizi z’intama n’ abo bana b’intama amashikanwa y’ifu n’ay’ ibiturire bigendana, nk’ukw igitigiri cavyo kingana, nk’uko bishinzwe.

19Mutange n’impfizi y’impene imwe kw ikimazi gitangirwa ivyaha; muze muvyongere kuri ca kimazi co kwoswa c’intasība, no kw ishikanwa ry’ifu n’iry’ ibiturire, uko bigendana na co.

20Bukeye ku musi ugira gatatu muze mutange amamasa cumi n’ imwe, n’impfizi z’intama zibiri, n’abana b’intama cumi na bane b’ amasuguru, batarengeje umwaka, batagira agasembga;

21mutangane n’ayo mamasa n’izo mpfizi z’intama n’abo bana b’intama amashikanwa y’ifu n’ay’ ibiturire bigendana, nk’ukw igitigiri cavyo kingana, nk’uko bishinzwe.

22Mutange n’impfizi y’impene imwe kw ikimazi gitangirwa ivyaha; muze muvyongere kuri ca kimazi co kwoswa c’intasība, no kw ishikanwa ry’ifu n’iry’ ibiturire, uko bigendana na co.

23Bukeye ku musi ugira kane muze mutange amamasa cumi, n’impfizi z’intama zibiri, n’abana b’intama cumi na bane b’amasuguru, batarengeje umwaka, batagira agasembga;

24mutangane n’ ayo mamasa n’izo mpfizi z’intama n’abo bana b’intama amashikanwa y’ifu n’ay’ ibiturire bigendana, nk’ukw igitigiri cavyo kingana, nk’uko bishinzwe.

25Mutange n’impfizi y’impene imwe kw ikimazi gitangirwa ivyaha; muze muvyongere kuri ca kimazi co kwoswa c’intasība, no kw ishikanwa ry’ifu n’iry’ ibiturire, uko bigendana na co.

26Bukeye ku musi ugira gatanu muze mutange amamasa cenda, n’impfizi z’intama zibiri, n’abana b’intama cumi na bane b’amasuguru, batarengeje umwaka, batagira agasembga;

27mutangane n’ayo mamasa n’izo mpfizi z’intama n’abo bana b’intama amashikanwa y’ifu n’ay’ ibiturire bigendana, nk’ukw igitigiri cavyo kingana, nk’uko bishinzwe.

28Mutange n’impfizi y’impene imwe kw ikimazi gitangirwa ivyaha; muze muvyongere kuri ca kimazi co kwoswa c’intasība, no kw ishikanwa ry’ifu n’iry’ ibiturire, uko bigendana na co.

29Bukeye ku musi ugira gatandatu muze mutange amamasa munani, n’impfizi z’intama zibiri, n’abana b’intama cumi na bane b’ amasuguru, batarengeje umwaka, batagira agasembga;

30mutangane n’ayo mamasa n’izo mpfizi z’intama n’abo bana b’intama amashikanwa y’ifu n’ay’ ibiturire bigendana, nk’ukw igitigiri cavyo kingana, nk’uko bishinzwe.

31Mutange n’impfizi y’impene imwe kw ikimazi gitangirwa ivyaha; muze muvyongere kuri ca kimazi co kwoswa c’intasība, no kw ishikanwa ry’ifu n’iry’ ibiturire, uko bigendana na co.

32Bukeye ku musi ugira indwi muze mutange amamasa ndwi, n’ impfizi z’intama zibiri, n’abana b’intama cumi na bane b’amasuguru, batarengeje umwaka, batagira agasembga;

33mutangane n’ayo mamasa n’izo mpfizi z’intama n’abo bana b’intama amashikanwa y’ifu n’ay’ ibiturire bigendana, nk’ukw igitigiri cavyo kingana, nk’uko bishinzwe.

34Mutange n’impfizi y’impene imwe kw ikimazi gitangirwa ivyaha; muze muvyongere kuri ca kimazi co kwoswa c’intasība, no kw ishikanwa ry’ifu n’iry’ ibiturire, uko bigendana na co.

35Bukeye ku musi ugira umunani muze mugire ikoraniro ry’ agahebuza; ntimuze mugire igikorwa kiruhisha muwukorako;

36ariko muze mutange ikimazi co kwoswa, ikimazi gitōngōrwa n’ umuriro, umubabge ummotera neza, jewe Uhoraho; kize kibe imasa imwe, n’impfizi y’intama imwe, n’abana b’intama ndwi b’ amasuguru, batarengeje umwaka, batagira agasembga;

37ishikanwa ry’ifu n’ishikanwa ry’ibiturire vyo kugendana n’iyo masa n’iyo mpfizi y’intama n’abo bana b’intama, bize bibe nk’ukw igitigiri c’ivyo bimazi kingana, nk’ uko bishinzwe.

38Mutange n’ impfizi y’impene imwe kw ikimazi gitangirwa ivyaha; muze muvyongere kuri ca kimazi co kwoswa c’intasība, no kw ishikanwa ry’ifu n’iry’ ibiturire, uko bigendana na co.

39Ivyo abe ari vyo muzohora munshikanira, jewe Uhoraho, mu misi mikuru yanyu ishinzwe, muvyongeye ku bimazi vyanyu vyo kwoswa, no ku mashikanwa yanyu y’ifu no ku y’ibiturire, no ku bimazi vyanyu vy’ishimwe, ivyo mutangishwa no gushitsa isezerano canke n’uko muvyigombeye.

40Nuko Mose ashikiriza Abisirayeli ivyo Uhoraho yamubariye vyose.

← Chapter 28 Jump to: Chapter 30 →