Numbers 34

Kirundi (Bibliya Yera 1951, 1967 (Burundi))

← Chapter 33 Jump to: Chapter 35 →

1Uhoraho abarira Mose,

2ati Barira Abisirayeli, uti Ni mwashika mu gihugu c’i Kanani, ari co gihugu muzohabga kw ishamvu iyo kiva kikagera,

3urubibe rw’aho muzogeza ku ruhande rw’i bumanuko ruze ruhēre mu bugaragwa bg’i Zini, rugende rubangikanye n’igihugu ca Edomu. Urwo rubibe rwanyu rw’i bumanuko ruze ruhēre kw iherezo ry’ Ikiyaga c’Umunyu ahahera i burasirazuba;

4ruheze rukebanuke, ruce hirya y’umudūgo w’i Akurabimu ahahera i bumanuko, rugende rushike i Zini, rugarukire hirya y’i Kadeshi‐baruneya ahahera i bumanuko nyene; ruheze rugende rushike i Hasaradari, rukomeze rushike muri Asimoni:

5ruvuye muri Asimoni, rukebanuke, rushike ku mugezi wa Egiputa, rugarukire ku Kiyaga Kinini.

6Urubibe rw’i burengerazuba ruze rube ico Kiyaga Kinini nyene: kuri co az’ abe ari ho mugarukira; ico kize kibe urubibe rwanyu ahahera i burengerazuba.

7Urubibe rwanyu rw’i burārūko ruze rube uru: muhēreye ku Kiyaga Kinini murucishe ku musozi Hori;

8muhēreye ku musozi Hori murucishe ahafata i Hamati, rugarukire i Sedadi;

9ruheze rugende rushike i Zifuroni, rugarukire i Hasar‐enani: urwo ruze rube urubibe rwanyu rw’i burārūko.

10Urubibe rwanyu rw’i burasirazuba, muhēreye i Hasar‐enani nyene muze murucishe i Shefamu;

11ruvudutse i Shefamu, rumanuke, rushike i Ribula, hirya ya Ayini ahahera i burasirazuba; ruheze rumanuke rujane inkōkoro y’ikiyaga Kinereti ihera i burasirazuba;

12rumanuke rujane Yorodani, rugarukire ku Kiyaga c’ Umunyu. Ico ni co kizoba igihugu canyu, ukw imbibe zaco zigikīkūje impande zose.

13Mose abishikiriza Abisirayeli, at’ Ico ni co gihugu muzohabga kw ishamvu, mukigabanganijwe n’ ubupfindo, ico Uhoraho yageze ko gihabga imiryango cenda n’igihimba;

14kuk’ umuryango w’ Abareyubeni, nk’ukw amazu ya ba sekuruza ari, n’uw’ Abagadi, nk’ ukw amazu ya ba sekuruza ari, n’igihimba gisigaye c’umuryango w’Abamanase, bamaze guhabga amashamvu yabo.

15Iyo miryango, ukw ar’ ibiri n’igihimba, bamaze guhabga amashamvu yabo hakuno ya Yorodani aharābana n’i Yeriko, ku ruhande rw’i burasirazuba.

16Uhoraho abarira Mose,

17at’ Aya ni yo mazina y’abantu bazobagabanganya igihugu kw amashamvu: Eleyazari umuherezi na Yosuwa mwene Nuni.

18Muze mukūre umukuru umwe‐umwe mu muryango wose, kugira ngo bagabanganye igihugu kw amashamvu.

19Aya ni yo mazina y’abo bantu: mu muryango w’Abayuda ni Kalebu mwene Yefune;

20mu muryango w’Abasimeyoni ni Shemuweli mwene Amihudi;

21mu muryango w’Ababenyamini ni Elidadi mwene Kisiloni;

22mu muryango w’Abadani umukuru az’ abe Buki mwene Yogili;

23mu Bayosefu baze babe aba: mu muryango w’ Abamanase umukuru az’ abe Haniyeli mwene Efodi;

24mu muryango w’Abefurayimu umukuru az’ abe Kemuweli mwene Shifutani;

25mu muryango w’Abazebuloni umukuru az’ abe Elisafani mwene Parunaki;

26mu muryango w’ Abisakari umukuru az’ abe Palutiyeli mwene Azani;

27mu muryango w’Abasheri umukuru az’ abe Ahihudi mwene Shelomi;

28mu muryango w’Abanafutali umukuru az’ abe Pedaheli mwene Amihudi.

29Abo ni bo Uhoraho yageze kugabanganya Abisirayeli amashamvu yabo mu gihugu c’i Kanani.

← Chapter 33 Jump to: Chapter 35 →